Read Kalderash Romani Cornilescu Bible 2020 (Romania) Marko 13 Bible Online

Marko 13 - Kalderash Romani Cornilescu Bible 2020 (Romania) bible

Marko 13

¹Kana ankăsto o Isus andoa Templo, iekh anda Lehkă jene phendea lehkă: „Sîkaitorina, dikta so baŕ thai sar sî vazdine!”

²O Isus dea les anglal: „Dikhăs tu kadala bară vazdimata? Či ašela koče baŕ pe baŕăste, te na avel perado.”

³Pala kodea bešlo po baŕbaro le Tetinengo angloa Templo. Thai o Petro, o Iakovo, o Ioano thai o Andrei, pušle Les rigate:

⁴„Phen amengă kana avena sa kadala butea, thai sao avela o sămno kana kărdeona pe sa kadala butea?”

⁵O Isus lea atunčeara te mothol lengă: „Len mišto sama te na athavel tume varekon.

⁶Anda kă avena but ande Muŕo Anau, thai phenena: „Me sîm o Kristoso!” Thai athavena buten.

⁷Kana ašunena pal mardimata thai vestiuri pal mardimata, te na dran, kă kadala butea trăbun te kărdeon pe. Ta dăsar či avela o isprăvimos.

⁸Khă neamo uštela pa aver neamo, thai khă thagarimos pa aver thagarimos; pelthana avena isdraimata phuweakă, bokh thai biujimata. Kadala butea avena o anglaimos le dukhăngo.

⁹Len sama orta tumende. Sî te den tume po vast le tidimatăngo le krisăngo, thai avena marde andel khăngărea; andai doši Mîŕî avena nigărde anglal guvernatorea thai anglal thagarimata, anda te kandenle sar phendimahko.

¹⁰Mai anglal trăbul ka e LašiVestea te avel diniduma sa le neamurengă.

¹¹Kana nigărăna tume te den tume ande lengă vast, te na îngîndurin tume mai anglal dičimasa so dena duma, ta te den duma so dela pe tumengă te den duma ando čeaso kodoa, kă na tume dena duma, ta o sfînto Duxo.

¹²O phral dela koa mullimos pehkă phrales, thai o dadd pehkă šaves; le šave uštena pa pehkă dadda, thai mudarăna le.

¹³Sî te aven bidikhline saoŕăndar anda Muŕo Anau; ta kon răbdila ji koa gor, avela skăpi me.

¹⁴Kana avela te dikhăn „e pîngania le pustiimasti” bešlindoi oče kai či trăbul te avel, — kon drabarăl te atearăl — atunči kola kai avena ande Iudea, te našen andel baŕbară.

¹⁵Kon avela opră po khăr, te na mai ulel, te šol pe ando khăr, te lel pehkă vareso anda leste.

¹⁶Kon avela po kîmpo, te na mai amboldel pe parpale kaste lel pesti raxami.

¹⁷Au anda le juwlea kai avena pharea, thai anda kukola kai dena čiuči ande le des kodola!

¹⁸Rudin tume ta kadala butea te na kărdeon pe iwende.

¹⁹Anda kă ande le des kodola avela khă năkazo kadea dă baro, sar či sas dă kana kărdili e lumea, kai kărdea la o Dell, ji adesara, thai čina či mai avela vokhdata.

²⁰Thai kana nahkă çîknearăl o Rai le des kodola, khonikh či skăpila; ta çîkneardea le anda e doši kolengo le alosardengo.

²¹Te phenela tumengă varekon atunčea: „Dikta, o Kristoso sî koče” or: „Dikta, Lo kote”, te na patean les.

²²Kă uštena but Kristošea xoxamne thai proročea xoxamne. On kărăna sămnuri thai minunea, kaste athaven, te avela daštimasa, i kukolen le alosarden.

²³Arakhăn tume; dikta kă phendem tumengă le mai dă anglal.

²⁴Ta, ande le des kodola, pala o năkazo kadoa, o kham kaleola, o šonuto či mai străfeala pehko luminimos,

²⁵le čeraia perăna andoa čeri, thai le zora kai sî andel čeruri avena mištisarde.

²⁶Atunči dičiola pe o Šeau le manušehko avindoi pel norea barea zorasa thai slavasa.

²⁷Atunčeara tradela Pehkă înjeren, thai tidela kolen le alosarden anda le kola štar bravallea, katoa gor la phuweako ji kai rig le čeresti.

²⁸Len sîkaimos kata o smoitino anda lesti pilda. Kana e ŕaiorî lesti iwandil thai împătril, jeanen kă o milai sî paše.

²⁹Sa kadea, kana dikhăna kadala butea kă kărdeona pe, te jeanen kă o Šeau le manušehko sî paše, sî orta kal udara.

³⁰Čeačes phenau tumengă, kă či nakhăla o neamo kadoa ji kana pherdeona sa kadala butea.

³¹O čeri thai e phuw nakhăna, ta le divanuri Mîŕă či nakhăna.

³²Sode poa des kodoa, or o čeaso kodoa, či jeanel khonikh, či le înjerea andoa čeri, či o Šeau, ta dăsar o Dadd.

³³Len sama, bešen ušteade thai rudin tume; kă či jeanen kana avela o čiro kodoa.

³⁴Kărdeola pe sar i khă manušeasa kai teleardea ande aver čem, kai mekăl pehko khăr, del le roben lehkărăn zor, sikavel saoŕăhkă sao sî lehko unjilimos te kărăl, thai mothol le udarehkă te lel sama.

³⁵Ta bešen ušteade, anda kă či jeanen kana avela o stăpîno le khărăhko: or reate, or koa maškar la reateako, or koa dilabaimos le bašnengo, or dădroboitu.

³⁶Daran, ta na varesar, avindoi bi vesteako, te arakhăl tume soindoi.

³⁷So phenau tumengă, phenau saoŕăngă: Bešen ušteade!”