Read Kalderash Romani Cornilescu Bible 2020 (Romania) Matei 5 Bible Online

Matei 5 - Kalderash Romani Cornilescu Bible 2020 (Romania) bible

Matei 5

¹Kana dikhlea o Isus le manušen, ankăsto po baŕobaro; thai pala so ašilo tele, le jene Lehkă pašile paša Leste.

²Pala kodea lea te del duma thai te sîkavele kadea:

³Baxtale kolendar čioŕă ando duxo, kă lengo sî o Thagarimos le čerurengio!

⁴Baxtale kolendar kai roven, kă on avena line andeangali!

⁵Baxtale kolendar le kovlendar, kă lendi avelale e phuw!

⁶Baxtale kolendar bokhale thai trušale pala o bibezexalimos, kă on avena čeailearde!

⁷Baxtale kolendar kai miluin, kă len avela le rig milatar!

⁸Baxtale kolendar le illesa ujo, kă on dikhăna le Devlles!

⁹Baxtale kolendar kai împătisarăn, kă on avena akharde šeave le Devllehkă!

¹⁰Baxtale kolendar kai avena našade anda e doši le bibezexalimasti, kă lengo sî o Thagarimos le čerurengo!

¹¹Baxtalimos avela tumendar kana, anda Mîŕî doši, le manuši dena tume armaia, našavena tume, thai phenena sako butea jungale thai bičeače pa tumende!

¹²Bukurin tume thai vesălin tume, anda kă tumaro potindimos sî baro ande le čeruri; kă sa kadea našadine le prooročen, kai sas mai anglal tumendar.

¹³Tume san o lon la phuweako. Ta kana o lon xasarăl pehko gusto, anda soste lela pehkă pale e zor te londearăl? Atunčeara manai lašo khančesko ta te avel šudino avri, thai linčeardo andel pînŕă le manušendar.

¹⁴Tume san e duda la lumeati. Khă četatea thodii pe khă baŕbaro, našti te ašel garadi.

¹⁵Thai le manuši či astarăn e duda kaste thon la tala e balai, ta thon la ando sfešniko, thai dudearăl saorăngo kolengo andoa khăr.

¹⁶Sa kadea te străfeal i tumari duda angla le manuši, ta on te dikhăn tumară laše kărdimata, thai te lăudin le Daddes tumarăs, kai sî andel čeruri.

¹⁷Te na patean kă avilem te čioŕarau e Kris or le Proročimata; avilem na te čioŕarau, ta te pherau la.

¹⁸Kă čeačimasa phenau tumengă, sode čiro či nakhăla o čeri thai phuw, či nakhăla či khă divano or khă phadimos literako anda e Kris, anglal te kărdeona sa le butea.

¹⁹Kadea kă, or kon čioŕarăla iekh anda kukola le mai çînora anda kadala mothodimata, thai sîkavela le manušen kadea, avela akhardo o mai çînoro anda o Thagarimos le čerurengo; ta orkon arakhălale, thai sîkavela avrăn te arakhăn le, avela akhardo baro ando Thagarimos le čerurengo.

²⁰Kă phenau tumengă kă, kana tumaro bibezexalimos či nakhavela o bibezexalimos le sîkaditorengo thai le Farisengo, či khă statosa našti šona tume ando Thagarimos le čerurengo.

²¹Ašundean kă phendea pe kolengă ando puraimos: „Te na mudarăs; orkon mudarălla, perăla tala doši le krisînimasti.”

²²Ta me phenau tumengă kă orkon xoleaol pe pehko phral, perăla tala e doši le krisînimasti; thai orkon phenela pehkă phralehkă: „Dilea!” perăla tala e doši le Staborosti; ta orkon phenela lehkă „Čealadeaona!” perăla tala e doši la iagati le merimasti.

²³Kadea kă, kana nigrăs ti pativ koa altari, thai oče anes tukă godi kă teo phral sî les vareso tusa,

²⁴mekh ti pativ oče angloa altari, thai jea mai anglal ta împătisao te phralesa; pala kodea av ta an ti pativ.

