Read Kalderash Romani Cornilescu Bible 2020 (Romania) Luka 1 Bible Online

Luka 1 - Kalderash Romani Cornilescu Bible 2020 (Romania) bible

Luka 1

¹Anda kă but line te kărăn khă phendimos pa sal butea kai kărdile maškar amende,

²pala sar phendine amengă kukola kai dikhline pehkă iakhănça dă kana sas, thai ji kana arăsline kanditorea le Divanohkă,

³arakhlem i me dromesa, but alosardea Teofile, pala so kărdem rodimata butimasa pa sa kadala butea dă kana kărdile, te ramo tukă le ando čiro iekh pala avrăste,

⁴kaste dašti prinjeanes kadeadar o čeačimos le sîkaimatăngo, kai sas tukă dine andoa juvindo mui.

⁵Ande le des le Irodohkă, o thagar la Iudeiako, sas khă rašai, bušlino Zaxaria, anda e viça le Abiasti. E romni lesti sas anda le šeia le Aaronohkă, thai bušolas Elisaveta.

⁶Lidui sas bibezexale, angloa Dell, thai arakhanas bi patako sa le mothodimata thai le lašardimata le Raiehkă.

⁷Nas le šeave, anda kă e Elisaveta sas sterpo; thai lidui sas angle ande le bărši.

⁸Ta, Kana kandelas o Zaxaria angloa Dell, koa rîndo lehka čeatako,

⁹pala e datina le rašaimasti, ankăsto koa çîrdimos te šol pe te tămîil ando Templo le Raiehko.

¹⁰Ando čeaso le tămîmiahko, sa o butimos le norodohko rudilas pe avri.

¹¹Atunčeara khă înjero le Raiehko sîkadilo le Zaxariahkă, thai bešlo ande pînŕănde ande čeačirig le altaresti anda o tămîimos.

¹²O Zaxaria darailo, kana dikhlea les, thai astardea les e dar.

¹³Ta o înjero phendea lehkă: „Na dara Zaxario; anda kă teo rudimos sas ašundo. Ti romni e Elisaveta kărăla tukă khă šeau, savehkă thosas lehkă anau Ioan.

¹⁴O avela anda tute khă but baxtalimos thai lošaimos, thai but baxtaona anda lehko kărimos.

¹⁵Kă avela baro angloa Rai. Či pela či moll, či pimos zuralo, thai pherdeola Sfînto Duxostar înkă andoa păŕ pehka deiako.

¹⁶O amboldela buten anda le šeave le Israelohkă koa Rai, o Dell lengo.

¹⁷Jeala angloa Dell, ando duxo thai ande zor le Iliasti, kaste amboldel le ille le daddengă kal šeave, thai kolen kai či ašunen koa phirimos ando xaraimos kolengo bibezexale, kaste kărăl le Raiehkă khă norodo lašo lašardo anda Leste.

¹⁸O Zaxaria phendea le înjerohkă: „Anda soste prinjeanua e buti kadea? Anda kă me sîm phuro, thai mîŕî romni sî but andel bărši.”

¹⁹Orta čeačimos, o înjero phendea lehkă: „Me sîm o Gavrilo, kai bešeau angloa Dell; sîmas tradino te dau tukă duma, thai te anau tukă kadea vestea laši.

²⁰Dikta kă avesa muto, thai našti desa duma, ji ando des kana pherdeona kadala butea, anda kă či pateaian mîŕă divanuri, kai pherdeona ka pehko čiro.”

²¹O norodo ajukărălas le Zaxarias, thai mirilas pe kă bešel but ando Templo.

²²Kana ankăsto avri, naši te mai delas lengă duma; thai ateardine kă sas les khă vedenia ando Templo. O kărălas lengă sămne andeiekh, thai ašilo muto.

²³Kana pherdile lehkă des le kandimahkă, o Zaxaria gălo khără.

