Read Kalderash Romani Cornilescu Bible 2020 (Romania) Matei 3 Bible Online

Matei 3 - Kalderash Romani Cornilescu Bible 2020 (Romania) bible

Matei 3

¹Ando čiro kodoa avilo o Ioan o Bolditori, thai delasduma ande pustia la Iudeati.

²O phenelas: „Kăin tume, kă o Thagarimos le čerehko sî paše.”

³O Ioano kadoa sî kukoa kai sas phendino le proorokostar Isaia, kana phel: „Dikta o mui kolehko kai çîpil ande pustia: „Lašearăn o drom le Raiehko, Orton Lehkă dromora.”

⁴O Ioan phiravelas khă raxami anda le ball la kămilakă, thai po maškar sas phanglo khă brăčinaresa aravleako. O xalas grastorăčeareakă thai avdin văšuni.

⁵Le manuši andoa Ierusalimo, anda sa e Iudea thai anda sa le riga le Iordanohkă, line te anklen leste;

⁶thai, phendindoi pehkă bezexa, sas bolde lestar ando nanilaš o Iordano.

⁷Ta kana dikhlea buten anda le Fariseia thai le Saducheia kă aven te len lehko boldimos, phendea lengă: „Viça sapendi, kon sîkadea tume te našen la xoleatar kai avela?

⁸Kărăn roduri pateaimahkă tumară kăimaskă.

⁹Thai te na patean kă dašti phenen ande tumende: „Same sar dadd le Aavraamos!” Kă phenau tumengă kă o Dell anda le baŕ kadala dašti te vazdel šeave le Avraamohkăn.

¹⁰Dikta kă o tover i sas šutino koa angluno le kaštengo: ta, orsao kašt kai na kărăl rodo lašo, avela šindo thai šudino ande iag.

¹¹Sode pa mande, me bolau tume paiesa, karing o kăimos; ta Kukoa kai avel pala mande, sî mai zuralo sar mande, thai me či sîm vreniko te nigrau Lehkă papučea. O bolela tume Sfîntone Duxosa thai iagasa.

¹²Kodoa Sî les e lopata ando vast, lašearăla Pehka buteasa e phuw, thai tidela Pehko div ando divari; ta e poši phabarăla la ande khă iag kai či merălla.”

¹³Atunčeara avilo o Isus anda e Galilea koa Iordano, koa Ioano, kaste avel boldo lestar.

¹⁴Ta o Ioan rodelas te atărdearăl les. „Me”, phenelas o,” trăbul te avau boldo Tutar, thai Tu aves mande?”

¹⁵Čečio phendimos, o Isus phendea lehkă: „Mekh Ma akana, kă kadea trăbul te kăras sa so trăbul pherdino.” Atunčeara o Ioano muklea Les.

¹⁶Iekhatar so sas boldo, o Isus ankăsto avri andoa pai. Thai ande kodea leaka le čeruri pîtărdi'le, thai dikhlea o Duxo le Devllehko ulindoi ando stato khă gulumbohko thai avindoi pa Leste.

¹⁷Thai anda le čeruri ašundi'lo khă mui kai phenelas: „Koadoa sî Muŕo Šeau but kuči, ande sao arakhau Sa muŕo kamblimos.”