Read Kalderash Romani Cornilescu Bible 2020 (Romania) Marko 15 Bible Online

Marko 15 - Kalderash Romani Cornilescu Bible 2020 (Romania) bible

Marko 15

¹Dădroboitu, le raša le mai bară kărdine iekhatar kris dine pe duma le phurănça, le zakonurença thai sa le Staborosa. Pala so thodine ta phangle le Isusos, nigărde Les, thai dine Les andel vast le Pilatohkă.

²O Pilato pušlea Les: „San Tu o Thagar le Jidaiengo?” „E, sîm”, dea les anglal o Isus.

³Le raša le mai bară došavenas Les anda mai but butea.

⁴O Pilato phšlea Les pale: „Či des khanči anglal? Dikta anda sode butea došrăn Tu on!”

⁵O Isus či mai phendea lehkă khanči, buti kai mirisardea le Pilatos.

⁶Ande sako prazniko la Patradeako, o Pilat delas lengă drom po khă phandado, kai mangănas les on.

⁷Ando beči sas atučeara iekh kai bušolas Baraba, phandado andekhthan pehkă manušença, anda e doši khă mudardimasti, kai kărdinesas les ande khă răskoala.

⁸O norodo ankăsto, thai lea te mangăl katoa Pilato so sas les o năravo te dele orkana.

⁹O Pilato dea le anglal: „Kamen te dau tumengă drom le Thagares le Jidaiengo?”

¹⁰Kă ateardeasas kă le raša le mai bară andai xolli dinesas Les ande lehkă vast.

¹¹Ta le raša le mai bară vazdine o norodo te mangăn kata o Pilato te den lengă drom mai mišto le Barabas.

¹²O Pilato lea pale o divano, thai phendea lengă: „Ta so kamen te kărau Kukolesa kai phenen Lehkă o Thagar le Jidaiengo?”

¹³On çîpisarde pale: „Karfosar Les po trušul!”

¹⁴„Ta so nasul kărdea?” phendea lengă o Pilato. Ta on line pale te çîpin i mai zurales: „Karfosar Les po trušul!”

¹⁵O Pilato kamblea te kărăl po čeilimos le norodohko, thai dea drom le Barabas; ta le Isusos, pala so thodea te marăl Les ŕaiança, dea Les te avel karfome po trušul.

¹⁶Le kătane nigărdine le Isusos ande bar, oče ando palato, thai tidine sai čeata le kătanendi.

¹⁷Xureade Les ande khă raxami lolli, akhuvde khă kununa anda le kanŕă, thai thode Lehkă la po šero.

¹⁸Pala kodea line te phenen Lehkă: „Mekasametele, Thagar le Iudeiengo!”

¹⁹Thai malavenas Les ando šero kha trăstiasa, čiungardenas Les, denasčeanga thai rudinas pe Lehkă.

²⁰Pala so asaine pehkă kadea Lestar, nandearde Les la raxameatar la lolleatar, thai xureadeles Lehkă çoalença, thai nigărde Les te marăn Les po trušul.

²¹Thodine la zorasa te nigrăl o trušul le Isusohko khă manušes kai nakhălas po drom, kai bušolas Simon andai Čirena, o dadd le Alexandroko thai le Rufohko.

²²Thai andine le Isusos koa than kai bušolas Golgota, kai, amboldino sî phendino „O than le šerăhko.”

²³Dine Les te pel moll xamime smirnasa, ta o či lea la.

²⁴Pala so karfosarde Les po trušul, xulade Lehkă çoale maškar lende, çîrdindoi kai bax, kaste jeanen so te lel orsao.

²⁵Kana karfosarde Les po trušul, sas o čeaso kal trin.

²⁶Opral pa Leste sas ramome Lesti doši: „O Thagar le Iudeieniengo.”

²⁷Andekhthan Lesa mai sas mardine po trušul dui mudarditorea, iekh ande čeči thai o kolaver ande bičeči Lesti.

²⁸Kadea pherdilo o LillleDevlehko, kai phenel: „Sas thodino ando dindimos kolengo bikrisako.”

²⁹Kola kai nakhănas poa drom asanas pehkă Lestar, denas andoa šero, thai phenenas: „Uă, Tu, kai rimos o Templo, thai vazdes les pale ande trin des,

³⁰skăpisar Tu Tut akana, thai uli poa trušul!”

³¹Sa kadea i le raša le mai bară, andekhthan le zakonarença prasanas Les maškar lende, thai phenenas: „Avrăn skăpisardea le, thai orta Pes nasštil te skăpil Pe!

³²O Kristoso, o Thagar le Israelohko, te ulel akana poa trušul, kaste dikhas thai te pateas!” Kola le mardine po trušul andekhthan Lesa, sa kadea asanas pehkă Lestar.

³³Koa čeaso le šovengo kărdi'lo tuneriko pa soa čem, ji koa čeaso le îniango.

³⁴Thai ando čeaso le îniango, o Isus çîpisardea muiesa zuralesa: „Eloi, Eloi, lama sabactani” kai, paruglino, sî: „O Dell Muŕo, o Dell Muŕo, sostar meklean Ma?”

³⁵Iekh anda kukola kai bešenas oče, kana ašunde Les, phenenas: „Dikta, akharăl le Ilias!”

³⁶Thai iekh anda lende prastaiata boldea khă burteto ando šut, pusadea les ande khă papura, thai dea Lehkă les te pel, phendindoi: „Mekăn te dikhas te avela o Ilia te ulearăl Les poa trušul!”

³⁷Ta o Isus ankaladea khă çîimos baro, thai dea Pehko duxo.

³⁸O pohtan andral o Templo šindilo ande donde dă opral ji tele.

³⁹O sutašo, kai bešelas angloa Isus, kana dikhlea kă dea Pehko duxo kadea, phendeas: „Le čeačimasa, o manuši kadoa sas o Šeau le Devllehko!”

⁴⁰Oče sas i varesar juwlea, kai dikănas dă dural. Maškar lende sas i e Maria Magdalina, e Maria, e dei le Iakovosti o mai çîkno thai le Iosesti, thai e Salome,

⁴¹kai, ta kana sas O ande Galilea, jeanas pala Leste thai kandenas Les: thai but aver juwlea, kai avilesas andekhthan Lesa ando Ierusalimo.

⁴²Kana muklea pe e reat — anda kă sas o des le Lašardimahko, sar, o des angloa Savato,

⁴³avilo o Iosif andai Arimatea, khă krisînitorii pativasa ando rašaimos, kai i o ajukărălas o Thagarimos le Devllehko. O zuralimasa gălo koa Pilato te mangăl o stato le Isusohko.

⁴⁴O Pilat mirisai'lo kă mullosas kadea iekhatar; akhardea le sutašes thai pušlea les kana mullo dămult.

⁴⁵Pala so phendea lehkă o sutašo kă mullo, dea le Iosifos o stato.

⁴⁶Thai o Iosif tindea khă poxtan inohko sano, dea tele le Isusos poa trušul, pateardea Les ando poxtan le inohko, thai thodea Les ande khă mormînto xunado ando kotor le baŕăbarăhko. Pala kodea spidea khă baŕ baro koa udar le mormîntohko.

⁴⁷E Maria Magdalina thai e Maria, e dei le Iosesti, dikhănas kai thon Les.