Read Kalderash Romani Cornilescu Bible 2020 (Romania) Matei 14 Bible Online

Matei 14 - Kalderash Romani Cornilescu Bible 2020 (Romania) bible

Matei 14

¹Ando čiro kodoa, o baro Irodo, ašundea dindoi duma poa Isus;

²thai phendea pehkă kanditorengă: „Koadoa sî o Ioan Bolditori! Ušti'lo anda le mulle, anda kodea kărdeon minuni anda leste.”

³Kă o Irodo astardeasas le Ioanos, phanglea les thai šuteasas ando beči, anda e doši la Irodiati, e romni lehkă phralesti le Filiposti;

⁴anda kă o Ioan phenelas lehkă: „Nai tukă mišto te avel tukă dă romni.”

⁵O Irod kamelas te mudarăles, ta daralas andoa norodo, anda kă o norodo dikhălas le Ioanos sar khă prooroko.

⁶Ta, kana sas o prazniko lehkă desăhko le kărimahko, e šei la Irodiati khăldea angla lehkă gosti, thai čeilosardea le Irodos.

⁷Anda kodea šinadea lakă ando solaxaimos kă dela la or so mangăla lehkă.

⁸Sîkadi pehka datar, oi phendea: „De ma kata, ande khă teiari, o šero le Ioan Bolditorehko!”

⁹O thagar falea les nasul; ta anda e doši lehkă solaxaimatăngo, thai le iakhăndar kukolendar kai bešenas kai skafidi lesa, mothodea te del lakă les.

¹⁰Thai tradea te šinen o šero le Ioanohko ando beči.

¹¹O šero sas thodino ande khă teiari, thai dino la šeakă, kai nigărdea les ka pesti dei.

¹²Le jene le Ioanohkă avile thai line lehko stato, praxosarde les, thai găline thai phendine le Isusohkă.

¹³O Isus, kana ašundea e vestea kadea, teleardea oçal ande khă bero, kaste jeal Pehkă korkoŕo vsarekai, andekh than pusto. Le noroade, kana ašundine kadea buti, ankăste andal četăçi thai telearde pala Leste telal.

¹⁴Kana ankăsto anda o bero, o Isus dikhlea khă gloata bari, kărdilea Lehkă mila anda late, thai sasteardea le nasfalen.

¹⁵Kana peli e reat, le jene pašile Lestar, thai phendine Lehkă: „O than kadoa sî pusto, thoa čiro dikta kă nakhlo; de drom le noroaden te jean pehkă andal gava thai te tinen pehkă te xan.”

¹⁶„Nai sostar te telearăn”, dea le anglal o Isus; „den le tume te xan.”

¹⁷Ta on phendine Lehkă: „Nai ame koče numai panji manŕă thai dui maše.”

¹⁸Thai O phendea lengă: „Anen le koče Mande.”

¹⁹Pala kodea mothodea le noroadengă te bešen pe čear, lea kukola panji manŕă thai dui maše. Vazdea Pehkă iakha karing o čeri, deadumadămišto, phaglea o manŕo thai dea kal jene, ta on ulade les kal noroade.

²⁰Saoŕă xaline thai čeailile; thai vazdinisaile dešudui košuri pherde ašimasa thai prušukănça.

²¹Kukola kai xalesas, sas sar panji mii murši, avri anda le juvlea thai le šeaoŕă.

²²Iekhatar pala kodea, o Isus zorasa lea Pehkă jenen te anklen ando bero, thai te nakhăn angla Leste pe rig e kolaver, ji kana dela drom le noroaden.

²³Pala so dea drom le noroaden, ankăsto po baŕobaro te rudil Pe, korkoŕo ande khă rig. Avilisas e reat, thai O sas korkoŕo oče.

²⁴Ando čiro kadoa, o bero sas lino le valurendar ando maškar la mareako; kă e bravall sas ande kolaver rig.

²⁵Kana phaŕadelas o des la reatetar, o Isus avilo lende, phirindoi pe marea.

²⁶Kana dikhle Les le jene phirindoi pe marea, darai le, thai phendine: „Sî khă čioxano!” Thai daratar çîpisarde.

²⁷O Isus phendea lengă iekhatar: „Zumaven, Me sîm; na daran!”

²⁸„Raia”, phendea Lehkă o Petro, „kana san Tu, phen mangă te avau Tute pel paia.”

²⁹„Av!” phendea lehkă o Isus. O Petro dea pe tele andoa bero, thai lea te phirăl pel paia kaste arăsăl koa Isus.

³⁰Ta, kana dikhlea kă e bravall sas zurali, darai'lo; thai anda kă leasas te jeal andră, dea mui: „Raia, skăpisar ma!”

³¹Iekhatar, o Isus tinzisardea o vast, azbadea les, thai phendea lehkă: „Xançî pateaiamnea, anda soste či pateaian?”

³²Thai pala so šutine pe ando bero, e bravall ašili.

³³Kukola kai sas ando bero, avile thai dine čeanga angloa Isus, thai phendine Lehkă: „Čeačimasa, Tu san o Šeau le Devllehko!”

³⁴Pala so nakhline e marea, avile ande phuw le Ghenezaretosti.

³⁵Le manuši andoa than kodoa, kai prinjeanenas le Isusos, tradine te den phendimos ande sa le riga, thai andine Leste sa le nasfalen.

³⁶Le nasfale rudinas Les te mukăle kaditi te azban e podi Lehka raxameati. Thai sa kai azbade, sastile.