Read Kalderash Romani Cornilescu Bible 2020 (Romania) Luka 17 Bible Online

Luka 17 - Kalderash Romani Cornilescu Bible 2020 (Romania) bible

Luka 17

¹O Isus phendea Pehkă jenengă: „Sî bidaštimahko te na aven prikăjimata bezexalimahkă; ta au kodolestar anda sao aven!

²Sahkă avel mai mišto anda leste te phandel pehkă khă baŕ moarako kai koŕ, thai te avel šudino ande marea, dă sar te kărăl iekhăn anda kadala çînoră te bezexarăn.

³Len sama orta tumende! Kana teo phral bezexarăl angla tute, xatu lesa! Thai kana fales nasul, iertisar les!

⁴Thai orta kana bezexarăl iekh angla tute eftavar po des, thai eftavar po des amboldel pe tute thai phenel: „Fal ma nasul! — te iertis les.

⁵Le apostolea phendine le Raiehkă: „Barear amaro pateaimos!”

⁶Thai o Rai phendea: „Te avela tume pateaimos sode khă bombiça muštaresti, sahkă phenen la dudelinakă kadalakă: „Ankli avri anda e phuw thai bareo ande marea”, thai sahkă ašunel tume.

⁷Sao anda tumende, kana sî les khă robo, kai xunavel e phuw or arakhăl ăl bakrean, phenela lehkă, kana avela poa kîmpo: „Av iekhatar, thai beši kai skafidi?”

⁸Či phenela lehkă mai iekhatar: „Lašar mangă vareso te xau, phande tu, kande ma ji kana xaua thai peaua me; pala kodea, xasa thai pesa i tu?”

⁹Či ašela o unjilimahko andoa robo kodoa, anda kă o robo kăredea sa so mothodeasas lehkă? Či pateau.

¹⁰Sa kadea i tume, pala so kărăna sa so mothodea pe tumengă, te phenen: „Sam varesar robea bezexale; kărdeam so samas unjilimahko te kăras.”

¹¹O Isus jealas karing o Ierusalimo, thai nakhlo anda e Samaria thai Galilea.

¹²Ta kana šolas pe ande khă gau, avile angla Leste deši leprošea. On bešline mai dur,

¹³thai vazdine pehko mui, thai phende: „Isuse, Sîkaitorina, avel tu mila amendar!”

¹⁴Kana dikhlea le o Isus, phendea lengă: „Jean thai sîkaven tume le rašangă!” Ta kana on jeanastar, sas ujearde.

¹⁵Iekh anda lende, kana diklea pe sastevesto, amboldi'lo, slăvindoi le Devlles le mosa zurales.

¹⁶Šudea pe le mosa pe phuw kal pînŕă le Isusohkă, thai naisardea Lehkă. Sas Samariteano.

¹⁷O Isus lea o divano, thai phendea: „Ta nas ujearde sa le deši? Ta le kolaver înia, kai le?

¹⁸Či arakhlea pe numai o străino kadoa te amboldel pe thai te del slava le Devlles?”

¹⁹Pala kodea phendea: „Ušti thai jeatar; teo pateimos, skăpisardea tu.”

²⁰Le Fariseia pušline le Isusos kana avela o Thagarimos le Devllehko. Čecčio phendimos, o Isus phendea lengă: „O Thagarimos le Devllehko či avel kadea kaste malavel le iakha.

²¹Či phenela pe: „Diktala kata, or: „diktala kote!” Kă dikta o Thagarimos le Devllehko sî ande tumende.”

²²Thai phendea le jenengă: „Avena des kana kamena te dikhăn iekh anda le des le Šeavehkă le manušehkă, thai či dikhăna les.”

²³Phenela pe tumengă: „Dikta'lo koče, dikta'lo kote!” Te na jean, čina te na phirăn pala lende.

²⁴Kă, sar anklel o trăsneto, thai străfeal kata khă rig le čeresti ji kai kolaver, kadea avela i o Šeau le manušehko ande Pehko des.

²⁵Ta mai anglal trăbul te dukadeol but, thai te avel šudino le neamostar kadalestar.

²⁶So sas ande le des le Noiahkă, avela orta kadea i ande le des le Šeavehkă le manušehkă:

²⁷xanas, penas, însurinas pe thai măritinas pe ji ando des kana šutea pe o Noia ando bero; thai avilo o barobrîšind thai xasardea le saoŕăn.

²⁸So sas ande le des le Lotohkă, avela sa kadea: le manuši xanas, penas, tinenas, bitinenas, thonas ande phuw, vazdenas,

²⁹ta, ando des kana ankăsto o Lot andai Sodoma dea brîšind iagasa thai sulfosa kai pelo andoa čeri, thai xasardea le saoŕăn.

³⁰Sa kadea avela i ando des kana sîkadeo'la o Šeau le manušehko.

³¹Ando des kodoa, kon avela opră po khăr, thai avena lehkă vasuri ando khăr, te na del pe tele te lel le; thai kon avela po kîmpo, sa kadea, te na mai amboldel pe.

³²Anen tumengă godi la romneatar le Lotosti.

³³Or kon rode la te skăpil pesti čivava, xasarăla la; thai or kon xasarăla la, arakhăla la.

³⁴Phenau tumengă kă, ande reat kodea, dui jene kai avena ande kodoa pato, iekh avela lino thai iekh avela meklino;

³⁵dui juwlea kai măčinina andekhthan: iekh avela lini, thai aver mukli.

³⁶Dui murši kai avena po kîmpo: iekh avela lino, thai aver meklino.”

³⁷Le jene pušle Les: „Kai, Raia?” Ta O dea le anglal: „Kai? Avela tumaro stato oče tidena pe le vulturea.”