Read Kalderash Romani Cornilescu Bible 2020 (Romania) Numeri 9 Bible Online

Numeri 9 - Kalderash Romani Cornilescu Bible 2020 (Romania) bible

Numeri 9

¹O Rai dea duma le Moisahkă ande pustia andoa Sinai, ando šon anglal le duito băršehko, pala o ankăstimos lengo anda o čem le Ejiptohko. Thai phendea:

²„Le šeave le Israelohkă te thon o prazniko la Patradeako ando čiro mothodino.

³Te thon o prazniko koa čiro mothodino, ando dešuštar le desăhko le šonehko kadalehko, reate; te thon o prazniko pala sa le krisa, thai pala sa le mothodimata dikhlimasa lende.”

⁴O Moise dea duma le šeavengă le Israelohkă, te thon e Patradi.

⁵Thai thodine e Patradi ando des o dešuštar le šonehko anglal, reate, ande pustia ando Sinaio; le šeave le Israelohkă kărdine orta pala sea le mothodimata, kai deasas le ăl Moisahkă o Rai.

⁶Kărdilea kă varesar manuši, sas biuje anda kă thodinesas o vast pe khă mullo, naštinas te thon e Patradi ande kodoa des. On avile ande kodoa des angloa Moise thai angla o Aarono.

⁷Thai le manuši kodola phendine le Moisahkă: „Ame sam biuje anda khă mullo; sostar te avas došasa te na anas koa čiro mothodino amari pativ kai delpe le Raiehkă ando maškar le šeavengo le Israelohkă?”

⁸O Moise dea le anglal: „Ajukărăn te dikhau so mothol o Rai.”

⁹Thai o Rai dea duma le Moisahkă, thai phendea:

¹⁰„De duma le šeavengă le Israelohkă, thai phen lengă: „Kana varekon anda tumende or anda tumară avimata sî biujo anda e doši khă mullesti, or sî ande khă phirimos lungo, phenkă te thol e Patradi ande pativ le Raiesti.

¹¹Thai, te thol la ando duito šon, ande le dešuštarăngo des, reate, te xal la pogăčença thai čeareança kărkă.

¹²Te na mekăl khanči anda lende ji ando duito des dă droboitu, thai te na phagăl či khă kokalo anda lende. Te thol o prazniko pala sa le mothodimata dikhlimasa ka e Patradi.

¹³Kana varekon nai ujo, nai či ando phirimos, thai sa či thol o prazniko la Patradeako, o sufleto kodoa te avel mullimahko anda pehko poporo; anda kă či andea e pativ kai del pe le Raiehkă koa čiro mothodino, o manuši kodoa te lel pesko došallimos anda pesti bezex.

¹⁴Kana khă străino, kai bešel maškar tumende, prăznuil e Patradi le Raiesti, te nikărăl pe le lejendar thai le mothodimatăndar dikhlimasa kai Patradi. Sa kodea kris te avel maškar tumende, andao străino sar i andoa kukoaoçal.

¹⁵Ando des kana sas anzardi e çăra, o noro garadea o than la çărako le arakhadimasti; thai, dă reateako ji dădroboitu opral pai çăra amealas sar khă iag.

¹⁶Orkana sas kadea: desă, o noro garavelas e çăra, ta reate amealas khă iag.

¹⁷Kana vazdelas pe o noro pai çăra, telearănas i le šeave le Israelohkă; oče kai atărdeolas o noro, ašenas i le šeave le Israelohkă.

¹⁸Le šeave le Israelohkă telearănas pala o mothodimos le Raiehko thai bešenas pala o mothodimos le Raiehko; bešenas sode čiro ašelas o noro opral pai çăra.

¹⁹Kana o noro ašelas mai but čiro opral pai çăra, le šeave le Israelohkă ašunenas le mothodimastar le Raieskărăstar, thai či telearănas.

²⁰Kana o noro ašelas mai xançorî des opral e çăra, on bešenas pala o mothodimos le Raiehko, thai telearănas pala o mothodimos le Raiehko.

²¹Kana o noro atărdeolas dă reateako ji dă droboitu, thai vazdelas pe dădroboitu, atunčeara telearănas i on. Kana o noro vazdelas pe pala khă des thai khă reat, atunčeara telearănas i on.

²²Kana o noro atărdeolas opral pai çăra dui des, or khă šon, or khă bărši, le šeave le Israelohkă ašenas oče, thai či telearănas; thai kana vazdelas pe, telearănas i on.

²³Bešenas pala o mothodimos le Raiehko, thai telearănas pala o mothodimos le Raiehko; ašunenas le mothodimastar le Raieskărăstar, o mothodimos le Raiehko phendino andoa Moise.