²⁴Pa vareso čiro, e Elisaveta lesti romni, ašili phari, thai nikărdea pe gardi panji šon. „Kă”, phenelas oi,

²⁵„dikta so kărdea mangă o Rai, kana šudea Pehkă iakha pe mande, kaste lel mangă o lajeau maškar le manuši.

²⁶Ando šon le šovengo, o înjeri o Gavrilo sas tradino le Devllestar ande khă četatea anda e Galilea, dinianau Nazareto,

²⁷ka khă šeibari tomnime pala khă rom, dinoanau Iosifo, andoa khăr le Davidohko. O anau la šeiabareako sas Maria.

²⁸O înjero šutea pe late, thai phendea: „Mekamangla tute, savea kărdilo lakă baro xaro; o Rai sî tusa, dinidumadămišto san tu maškar le juwlea!”

²⁹Daraili but anda kadala divanuri, e Maria pušelas pe korkoŕo so daštila te ameal o phendimos kadoa.

³⁰O înjero phendea lakă: „Na dara, Mario; kă lean lašimos angloa Dell.

³¹Thai dikta kă ašesa phari, thai avela tu khă šeau, savehkă thosa lehkă anau Isus.

³²O avela baro, thai avela bušlino O Šeau Kolehko But Baro; thai o Rai o Dell dela les o skamin le bešlimahko Lehkă daddehko le Davidohko.

³³Thagarila poa khăr le Iakovohko ando veako, thai o Thagarimos Lehko či avela les gor.”

³⁴E Maria phendea le înjerohkă: „Sar kărdeol pe e buti kadea, anda kă me či jeanau romestar?”

³⁵O înjero dea la anglal: „O Sfînto Duxo, mekăla Pe pa tute, thai e zor Kolehko But Baro ušaravela tu. Anda kodea o Sfînto kai kărdeola anda tute, avela dinoanau o Šeau le Devllehko.

³⁶Dikta kă e Elisaveta, o neamo tiro, pharila, i oi, thai avela la khă šeau po phurimos; thai oi, saveakă mothonas lakă sterpo, sî akana ando šon le šovengo.

³⁷Kă či khă divano kata o Dell nai te na avel les zor.

³⁸E Maria phendea: „Dikta, e roaba le Raiesti; kărdeol pe mangă pala le divanuri tiră!” Thai o înjero teleardea latar.

³⁹E Maria uštili orta andel des kodola, thai teleardea iekhatar karing le baŕlebară, ande khă četatea le Iudasti.

⁴⁰Šutea pe ando khăr le Zaxariahko, thai phendea dă mišto la Elisavetakă.

⁴¹Sar ašundea e Elisaveta o phendimos la Mariako, mištisardea lakă e gloata ando păŕ, thai e Elisaveta pherdili Sfînto Duxo.

⁴²Oi çîpisardea le mosa zurales: „Dinidumadămišto san tu maškar le juwlea, thai dinodumadămišto sî o rodo te păŕăhko.

⁴³Sar sas mangă dino mangă te avel mande e dei le Raiesti mîŕăsti?

⁴⁴Anda kă dikta, sar arăslo mande kal kan o phendimos tiro, mištisardea mangă e gloata ando păŕ baxtalimasa.

⁴⁵Baxtalimos anda kodea kai pateaia; anda sal butea, kai sas lakă phendine anda e rig le Raiesti, pherdeona.”

⁴⁶Thai e Maria phendea: „Muro sufleto barearăl le Raies,

⁴⁷thai bukuril pe mangă o duxo ando Dell, o Mîntuitorii muŕo,

⁴⁸anda kă dikhlea karing o limos smerime la roabako Lesti, Kă dikta kă dakanara întea, sa le neamuri mothona mangă baxtali,

⁴⁹anda kă Kukoa Sea Zuralo kărdea butea bară anda mande. O Anau Lehko sî Sfînto,

⁵⁰thai o lašimos Lehko tinzolpe neamo neamostar anda kukola kai daran Lestar.

⁵¹O sîkadea zor Pehkă vastesa; dea rigate le godea, kai sas le kukolenbarăn ande lengo illo.

