Read Kalderash Romani Cornilescu Bible 2020 (Romania) Matei 22 Bible Online

Matei 22 - Kalderash Romani Cornilescu Bible 2020 (Romania) bible

Matei 22

¹O Isus lea o divano, thai dea lengă duma pale andel pilde. Thai phendea:

²„O Thagarimos le čerurengo ameazăl khă thagaresa, kai kărdea abeau pehkă šeavehkă.

³Tradea pehkă roben te akharăn le gosten koa abeau; ta on či kamble te aven.

⁴Tradea pale pehkă roben, thai phendea lengă: „Phenen kodole gostengă: „Dikta kă lašardem muro abeau; guruv thai le juvindimata mîŕă le mai thule sas šinde; saoră sî gata, aven koa abeau.”

⁵Ta on, bi te fale anda o akhardimos lehko, telearde: iekh ka pesti xolda, thai aver ka pehko bitindimos.

⁶Le kolaver thodine o vast pel robea, dinele po lajau, thai mudardele.

⁷Kana ašundea o thgar xoleai'lo; tradea pehkă kătanen, xasardeale mudarditoren kodolen, thai phabardea lendi četatea.

⁸Atunčeara phendea pehkă robengă: „O abeau sî gata; ta kodola gosti nas vrenikuri lestar.

⁹Jean ka le gora le dromengă, thai akharăn koa abeau sa kodolen kai arakhăna le.”

¹⁰Le robea ankăste ka le gora le dromengă, tidine saorăn kai arakhlele, i laše i jungale, thai o than le abeaohko pherdilo gostendar.

¹¹O Thagar šuteape te dikhăl pehkă gosten; thai dikhlea oče khă manušes, kai nas xureado ande raxami le abeaosti.

¹²„Amale”, phendea lehkă o, „sar šutean tu koče bi te avel tu e raxami le abeaosti?” O manuši kodoa muçîsai'lo.

¹³Atunčeara o thagar phendea pehkă kanditorengă: „Phanden lehkă vast thai lehkă pînŕă, thai lenles thai šudenles ando tuneriko dă avreal; oče avela o roimos thai o danddalimos le dandengo.

¹⁴Kă but sî akharde, ta xançî sî alosarde.”

¹⁵Atunčeara le Fariseia telearde thai dinepe duma sar te astarăn le Isusos la orbasa.

¹⁶Tradine Leste pehkă jenen andekhthan le Irodianença, kai phende Lehkă: „Sîkaitorina, jeanas kă san čeačio, thai kă sîkaves le manušen o drom le Devllehko ando čeačimos, bi te fal Tu khanikastar, anda kă Tu či rodes koa mui le manušengo.

¹⁷Ta phen amengă, so pateas? Perăl pe te potinas biro le Čezarohkă or na?”

¹⁸O Isus kai prinjeanelas lengo čiorimos, dea anglal: „Anda soste zumaven Ma, Athaitorilor?

¹⁹Sîkaven Mangă o lov le birohko.” Thai on andine Lehkă khă lov.

²⁰O pušlea le: „O tipo kadoa thai le slove ramome pe leste, kahko sî?”

²¹„Le Čezarohko,” phendine Lehkă on. Atunčeara O phendea lengă: „Den le Čezarohkă so sî le Čezarohkă, thai le Devllehkă so sî le Devllehkă!”

²²Mirime anda le divanuri kadala, on mukle Les, thai telearde.

²³Sa ande kodoa des, avile koa Isus le Saducheia, kai phenen kă nai juvindimos. On thodine Lehkă koakoa pušlimos:

²⁴„Sîkaitorina, o Moise phendea: „Te merălla varekon bi te aven les šeave, lehko phral te lel la romnea pehkă phralesti, te vazdel lehkă avimos.”

²⁵Ta sas amende efta phral. O mai anglal însurisai'lo, thai mullo; thai, kă nas les šeave, muklea pehkă phralehkă pehka romnea.

²⁶Sa kadea i o duito, thai i o trito, ji ka o eftato.

²⁷Mai palalal, pala lende sa, mulli i e juwli.

²⁸Koa juvindimos, e romni savendi anda le efta avela oi? Anda kă saoŕă sasla dă romni.

²⁹Čeačio phendimos, o Isus phendea lengă: „Xasardeon! Anda kă či prinjeanen o Lill le Devllehko, či e zor le Devllesti.

³⁰Kă koa juvindimos, čina či însurina pe, čina či măritina pe, ta avena sar le injerea le Devllehkă andoa čerii.

³¹So dikhălpe poa juvindimos le mullengo, barem na drabardean so phendeape tumengă le Devllestar, kana phenel:

³²„Me sîm o Dell le Avraamohko, le Isakohko, thai le Iakovohko?” O Dell nai khă Dell le mullengo ta le juvindengo.”

³³Le noroade, kai ašunenas, ašiline uimime andoa sîkaimos le Isusohko.

³⁴Kana ašundine le Fariseia kă o Isus phandadea o mui le Sadušeiengo, tide pe ande khă than.

³⁵Thai iekh anda lende, khă sîkaitorii la Krisako, kaste zumavel Les, thodea Lehkă kakoa pušlimos:

³⁶„Sîkaitorina, sao sî o mai baro mothodimos anda e Kris?”

³⁷O Isus dea les anglal: „Te kames le Raies, le Devlles tirăs, sa le illesa tirăsa, sa te sufletosa, thai sa duxosa.”

³⁸Kadea sî e mai anglal, thai kadea sî o mai baro mothodimos.

³⁹Ta o duito, kai ameal lesa, sî: „Te kames te pašes, orta sar tute.”

⁴⁰Ande kadala dui mothodimata astarălpe sa e Kris thai le Prooročiimatăndi.”

⁴¹Sar sas on tidine andekh than le Fariseia, o Isus pušlea le:

⁴²So patean tume poa Kristoso? Kahko šeau sî?” „Le Davidohko,” phende Lehkă on.

⁴³Thai o Isus phendea lengă: „Sar atunčeara o David, av, kana pherdindoi pherdo Duxo, phenel Lehkă Rai, kana phenel:

⁴⁴„O rai phendea mîŕă Raiehkă: „Beši ande Mîŕî čeačirig, ji kana thoaua le dušmaien Tirăn Tala le pînŕă Tiră?

⁴⁵Kadea, kana o Davido phenel Lehkă Rai, sar O sî lehko šeau?”

⁴⁶Khonikh našti dea Les anglal či khă orba.Thai andoa des kodoa, či mai lea te thon Lehkă pušlimata.