Read Kalderash Romani Cornilescu Bible 2020 (Romania) Matei 24 Bible Online

Matei 24 - Kalderash Romani Cornilescu Bible 2020 (Romania) bible

Matei 24

¹Kana ankăsto andoa Templo, sar jealas o Isus, le jene Lehkă pašile Lestar kaste sîkavel lengă le kărimata le Templohkă.

²Ta o Isus phendea lengă: „Dikhăn tume sa kadala butea? Čeačes phenau tumengă kă či ašela koče baŕ pe baŕăste, kai te na avel perado.”

³O bešlo tele po baŕbaro le Zetinengo. Thai le jene Lehkă avile Leste ande khă rig, thai phende Lehkă: „Phen amengă kana avena sa kadala butea? Thai sao avela o sămno Te avimahko thai le gorăhko kadale veakohko?”

⁴Čeačio phendimos, o Isus phendea lengă: „Šon sama te na athavel tume varekon.

⁵Anda kă avena but ande Muŕo Anau, thai phenena: „Me sîm o Kristoso!” thai athavena buten.

⁶Ašunena mardimatăndar thai vešti mardimatăngă: dikhăn te na daraon, kă sa kadala butea trăbun te aven. Ta o gătimos sa či avela atunčeara.

⁷Khă neamo uštela pe aver neamo, khă thagarimos pa aver rthagarimos; thai, ande iekh thana avena ta izdrala e phuw, bokh thai čiume.

⁸Ta sa kadala butea či avena numai o numai o anglaimos le dukhăngo.

⁹Atunčeara dena tume te aven tinuime, thai mudarănatume; thai avena bidikhline sa le neamurendar anda o Anau Muŕo.

¹⁰Atunčeara but perăna, bitinena pe iekh pe aver, thai čidikhăna pe iekh avrănça.

¹¹Uštena but prooročea xoxamne, thai athavena buten.

¹²Thai, anda e doši le butimasti la bikrisako, e dragostea butendi šudreola.

¹³Ta kon răbdila ji koa gor, avela skăpime.

¹⁴E LašiVestea kadea le Thagarimasti avela diniduma ande sai lumea, kaste kandel phendimos sa le neamurengă. Atunčeara avela o gor.

¹⁵Anda kodea, kana dikhăna „o prikăjimos la pustiatako”, pa sao dea duma o prooroko o Danielo, „lašardo ando than o sfînto” — kon drabarăl te atearăl! —

¹⁶atunčeara, kola kai avena ande Iudea, te našen andel baŕlebară;

¹⁷kon avela opră po khăr, te na ulel te lel pehkă butea andoa khăr;

¹⁸thai kon avela po kîmpo, te na amboldel pe te lel pesti raxami.

¹⁹Au le juwleandar, kai avena pharea thai kukolendar kai dena čiuči ande kodola des!

²⁰Rudin tume ka tumaro našaimos te na avel iwende, či ande khă des Savatohko.

²¹Anda kă atunčeara avela khă năkazo kaditi dă baro, sar nas čiăkhdata dă kana kărdili e lumea ji akana, thai čina či mai avela.

²²Thai kana le des kodola nahkă aven çîknearde, khonikh nahkă skăpil; ta, anda e doši kolendi le alosarde, le des kodola avena çîknearde.

²³Atunčeara te phenela tumengă varekon: „Dikta, o Kristoso sî koče, or kote”, te na pateanles.

²⁴Kă uštena Kristosuri xoxamne thai prooročea xoxamne; kărăna sămnuri bară thai minunea, ji kote ta athavena, te daštila pe, orta i le alosarden.

²⁵Dikta, kă phendem tumengă mai anglal.

²⁶Kana, te phenenau tumengă: „Dikta Les ande pustia”, te na jean oče! „Dikta les ande le Kamere garadea”, te na patean.

²⁷Kă, sar anklel o trăsneto dă katar anklelokham thai dičiol ji kai perălokham, kadea sî te avel i o avimos le Šeavehko le manušehko.

²⁸Or kai avela e mărtăčina, oče tidena pe le vulturea.

²⁹Andakhdata pala kodola des le năkazohkă, „o kham kaleola, o šonuto či mai dela pesti lumina, le čeraia perăna andoa čeri, thai le zora le čerurengă avena mištisarde.”

³⁰Atunčeara sîkadeolape ando čerii o sămno le Šeavehko le manušehko, sa le semençii la phuweakă rovena, thai dikhăna le Šeaves le manušehko avindoi pe le norea le čerehkă zorasa thai barea slavasa.

³¹O tradela Pehkă înjeren la trîmbiçasa bašlimasti, thai tidena sa Lehkă alosarden anda kukola štar bravalea, kata khă rig le čerurendi ji kai kolaver.

³²Kata o smoitino sîteon e pilda lesti: Kana ivandil thai luludearăl lesti ŕaiorî, jeanen kă o milai sî paše.

³³Sa kadea, i tume kana dikhăna sa kadala butea, te jeanen kă o Šeau le manušehko sî paše, sî orta kal udara.

³⁴Čeačes phenau tumengă, kă či nakhăla o neamo kadoa ji kana kărdeona pe sa kadala butea.

³⁵O čerii thai e phuw nakhăna, ta le divanuri Mîŕă či nakhăna.

³⁶Poa des kodoa thai poa čeaso kodoa, či jeanel khonikh: či le înjerii anda le čeruri, či o Šeau, ta dăsar o Dadd.

³⁷Sar kărdileas ande le des le Noiahkă, sakadea avela i koa avimos le Šeavehko le manušehko.

³⁸Ando čeačimos, sar sas ande le des anglal o baropai le brîšindehko, kana xanas thai penas, însurinaspe thai măritinaspe, ji ando des kai šutea pe o Noia ando bero,

³⁹thai či jeangline khanči, i kana avilo o baropai le brîšindehko thai lea le saorăn, sa kadea avela i koa avimos le Šeavehko le manušehko.

⁴⁰Atunčeara, anda dui murši kai avena po kîmpo, iekh avela lino thai aver meklino.

⁴¹Anda dui juwlea kai măčinina kai moara, iekh avela lini thai e kolaver mekli.

⁴²Ašen ando ajukărimos, anda kă či jeanen ande sao des avela o Rai tumaro.

⁴³Te jeanen kă, kana sahkă jeanel o stăpîno le khărăhko ka savi starja anda e reat avela o čior, sahkă ašel ando ajukărimos thai nahkă mekăl te phaŕavel lehko khăr.

⁴⁴Anda kodea, i tume aven gata; kă o Šeau le manušehko avela ando čeaso kai či dena tume godi.

⁴⁵Ta sao sî o robo pateaimahko thai xarano, saves thodea les o stăpîno lehko pa sa pehkă kanditorea, kaste delle xamos koa čiro muklino?

⁴⁶Baxtalo le robostar kodolestar, saves lehko stăpîno, ka lehko avimos, arakhăla les kărindoi kadea!

⁴⁷Čeačes phenau tumengă kă thola les pa sa pehkă mandimata.

⁴⁸Ta kana sî khă robo jungalo, kai phenel ande pehko illo: „Muŕo stăpîno či avel iekhatar!”

⁴⁹Kana lela te marăl pehkă jenen le kandimahkă, thai te xal thai te pel le matearnença,

⁵⁰o stăpîno le robohko kodolehko avela ando des kai o či ajukrăl pe, thai ando čeaso kai či jeaneles,

⁵¹šinela les ande donde, thai lesti rig avela e rig le athaitorendi; oče avela o roimos thai o danddalimos le danddengo.