Read Kalderash Romani Cornilescu Bible 2020 (Romania) Marko 16 Bible Online

Marko 16 - Kalderash Romani Cornilescu Bible 2020 (Romania) bible

Marko 16

¹Pala so nakhlea o des le Savatohko, e Maria Magdalina, e Maria e dei le Iakovosti thai le Iosesti, e Salome, tindine miresme, kaste jean te makhăn o stato le Isusohko.

²Ando des anglal le kurkăhko, găline koa mormînto kana pharadilo o des, ta kana anklelas o kham.

³Le juwlea phenenas iekh avreakă: „Kon spidela o baŕ kata o udar le mormîntohko?”

⁴Thai kana vazdine pehkă iakha, dikhline kă o baŕ, kai sas but baro, sas dino rigate.

⁵Šute pe ando mormînto, thai dikhline khă tărnoŕăs bešlindoi ande čeačirig, xureado ande le çoale parne, thai lea le e dar.

⁶O phendea lengă: „Na daran! Roden le Isusos andoa Nazareto, kai sas karfome po trušul: uštilo manai koče; dikta o than kai thodinesas les.”

⁷Ta jean ta phenen Lehkă jenengă, thai le Petrohkă, kă jeal angla tumende ande Galilea. Oče dikhăna Les, sar phendea tumengă.”

⁸On ankăstine avri andoa mormînto, thai linela te našen, anda kă sas astardine khă isdaimastar thai daratar. Thai či mothodine khanikahkă khanči, kă daranas.

⁹(O Isus pala so juvindisardea, ando des anglal le kurkăhko, sîkadi'lo mai anglal kai Maria Magdalina, anda savi ankaladeasas efta beng.

¹⁰Oi găli thai dea nigărdea e vestea saoŕăngă kolengă kai sas andekhthan Lesa, kai rovenas thai vatinas pe.

¹¹Kana ašundine on kă sî juvindo thai kă sas dikhlino latar, či pateaine la.

¹²Pala kodea, sîkadi'lo, ande aver tipo, dongă anda lende, po drom, kana jeanas ando gau.

¹³Kadala găline thai phendine e buti kadea le kolavrăngă, ta či len či pateanas le.

¹⁴Mai palal, sîkadi'lo, kolengă dešuiekhăngă, kai bešenas kai skafidi; thai xolei'lo pe lende anda lengo bipateaimos thai andoa illo lengo o baruno, anda kă či pateaine kolen kai dikle Les kă juvindisardea.

¹⁵Pala kodea phendea lengă: „Jean ande sai lumea thai denduma e LašiVestea ka orsavo manuši.

¹⁶Kon pateala thai boldeola, avela skăpime; ta kon či pateala avela došaldo.

¹⁷Dikta le sămnuri kai avena kolen kai pateana: ando Anau Muŕo ankalavena beng; dena duma ande neve šiba;

¹⁸lena ando vast sap, kana pena vareso mullimahko, či kărăla lengă nasul; thona pehkă vast pa le nasfale, thai le nasfale sasteona.”

¹⁹O Rai o Isus pala so dea duma lença, vazdinisai'lo ando čeri, thai bešlo ande čeačirig le Devllesti.

²⁰Ta on telearde thai dineduma orkaigodi. O Rai kărălas buti andekhthan lença, thai zurearălas o Divano anda le sămnurea, kai kărdeonas. Amin.)