Read Kalderash Romani Cornilescu Bible 2020 (Romania) Matei 27 Bible Online

Matei 27 - Kalderash Romani Cornilescu Bible 2020 (Romania) bible

Matei 27

¹Kana kărdilo des, sa le raša le mai bară thai le phură le nordohkă dine pe duma andoa Isus, sar te mudarăn Les.

²Pala so phangle Les, nigărde Les thai dine Les ando vast le guvernatorehko le Pilatohko andoa Ponto.

³Atunčeara o Iuda, o bitinditorii, kana dikhlea kă o Isus sas krisînime mullimahko, kăisai'lo, nigărdea parpale ăl treanda bišarea, deale ăl rašangă le mai bară thai le phurăngă,

⁴thai phendea: „Bezexardem, kă bitindem rat bidošalo. „So falamengă amengă?” phendine lehkă on. „Ti buti.”

⁵O Iuda šudea le bišarea ando Templo, thai gălo ta ambladea pe.

⁶Le rašea le mai bară tidine le bišarea, thai phende: „Nai mišto te thoas le ando mandimos le Templohko, anda kă sî potindimos ratehko.”

⁷Thai pala so dinepe duma, tindine le lovença kodolença „E phuw le phuwearăsti,” sar than andoa prahomos le străinengo.

⁸Dikta anda sosote e phuw kodea sas dini anau ji ando des dă adesara: „E phuw le ratesti.”

⁹Atunčera pherdilea so sas vestime anda o prooroko o Ieremia, kai phenel: „line le treanda bišarea, o potindimos kolehko le potindimahko, saves potindine les iekh anda le šeave le Israelohkă;

¹⁰thai dine le pe Phuw le phuwearăsti, pala sar mothodeasas o Rai.”

¹¹O Isus sas andino angloa guvernatorii. O guvernatorii pušlea Les: „San Tu o Thagar le Iudeiengo?” „E”, dea les anglal o Isus, „sîm.”

¹²Ta na dea anglal khanči ka o došalimos le raša le mai bară thai le phurăngo.

¹³Atunčeara o Pilat phendea Lehkă: „Či ašunes sode buteandar došaven tu on?”

¹⁴O Isus či dea les anglal či khă orba, kadea kă mirilas pe but dăsa o guvernatorii.

¹⁵Ande sako prazniko la Patradeako, o guvernatorii sas les o năravo te mekăl avri le norodohkă khă phandades, sao kamenas les on.

¹⁶Atunčeara sas le khă phandado but prinjeando, kai bušolas Baraba.

¹⁷Kana sas tidine andekhthan, o Pilat phendea lengă: „Saven kamen te dau les avri? Le Barabas or le Isusos, kai bušol Kristoso?”

¹⁸Kă jeanelas kă bidošako dinesas le Isusos ande lehkă vast.

¹⁹Sar bešelas o Pilat pe pehko skamin la krisako, lesti romni trdea te phenen lehkă: „Te na avel tu khanči kărimasa le bibezexalesa kadalesa; kă ades mudardilem but ando suno anda leste.”

²⁰Le raša le mai bară thai le phură dine duma le noroadença te mangăn le Barabas, ta le Isusos te mudarăn Les.

²¹O dregătorii lea o divano, thai phendea: Saves anda lidui kamen te dau les tumengă avri?” „Le Barabas”, dine anglal on.

²²O Pilat phendea lengă: „Ta so te kărau le Isusosa, kai bušol o Kristoso?” „Te avel mardo po trušul!”

²³O guvernatorii phendea lengă: „Ta so nasul kărdea?” On line te çîpin i mai zurales „Te avel mardo po trušul!”

²⁴Kana dikhlea o Pilat kă či arăsăl khanči, thai kărdeol pe mai but mui, lea pai, thai xaladea pehkă vast angloa norodo, thai phendea: „Me sîm bidošako andoa rat le bibezehalehko kadalehko. E buti tumari!”

²⁵Thai soa norodo dea anglal: „O rat Lehko te avel pa amende thai pa amară šeave.”

²⁶Atunčeara o Pilat dea lengă drom le Barabas; ta le Isusos, pala so thodea te marăn Les le ŕaiança, dea Les ande lengă vast, kaste avel mardo po trušul.

²⁷Le kătanea le guvernatorehkă nigărde le Isusos ando pretorio, thai tidine angla Leste sa e čeata le kătănendi.

²⁸Nandearde Les lehkă çoalendar, thai xureade Les kha raxameasa lolleasa.

²⁹Akhuvde khă kununa andal kanŕă, savi thode Lehkăla po šero, thai thodine Lehkă khă trestia ando vast o čeačio. Pala kodea denas čeanga angla Leste marănas pehkă khălimos Lestar, thai phenenas: „Mekasame anagla tute, Thagarina le Iudeuengo!”

³⁰Thai čiungardenas pe Leste, thai lenas e trăstia thai marănas Les ando šero.

³¹Pala so marde pehkă khălimos Lestar, nandearde Les la raxameatar la lolleatar, thai xureadine Les Pehkă çoalença, thai nigărde Les te marăn Les po trušul.

³²Kana anklenas avri anda e četatea, arakhline khă manuši andal Čirene kai bušolas Simon, thai thodine les zorasa te nigrăl o trušul le Isusohko.

