Read Kalderash Romani Cornilescu Bible 2020 (Romania) Matei 23 Bible Online

Matei 23 - Kalderash Romani Cornilescu Bible 2020 (Romania) bible

Matei 23

¹Atunčeara o Isus, kana delas duma le manušengă thai Pehkă jenengă,

²phendea: „Le Zakonarea thai le Fariseia bešen po skamin le Moisahko.

³Ta sa le butea, kai phenen tumengă on te arakhănle, arakhănle thai kărănle; ta pala lengă kărimata te na kărăn.

⁴On phanden thodimata phară thai daba phirimahkă, thai thonle pe le dume le manušengă, ta on či le naiesa či kamen te mištinle.

⁵Sa le kărimata lengă kărăn le kaste aven dikhline le manušendar. Kadedar, kărăn pehkă filakterii bufle, pehkă podea le çoalengă fluturença lunji;

⁶phirăn pala le thana anglal kal pativa, thai pala le skamina anglal andal khăngărea;

⁷čeaileolle te mekăn pe le manuši angla lene ande le piaçri, thai te phenen „Rabi! Rabi!”

⁸Tume te na phenen tumengă Rabi! Anda kă Iekh korkoŕo sî o Sîkaitorii tumaro: o Kristoso, thai tume saoŕă san phral.

⁹Thai „Dadd” te na akharăn khanikas pe phuw; anda kă Iekh korkoŕo sî Tumaro Dadd: Kodoa kai sî andel čeruri.

¹⁰Te na akharăn tume „Sîkaitorea”; kă Iekh korkoŕo sî tumaro Sîkairori: o Kristoso.

¹¹O mai baro anda tumende te avel o kanditorii tumaro.

¹²Orkongodi vazdelape, avela perado; thai orkongodi mekălape telal avela vazdino.

¹³Au dă tumendar, zakonarea thai Fariseina athaitorea! Kă tume phandaven le manušengă o Thagarimos le čerurengo; či tume či šon tume ande leste, thai či kolen kai kamen te šonpe, či mekhăn le te šonpe.

¹⁴Au dă tumendar, zakonarea thai Fariseina athaitorea! Anda kă tume xan le khăra le phiwleangă, ando čiro sao, andal iakha la lumeakă, kărăn rudimata lunji; anda kodea lena khă mai bari doši.

¹⁵Au dă tumendar, zakonarea thai Fariseia athaitorea! Anda kă tume phirănroata e marea thai e phuw, kaste kărăn khă manuši pateaimahko; thai, pala so arăslea jeno pateaimahko, kărăn anda leste khă šeau la iagako, duvar mai nasul dă sar san tume orta.

¹⁶Au dă tumendar, phenditorea koŕă, kai phenen: „Te solaxala varekon po Templo, nai khanči; ta kana solaxal po sumnakai le Templohko, sî phango pehkă solaxaimastar.”

¹⁷Dile thai koŕă! Sao sî mai baro: o sumnakai or o Templo, kai sfinçol o sumnakai?

¹⁸„Kana varekon solaxal po altari, nai khanči”, „ta kana solaxal pe pativ poa altari, sî phango pehkă solaxaimastar.”

¹⁹Dile thai koŕă! Sao sî mai baro: e pativ, or o altari, kai sfinçol e pativ?

²⁰Kadea, kon solaxal po altari, solaxal pe leste thai pe sa so sî pa leste;

²¹kon solaxal po Templo, solaxal pe leste thai pe Kukoa kai bešel ande leste;

²²thai kon solaxal po čerii, solaxal po skamin le raimahko le Devllehko thai pe Kukoa kai bešel pe leste.”

²³Au dă tumendar, zakonarea thai Fariseina athaitorea! Anda kă tume den dešimos anda e izma, andoa mărari thai andoa timeno, thai mekăn bikărde le mai bară butea anda e Kris: o čeačimos, e mila thai o pateaimos; kadala trăbun te kărăn le, thai le kolaver te na mekăn le bikărde.

²⁴Phenditorea koŕă, kai denavri le çînçares thai nakhaven la kămila!

²⁵Au dă tumendar, zakonarea thai Fariseia atxaitorea! Anda kă tume xalaven e rig avreal le taxtaiesti thai la pireati, ta andral sî pherde čiorimos thai bilašimos.

²⁶Fariseona koŕo! Xalau anglal e rig le taxtaiesti thai la pireati, anda ta i e rig dă avreal te avel xaladi.

²⁷Au dă tumendar, zakonarea thai Farisea atxaitorea! Anda kă tume san sar le mormînturi văruime, kai, avreal sîkaven šukar, ta andral sî pherde le kokalendar le mullengă thai orsavendar marimata.

²⁸Sa kadea i tume, avreal sîkaven tume bibezexale le manušengă, ta andral san pherde athaimos thai bikrisako.

²⁹Au dă tumendar, zakonarea thai Fariseina atxaitorea! Anda kă tume vazden le mormînturi le prooročengă, xureaven le xîvea kolengă bezexalengă,

³⁰thai phenen: Te traisardino ame andel des amară daddengă, ame nahkă jeas lença te šoras o rat le prooročengo.

³¹Anda kadea phenen orta pa tumende kă san le šeave kolengo kai mudarde le prooročen.

³²Ta tume pherăn e măsura tumară daddendi!

³³Sap, pui šopîrlengă! Sar skăpina tume anda e iag la došati?

³⁴Anda kodea, dikta, tradau tumengă prooročea, xarane thai zakonarea. Iekhăn anda lende mudarănale thai thona le po trušul, avrăn marănale ande tumară khăngărea, thai našavenale anda khă četatea ande aver;

³⁵kaste avel pa tumende soa rat o bidošalo, kai sas šordo pe phuw, dă kata o rat le bibezexalehko Abel ji koa rat le Zaxariahko, o šeau le Barašahko, save mudardeanles maškar o Templo thai o altari.

³⁶Čeačes phenau tumengă, kă sa kadala avena pa o neamo kadoa.

³⁷Ierusalimona, Ierusalimona, kai mudarăs le prooročen thai kai mudarăs le baŕănça kukolen tradine tute! Sodivar kamblem te tidau te šeaven sar tidel e khaini pehkă puien tala le phaka, thai či kamblean!

³⁸Dikta kă mekăl pe tumaro khăr pusto;

³⁹kă phenau tumengă kă dă akanara întea či mai dikhăna Ma ji kana phenena: „Dinodumadămišto sî Kukoa kai avel ando Anau le Raiehko!”