²⁵Rode ta împătisao iekhatar te pîrîtoresa, sode čiro san lesa po drom; ta na varesar teo pîrîtori te del tu po vast le krisînitorehko, o krisînitori te del tu po vast le phanditorehko, te šudel tu ande robia.

²⁶Čeačimasa phenau tukă kă či anklesa oçal ji kana či potinesa o mai palal bišariç.

²⁷Ašundean kă phendea pe kolengă ando puraimos: „Te na preakurvis.”

²⁸Ta Me phenau tumengă kă i or kon dikhăl ka khă juvli, te del dii late, i preakurvisardea lasa ande pehko illo.

²⁹Kana kadea ti iakh e čeači kărăl tu te perăs ando bezex ankalavla avri thai šudela tutar; kă sî karing teo mištimos te xasaol iekh anda te kotoriça thai te na avel šudino sa teo stato ande iag le merimasti.

³⁰Kana teo vast o čeačio kărăl tu te perăs ando bezex, šin les thai šude les tutar; kă sî anda tute mai mišto te xasaol iekh anda te kotoriça, dă sar te šudel pe sa teo stato ande iag le merimasti.

³¹Phendea pe pale: „Orkon mekăla pehka romnea, te dela khă lill meklimahko.”

³²Ta Me phenau tumengă kă or kon mekăla pehka romnea, avri numai anda e doši la kurviati, del la zor te arăsăl te preakurvil; thai kon lela la dă romni kola mekli le romestar, preakurvil.

³³Ašundean pale kă phendea pe kolengă andoa puraimos: „Te na solaxas bangăs; ta te pherăs angloa Rai le solaxaimata tiră.”

³⁴Ta Me phenau tumengă: Te na solaxan čidăsar; či po čeri kă sî o skamin le raimahko le Devllehko;

³⁵či pe phuw, anda kă sî than le pînŕăngo Lehko; či po Ierusalimo, kă si e četatea e mai bari le Thagaresti.

³⁶Te na solaxas či pe teo šero, kă našti te kărăs khă firo ball parno or kalo.

³⁷Tumaro dimos duma te avel: „E, e; či, či”; so nakhăl pa kadala divanuri, avel kata kukoa o nasul.

³⁸Acuundean kă phendea pe: „Iakh anda iakhate, thai dandd anda danddeste.”

³⁹Ta Me phenau tumengă: Te na len tume kukolesa kai kărăl tumengă nasul. Ta, orkon malavel tu pa e buka e čeači, amboldenlehkă i e kolaver.

⁴⁰Orkon kamel te krisînil pe tusa, thai te lel i ti raxami, mekh lehkă i o gad.

⁴¹Kana zumavela tu varekon te jeas lesa khă tilometro, jea lesa dui.

⁴²Kolehkă kai mangăl tukă, de les; thai na ambolde le zăia kolehkă kai kamel te lel unjile tutar.

⁴³Ašundean kă phendea pe: „Te kames te pašes, thai te na dabadikhăs te dušmanos.”

⁴⁴Ta Me phenau tumengă: kamen tumară dušmaien, dendumadămišto kolen kai den tume armaia, kărăn mišto kolengă kai čidabadikhăn tume, thai rudin tume anda kukola kai marăn tume thai kai našaven tume,

⁴⁵kaste aven le šeave tumară Daddehkă kai sî andel čeruri; kă O kărăl te anklel o kham Lehko i pal nasul i pal laše, thai del brîšind i pal čeače i pal bičeače.

⁴⁶Kana kamen numai kukolen kai kamen tume, so potindimos mai ajukărăn? Či kărăn kadea i le bibolde?

⁴⁷Thai kana denangli kamblimasa numai tumară phralen, so buti biašundi kărăn? Ta kola kai či patean na kărăn kadea?

⁴⁸Tume aven bidošako, pala sar o Dadd tumaro andoa čeri sî bidošako.