Read Kalderash Romani Cornilescu Bible 2020 (Romania) Xabakuk 3 Bible Online

Xabakuk 3 - Kalderash Romani Cornilescu Bible 2020 (Romania) bible

Xabakuk 3

¹O rudimos le proorokohko Xabakuko (Dă dilabaimos sar le dilabaimata le roimahkă.)

²Kana ašundem, Raia, so vestisardean, darailem. Juvindisar Ti buti ando phirimos le băršengo, Raia! Kărdo Ta prinjeando ando nakhlimos le băršengo! Ta, ande Ti xolli, an Tukă godi le meklimatănar Tiră!

³O Rai avel andoa Teman, thai Kukoa o Sfînto avel poa baŕobaro o Paran… — (Atărdimos.) — O barimos Lehko garavel le čeruri, thai e slava Lesti pherăl e phuw.

⁴O străfeaimos Lehko sî sar e duda le khamesti, andoa vast Lehko telearăn rază, thai oče sî garadi Lesti zor.

⁵Angla Leste jeal e čiuma, thai e molima ušteavel pel urme lehkă.

⁶Atărdeo, thai măsuril e phuw la iakhasa; dikhăl, thai kărăl le neamuren te isdran; le baŕlebară andal veakuri linčeaon, le pleaia kola le purane bandeon; O phirăl pe le droma le vešnikuri.

⁷Dikhau le çăre la Etiopiakă, pherde daraimos, thai isdran le kolibe andoa čem le Madianohko.

⁸Ta xolleai'lo o Rai pe le nanilašuri? Pa le nanilašuri astardeol e xolli Tiri, or pa e marea šordeol e arman Tiri, ta ankăstean pel grast Tiră, thai ankăstean ando urdon Tiro le izbîndimahko?

⁹O arko Tiro sî nandeardo; le armaia sî le săjeçi Te Divanohkă… — (Atărdearimos.) — Tu šines e phuw kaste des drom le nanilašengă.

¹⁰Koa dikhlimos Tiro, isdran le baŕlebară; jeantar nanilašuri paiengă; o andraimos vazdel pehko mui, thai vazdel pehă valurea opră.

¹¹O kham thai o šonuto atărdeon ande pehko bešlimos, anda e lumina Te săjeçăndi kai telearăn, andoa străfeaimos Tea suliçako kai lučeal.

¹²Tu phirăs e phuw ande arman Tiri, linčearăs le neamuren ande Ti xolli.

¹³Ankli kaste skăpis Te poporos, te skăpis Te makhles; linčearăs o opraimos le khărăhko kolehko le nasulimatahko, xasarăsles andal temelii ji ando gor. — (Atărdearimos.) —

¹⁴Pusaves Te săjetănça le šerălebară lehkă, aven pa mande sar o barobrîšind, te thon ma po našlimos, ankaldindoi çîpimata bukurimahkă, sar i kana sahkă xalem koles le bibaxtales ando than.

¹⁵Le grastença Tirănça phirăs pe maresa, pel zoale le paiengă le barăngă.

¹⁶Kana ašundem… e buti kadea, isdraia muŕo stato; koa vestimos kadoa, šuteon mîŕă ušt, šol pe mangă o ternimos andel kokala, thai isdran mîŕă čeanga. Kă daštiua kadea te ajukrau ando ašimos o des le kăsnimahko, o des kana o zoralimahko jeala poa poporo?

¹⁷Kă orta o smoitino či mai lulludearăla, e răz či mai dela či khă rodo, o rodo le zetinohko či avela, thai le islazurii či mai dena xamos, le bakrea xasaona anda le stîne, thai či mai avena či guruw andel grajduri,

¹⁸me sa bukueriua ma ando Rai, bukuriua ma ando Dell mîră skăpimahko!

¹⁹O Rai o Dell sî e zor mîŕî. O kărăl mîŕă pînŕă sar le čerbengă, thai kărăl ma te jeau pel učimata mîŕă. Karing o mai baro le dilabaitorengo. Dă dilabaimos le instrumentença le koardença.