³³Kana arăsle andekh than kai bušolas Golgota, kai fal: „O than le šerăhko”,

³⁴Dine Les te pel moll xamime fieareasa; ta, kana zumadea či kamblea te pel.

³⁵Pala so marde Les po trušul, xulade Lerhkă çoale maškar lende, çîrdindoi kai bax, anda kaste pherdeolpe so sas vestime andao prooroko, kai phenel: „Xulade pehkă Mîŕă çoale maškar lende, thai anda Muŕo gad çîrdine koa bax.”

³⁶Pala kodea bešle tele, thai arakhăna Les.

³⁷Thai ramosarde Lehkă opral poa šero e doši: Kadoa sî o Isus, o Thagar le Iudeiengo.”

³⁸Andekhthan Lesa, sas mardine po trušul i dui čior: iekh ande čeačirig thai o kolaver ande bičečirig Lesti.

³⁹Le nakhaitorea prasana Les thai denas andoa šero,

⁴⁰thai phenenas: „Tu, kai peraves o Templo, thai vazdes les ando than ande trin des, skăpisar Tu Tut akana! Kana san o Šeau le Devllehko, uli tele poa trušul!”

⁴¹Le rašea le mai bară, andekhthan le zakunarença thai le phurănça, prasana Les, thai phenenas:

⁴²„Avrăn skăpisardea le ta Pes našti skăpilpe! Kana să o Thagar le Israelohko, te ulel akana poa trušul, thai pateasa ande Leste!

⁴³Pateaiape ando Dell: te skăpil Les akana o Dell, kana kamel Les! Kă phendea: „Me sîm o Šeau le Devllehko!”

⁴⁴Le čior kai sas mardine po trušul andekhthan Lesa, šudenas Lehkă sa kodola divanuri prasaimatahkă.

⁴⁵Kata o čeaso le šovengo ji koa čeaso le îniango kărdilo khă tuneriko pa soa čem.

⁴⁶Thai koa čeaso le îniango, O Isus çîpisardea muiesa zurales: „Eli, Eli, Lama Sabaktani?” avela: „Devlla Muŕo, Devla Muro, anda soste meklean Ma?”

⁴⁷Unii anda kukola kai bešenas oče, kana ašundine kadala orbe, phendine: „„Del mui po Ilia!”

⁴⁸Thai andakhdata, iekh anda lende prastaia ta lea khă bureto, kovleardea les šutesa, thodea les ande khă trestia, thai dea Les te pel,

⁴⁹Ta le kolaver phenenas: „Mekh, te dikas te avela o Ilia te skăpil Les.”

⁵⁰O Isus çîpisardea pale le muiesa zurales, thai dea Pehko duxo.

⁵¹Thai andakhdata o poxtan andoa Templo šindi'lo ande donde, dă opral ji tele e phuw isdraia, le kotora le baŕăbarăhkă pîtărdile,

⁵²le mormînturi pîtărdile thai but staturi le sfinçăngă kai mullesas, uštile.

⁵³On ankăste anda le gropi, pala Lehko juvindimos, šute pe ande sfînto četatea, thai sîkadile butengă.

⁵⁴O sutašo, thai kukola kai arakhănas le Isusos andekthan lesa, kana dikhline o isdraimos la phuweako thai kukola so kărdile, daraile but zurales, thai phendine: „Čeačimasa kadoa sas o Šeau le Devllehko!”

⁵⁵Oče sas i but juwlea, kai dikhănas dă dural; on avileasa pala o Isus anda e Galilea, kaste kanden Lehkă.

⁵⁶Maškar lende sas e Maria Magdalina, e Maria, e dei le Iakovosti thai le Iosesti, thai e dei le šeavendi le Zebedeiohkă.

⁵⁷Karing e reat, avilo khă manuši bravalo anda e Arimatea, kai bušolas Iosif, sao sas i o jeno le Isusohko.

⁵⁸O gălo koa Pilato, thai manglea o stato le Isusohko. O Pilat mothodea te den lehkă les.

⁵⁹O Iosif lea o stato, pateardeales andekh poxtan neo inohko,

⁶⁰thai thodeales andekh mormînto neo orta lehko, kai xunadeasas les ando kotorlebaŕăbarăhko. Pala kodea spidea khă bar baro koa udar le mormîntohko thai gălotar.

⁶¹E Maria Magdalina thai e kolaver Maria sas oče, thai bešenas angloa mormînto.

⁶²O duito des kai avel pala o des le Lašarimahko, le rašea le mai bară thai le Fariseia, găline andekhthan koa Pilato,

⁶³thai phende lehkă: „Raia, andeam amengă godi kă o athaitorii kodoa, kana sas ande čivava, phendea: „Pala trin des ušteaua.”

⁶⁴Ta motho koa mormînto te avel arakhado mišto ji ando trito des, ka na varesar te aven le jene Lehkă reate te čiorăn Lehko stato, thai te phenen le norodohkă: „Ušti'lo andal mulle!” Atunčeara o arthaimos kadoa mai palal sahkă avel mai nasul sar kukoa dă anglal.”

⁶⁵O Pilat phendea lengă: „Sî tume khă straja; jean ta arakhăn sar daštin.”

⁶⁶On găletar, thai zurearde o mormînto, pečetluisardindoi o bar thai thodindoi straja.”