Read Kalderash Romani Cornilescu Bible 2020 (Romania) Zaxaria 2 Bible Online

Zaxaria 2 - Kalderash Romani Cornilescu Bible 2020 (Romania) bible

Zaxaria 2

¹Vazdem le iakha thai dikhlem, thai dikta kă sas khă manuši kai nikrălas ando vast khă šello măsurimahko.

²Pušlem les: „Kai jeas?” Thai o phendea mangă: „Jeau te măsuri o Ierusalimo, kaste dikhau so bufllimos thai lunjimos sî les.”

³Thai o înjero, kai delasduma mança găloangle, thai aver înjero ankăsto angla leste.

⁴O phendea lehkă: „Praste ta deduma le tărnehkă kadalehkă, thai phen lehkă: „O Ierusalimo avela khă četatea pîtărdi, anda e buti le butimasti le manušengo thai le jiwinengo kai avena ande lehko maškar;

⁵Me Orta — phenel o Rai — avaua khă zîdo iagako dă rigatar lehko, thai avaua e slava lesti ande lehko maškar!”

⁶„Našen, našen andoa čem katar avelereat! Phenel o Rai. Kă phaŕadem tume ande kola štar bravallea le čerurengă, phenel o Rai.”

⁷Skăpisar, Sioane, tu kai bešes kai šei le Babilonosti!

⁸Kă kadea delduma, o Rai le oštirengo: „Pala e slava tradea ma O kal neamuri kai jefuisarde tume; kă kukoa kai azbadeol tumendar azbadeol la luminatar Lehkă iakhăngo.

⁹Dikta, vazdau Muŕo vast pa lende, — o phenel o Rai — thai on avena o limos kolengo kai sas lengă meklinetelal, kaste jeanen kă o Rai le oštirenfgo tradea ma.

¹⁰Çîpisar vesălimastar thai bukurisao, šei le Sionosti! Kă dikta, Me avau, thai bešaua ande teo maškar, phenel o Rai.”

¹¹„But neamuri astardeona le Raiestar, ando des kodoa, thai avena Muŕo poporo. Me bešaua ande teo maškar, thai jeanesa kă o Rai le oštirengo tradea ma tute.

¹²O Rai lela ando stăpînimos le Iudas, sar e rig lesti le mandimatasti ande phuw e sfănto, thai alosarăla pale le Ierusalimos.

¹³Orsao juwindimos te ašelmuto angloa Rai, kă O ušti'lo anda Pehko than kukoa o sfînto!