Read Kalderash Romani Cornilescu Bible 2020 (Romania) Numeri 8 Bible Online

Numeri 8 - Kalderash Romani Cornilescu Bible 2020 (Romania) bible

Numeri 8

¹O Rai dea duma le Moisahkă, thai phendea:

²„De duma le Aaronohkă, thai phen lehkă: Kana thosa le kandele ando sfešniko, kukola efta kandele trăbun te dudearăn ande rig anglal le sfešnikosti.”

³O Aarono kărdea kadea; thodea le kandele ande rig anglal le sfešnikosti, sar mothodeasas le Moisahkă o Rai.

⁴O sfešniko sas ando sumnakai mardo; kaditi o punŕo sode i le lulludea lehkă, sas andoa sumnakai mardo. O Moise kărdeasas o sfešniko pala o tipo sar sîkadeasas lehkă o Rai.

⁵O Rai dea duma le Moisahkă, thai phendea:

⁶„Le ăl Leviçăn andoa maškar le šeavengo le Israelohkă, thai ujear le.

⁷Dikta sar te ujearăs le: Pitear le paiesa iertimahkărăsa; te mekăs te nakhăl o bričio pa sa lengo stato, te xalaven pehkă çoale, thai te ujearăn pe.

⁸Te lel pala kodea khă guruwiçî, la pativeasa le xabenesti kai thol pe, kărdi anda e lulludi le aŕăsti, kovleardi zetinosa, thai te mai les aver guruwiçî anda e jertfa le iertimasti.

⁹Te pašarăs le Leviçen angla e çăra le arakhadimasti, thai te tides soa tidimos le šeavengo le Israelohkărăn.

¹⁰Te pašearăs le Leviçen angloa Rai, thai le šeave le Israelohkă te thon pehkă vast pel Leviçea.

¹¹O Aarono te lăgănil le Leviçăn ande khă rig thai ande kolaver angloa Rai, sar khă pativ lăgănime anda e rig le šeavendi le Israelohkă; thai te aven kadea line ando kandimos le Raiehko.

¹²Le Leviçea te thon pehko vast po šero le guruwiçăngo, thai te anes iekh sar jertfa iertimasti, thoa kolaver sar phabarimos dă sa, kaste kărăs iertimos anda le Leviçea.

¹³Te thos le Leviçăn ande pînŕănde angloa Aarono thai lehkă šeave, thai te lăgănis le ande khă rig thai ande kolaver, sar khă pativ lăgănime le Raiehkă.

¹⁴Kadea te desrigate le Leviçăn andoa maškar le šeavengo le Israelohkă; thai le Leviçea avena Mîŕă.

¹⁵Pala kodea le Leviçea te aven te kărăn o kandimos ande çăra le arakhadimasti. Kadea te ujearăs le thai te lăgănis le ande khă rig thai ande kolaver, sar khă pativ lăgănime.

¹⁶Kă on sî Mangă dine cu sa andoa maškar le šeavengo le Israelohkă: Me lem le anda Mande ando than le anglal kărdinengo, anda sal anglal kărdine le šeavengă le Israelokă.

¹⁷Kă orsao angla kărdo le šeavengo le Israelohkă sî Muŕo, kaditi katal manuši I kaditi anda le juvindimata; Mangă lem Mangă le andoa des kana maladem sa le anglal kărdine andoa čem le Ejiptohko.

¹⁸Thai Me lem le Leviçăn ando than sa le anglal kărdine anda le šeave le Israelohkă.

¹⁹Dem le Leviçăn ku sa le Aaronohkă thai lehkă šeavengă, andoa maškar le šeavengo le Israelohkă, kaste kărăn kandimos anda le šeave le Israelohkă ande çăra le arakhadimasti, te kărăn iertimos anda le šeave le Israelohkă, thai kadea le šeave le Israelohkă te na aven malade či kha prikazatar, kana pašona le sfîntone thanestar.”

²⁰O Moise, o Aarono thai sa o tidimos le šeavengo le Israelohkă, kărdine le Leviçănça sa so mothodea sas le Moisahkă o Rai pal Leviçea; kadea kărde le šeave le Israelohkă lença.

²¹Le Leviçea ujearde pe, thai xalade pehkă çoale. O Aarono lăgănisardea le ande khă rig thai ande kolaver, sar khă pativ lăgănime angloa Rai, thai kărdea iertimos anda lende, kaste ujeară le.

²²Pala kodea, le Leviçea avile te kărăn kandimos ande çăra le arakhadimasti, angla o Aarono thai lehkă šeave. Orta kadea sar phendeasas le Moisahkă o Rai dikhlimasa kal leviçea, kadea kărdea pe lença.

²³O Rai dea duma le Moisahkă, thai phendea:

²⁴Dikta e lejea dikhlimasa kal Leviçea. Kata le bărši biši thai panji angle, orsao Levito šola pe ando kandimos la çărako le arakhadimasti, kaste pherăl khă kandimos oče.

²⁵Kata le panvardeši bărši angle, te anklel avri andoa kandimos, thai te na mai kandel.

²⁶Daštila te kandel pehkă phralen ande çăra le arakhadimasti, te arakhăl so sî lengă dino ande sama; ta te na mai kărăl kandimos. Kadea te kărăs le Leviçănça ando dikhlimos lengă kandimahko.