Read Kalderash Romani Cornilescu Bible 2020 (Romania) Marko 3 Bible Online

Marko 3 - Kalderash Romani Cornilescu Bible 2020 (Romania) bible

Marko 3

¹O Isus šutea pe pale nade khăngări. Oče sas khă manuši le vastesa šuko.

²On arakhănas le Isusos te dikhăn te dikhăn Les te sastearăla ando des le Savatohko, kaste daštin te došarăn Les.

³Thai o Isus phendea le manušehkă, kai sas les o vast šuko: „Ušti thai beši ando maškar!”

⁴Pala kodea phendea lengă: „Sî meklino ando des le Savatohko te kărăs mišto or te kărăs nasul? Te skăpis e čivava varekasti or te xasarăsla? Ta on ašenas.

⁵Atunčeara, dikhlindoi xoleasa pa saoŕă, thai xoleariko andoa illo le baŕăhko lengo, phendea le manušehkă: „Tinzosat teo vast!” thai o tinzosardea les, thai o vast kărdi'lo lehkă sastevesto.

⁶Le Fariseia ankăste avri, thai dine pe duma andakhdata le Irodianença sar te xasarăn Les.

⁷O Isus gălo Pehkă jenença kai marea. Pala Leste gălo khă baro butimos manušengo andai Galilea; thai khă baro butimos manušengo andai Iudea,

⁸andoa Ierusalimo, andai Idumea, dă înteal o Iordano, thai andal riga le Tirohkă thai le Sidonohkă, kana ašundea sa so kărlas, avile Leste.

⁹O Isus phendea le jenengă te nikrăn Lehkă khă beruço kaste aveles, kaste na avel tidino le norodostar.

¹⁰Kă O sastearălas buten thai anda kodea saoră kai sas le nasfalimata, tidenaspe karing Leste kaste azbadeon Lestar.

¹¹Le duxurea le biuje, kana dikhănas Les, perănas pe phuw angla Leste, thai çîpinas: „Tu san o Šeau le Devllehko.”

¹²Ta O motholas iekhatar andasai zor te na kărăn Les prinjeando.

¹³Pala kodea, o Isus ankăsto po baŕbaro; akhardea Peste kas kambleas, thai on avile Leste.

¹⁴Lea anda lende dešudui, kaste aveles Pesa, thai te tradel le te denduma.

¹⁵Dea le i zor te sastearăn le nasfalimata thai te ankalaven le bengăn.

¹⁶Dikta kukola le dešudui, kai alosardea le: o Simon, kai thodea lehkă anau Petro;

¹⁷o Iakov, o šeau le Zebedeuiehko, thai o Ioano, o phral le Iakovohko, savengă thodea lengă anau Boanerghes, kaiamboldino, kai sî: „Le šeave le trăsnetohkă;”

¹⁸o Andrei; o Filip; O Bartolomeo; o Matei; o Toma; o Iakovo, o šeau le Alfeohko, o Tadeu; o Simon Kananito,

¹⁹thai o Iudao Iskaroioteano, kai i bitindea Les.

²⁰Avile ando khăr, thai tidea pe pale soa norodo, kadea kă naštisarănas či te xan.

²¹Le neamuri le Isusohkă, kana ašundine kola kai kărdeonas, avile te thon o vast pe Leste. Kă phenenas: „Ankăsto pehkă andi godi.”

²²Thai le zakonarea, kai ulenas andoa Ierusalimo, phenenas: „Sî stăpînime le Belzebusostar; ankalavel le beng le kandimasa le raiehko le bengăngo.”

²³O Isus akhardea le Peste, thai phendea lengă, andel pilde: „Sar daštil o Beng te ankalavel avri le Bengăs?

²⁴Kana khă thagarimos sî phardado orta anda leste, o thagarimos kodoa našti te nikărdeol.

²⁵Thai kana khă khăr sî pharado o anda peste, o khăr kodoa našti nikărăl pe.

²⁶Sa kadea, kana o Beng vazdelpe pa peste, sî phardao, thai našti nikărdeolpe, ta isprăvisai'lo lesa.

²⁷Khonikh naštil te šolpe ando khăr khă manušehko mai zuralo sar leste thai te čiorăl les lehkă avimata, numai kana phanglea mai anglal le manušes le zurales; numai atunčeara daštila čiorăl andoa khăr.

²⁸Čeačes phenau tumengă kă sa le bezexa thai sa le prasaimata, kai phenena le ăl manuši, avelal lengă iertime;

²⁹ta orkon prasala le Sfîntone Duxos, či lela iertimos ando veako; thai sî došalo anda khă bezex vešniko.”

³⁰Kadea, anda kă on phenenas: „Sî les khă duxo biujo.”

³¹Atunčeara avili e dei thai le phral Lehkă, thai, bešlindoi avri, tradine te akharăn Les.

³²O butimos bešelas angla Leste, kana phendine Lehkă: „Dikta kă Ti dei thai le phral Tiră sî avri thai roden Tu.”

³³O dea anglal: „Kon sî Mîŕă dei thai Mîŕă phral?”

³⁴Pala kodea, šudindoi pehko dičimos pa saoŕă kai bešenas angla Leste: „Dikta”, phendea O,” e dei Mîŕî thai le phral Mîŕă!

³⁵Kă orkon kărăl o kamimos le Devllehko, kodoa sî Mangă phral, phei thai dei.”