⁵²Deas muial le zuralen pa lengă skamina le bešlimahkă, thai vazdea kukolen telal.

⁵³Le bokhalen pravardeale lašimatănça, thai le bravalen ankaladea le avri le vastença nangă.

⁵⁴Avilo ando kandimos Pehka slugako, kă andea Pehkă godi anda Pehko lašimos, —

⁵⁵sar šinadeasas amară daddengă, — angloa Avraamo thai e sămînça lesti ando veako.”

⁵⁶E Maria ašileas andekthan la Elisavetasa kam trin šon. Pala kodea amboldili khără.

⁵⁷E Elisaveta pherdilo lako čiro te kărăl; thai sas la khă šeau.

⁵⁸Lakă neamurea thai le manuši paša late ašundine kă o Rai sîkadea khă baro lašimos anda late, thai baxtaleonas andekhthan lasa.

⁵⁹Ando oxtoto des, avile te šinen e gloata roata, thai kamenas te thon lehkă anau Zaxaria, pala o anau lehkă daddehko.

⁶⁰Ta lesti dei lea o divano thai phendea: „Na. Sî te bušol Ioan.”

⁶¹On phendine lakă: „Khonikh anda ti viça nai les o anau kadoa.”

⁶²Thai line te kărăn semne lehkă daddehkă, kaste jeanel sar te thon lehkă anau.

⁶³O Zaxaria manglea khă tăbliça ramomasti, thai ramosardea, phendindoi: „Lehko anau sî Ioan.” Thai saoră mirisai le.

⁶⁴Ande leaka kodea, pîtărdilo lehko mui, thai dea pe drom lesti šib, thai o delas duma thai delasdumadămišto poa Dell.

⁶⁵Sa le manušen lea le e dar, thai sal phuwea anda kodoa than o baŕalo la Iudeiako denas duma pa kadala butea.

⁶⁶Sa kola kai ašunenas, garavenas le ande pehko illo, thai phenenas: „So va avela kadea gloata?” Thai o vast le Raiehko sas čeačimasa lesa.

⁶⁷O Zaxaria, lehko dadd, pherdilo Sfînto Duxo, prooročisardea, thai phendea:

⁶⁸„Dinodumadămišto sî o Rai, o Dell le Israelohko, anda kă rodea thai tindeapale Pehkă poporos.

⁶⁹Thai vazdea amengă khă skăpimos zuralo, ando khăr pehka slugako o David,

⁷⁰sar mothodeasas andoa mui le sfinçăngo Pehkă prooročengă, kai sas mai dămult;

⁷¹skăpimos le dušmaiendar amarăndar thai andoa vast saorăngo kai nadabadikhăn ame!

⁷²Kadeadar sîkavel o Pesko lašimos angla amară dadda, thai anel Pehkă godi anda o phanglimos Lehko kukoa o sfînto,

⁷³sar o solax anda sao O solaxadeas amară daddehkă le Avraamohkă,

⁷⁴kă, pala so skăpil ame andoa vast amară dušmaiengo, mekala ame te kandas Les bi darako,

⁷⁵te traisaras angla Leste ande sfinçenia thai bibezexalimos, ande sea le des amara čivavakă.

⁷⁶Thai tu, çînorea, avesa dinoanau prooroko Kolehko But Baro. Kă phirăsa angloa Rai, kaste lašarăs Lehkă droma,

⁷⁷thai te des le poporos Lehkărăs o prinjeandimos le skăpimahko, kai bešel ando iertimos le bezexăngo lehkă;

⁷⁸anda e bari mila le Devllesti amarăsti, pala sao rodeame o Kham kai anklel andoa učimos,

⁷⁹kaste străfeal pa kukola kai pašleon ando tuneriko thai ande ušal le mullimasti, thai te ortol amară pînŕă po drom la pačeako!”

⁸⁰Thai o çînoro bareolas thai zureaolas ando duxo. Thai bešlo andel thana le pustii ji ando des kana sîkadi'lo angloa Israelo.