Read Kalderash Romani Cornilescu Bible 2020 (Romania) Luka 18 Bible Online

Luka 18 - Kalderash Romani Cornilescu Bible 2020 (Romania) bible

Luka 18

¹O Isus phendea lengă khă pilda, kaste sîkavel lengă kă trăbun te rudin pe biatărdimahko, thai te na mekăn pe.

²O phendea lengă: „Ande khă četatea sas khă krisînitorii, kai le Devllestar či daralas thai le manušendar či lajealas.

³Ande četatea kodea sas i khă phiwli, kai avelas butivar leste, thai phenelas lehkă: „Kărmangă čeačimos ande xoli kai sîm mîŕî pîrîtoresa.”

⁴But čiro či kamblea te kărăl lakă čeačimos.Ta mai palal, phendea pehkă: „Barem kă le Devllestar či darau, thai le manušendar či lajeavau,

⁵orta, anda e phiwli kadea kă sa dilearăl ma, kăraua lakă čeačimos, kaste na sa avel te marăl muŕo šero.”

⁶O Rai mai phendea: „Ašunen so phenel o krisînitorii o bičečio?

⁷Thai o Dell či kărăla čeačimos Pehkă alosardengă, kai den mui des thai reat karing Leste, barem kă mai bešel angla lende?

⁸Phenau tumengă kă kărăla lengă čeačimos iekhatar. Ta kana avela o Šeau le manušehko mai arakhăla O pateimos pe phuw?

⁹Mai phendea i e pilda kadea anda iekh kai pateanas pe ande peste orta kă sî bibezexale, thai či lenas în samă le kolavrăn.

¹⁰„Dui manuši ankăste koa Templo te rudin pe; iekh sas Fariseo thai aver sas tiditorii.

¹¹O Fariseo bešelas ande pînŕănde, thai lea te rudil pe ande peste kadea: „Devlla, Tukă naisarav kă či sîm sar le kolaver manuši, xanjuvale, bičečimahkă, preakurvarea or orta sar koakoa tiditorii.

¹²Me postiu duvar po kurko, dau dešimos anda sa mîŕă avimata:”

¹³O tiditorii bešelas mai dureardo, thai na daštilas te vazdel či le iakha karing o čeri; thai marălas pe ando kolin, thai phenelas: „Devlla, avel tu mila mandar, kă sîm bezexalo!”

¹⁴Me phenau tumengă kă mai iekhatar o manuši kadoa ulisto khără dindo bibezexalo sar o kolaver. Kă orkon vazdel pe, avela perado; thai orkon mekăla pe tele, avela vazdino.”

¹⁵Andine Lehkă i varesar šaoră, kaste azbal le.Ta le jene, kana dikhline e buti kadea, xaline pe kodolença kai anenas le.

¹⁶O Isus akhardea Peste le šaorăn, thai phendea: „Mekăn le šaorăn te aven Mande, thai na atărdearăn le; kă o Thagarimos le Devllehko sî iekhăngo sar lende.

¹⁷Čeačes phenau tumengă kă, orkon či primila o Thagarimos le Devllehko sar khă šaoro, či khă tiposa či šola pe ande leste”

¹⁸Khă baro pušlea le Isusos: „Lašea Sîkaitorina, so trăbul te kărau kaste avel ma e čivava e vešniko?

¹⁹„Anda soste phenes Mangă lašo?” dea les anglal o Isus. „Khonikh nai mai lašo dă sar Iekh korkoro: o Dell.

²⁰Jeanes le mothodimata: „te na preakurvăris; te na mudarăs; te na čiorăs; te na phenes khă phendimos xoxamno; te des pativ te daddes thai tea deia.”

²¹„Sa kadala butea,” Phendea lehkă o, „arakhlem le anda muŕo tărnimos.”

²²Kana ašundea o Isus kadala divanuri, phendea lehkă: „Sî te mai avel tu iekh buti: bitin sa so sî tu, xulau ka le čioŕă, thai avela tu khă mandin andel čeruri. Pala kodea, av pala Mande.”

²³Kana ašundea o kadala divanuri, tristosai'lo dă sa; kă sas but bravalo.

²⁴O Isus dikhlea kă tristosai'lo dă sa, thai phendea: „Sode dă pharăs šona pe ando Thagarimos le Devllehko kola kai sî le bravalimata!

²⁵Anda kă mai lesne sî te nakhăl e kamila andoa kan la suveako, dă sar khă manuši bravalo ando Thagarimos le Devllehko.”

²⁶Kola kai ašunenas Les, phendine: „Atunčeara kon dašti avel skăpime?”

²⁷O Isus de anglal: „So sî bidaštimahko kal manuši, sî daštimasa koa Dell.”

²⁸Atunčeara o Petro phendea: „Dikta kă ame mekleam sa, thai avileam pala Tute.”

²⁹Thai o Isus phendea lengă: „Čeačimasa phenau tumengă kă nai khonikh, kai te meklino pehko khăr, or la romnea, or le phralen, or le dadden, or le šeaven, ando Thagarimos le Devllehko,

³⁰thai te na primil but mai but ando veako kadoa dă akanara, ta ando veako o kolaver, e čivava e vešniko.

³¹O Isus lea Pesa kolen le dešudon, thai phendea lengă: „Dikta kă ankleas ando Ierusalimo, thai sa so sas ramome andal prooročea poa Šeau le manušehko, sî te pherdeola.

³²Kă avela dino ando vast le Neamurengo; marăna pehkă lajeau Lestar, dena Les armaia, čiungardena Les;

³³thai, pala so marăna Les le ŕaiança, mudarăna Les, ta ando trito des uštela.”

³⁴On či atearde khanči anda kadala butea: kă o divano kadoa sas garado anda lende, thai či atearănas so phenelas lengă o Isus.

³⁵Ta kana pašolas o Isus ando Ierixono, khă koŕo bešelas paša o drom thai mangă las.

³⁶Kana ašundea o norodo kă nakhăl, pušlea kon sî.

³⁷Phendine lehkă: „Nakhăl o Isus andoa Nazareto:”

³⁸Thai o çîpisardea: „Isuse, Šeau le Davidohko, avel tu mila mandar!”

³⁹Kola kai jeanas anglal, xanaspe lesa te ašelmuto; ta o çîpilas i mai zurales: „Šeau le Davidohko, avel tu mila mandar!”

⁴⁰O Isus atărdi'lo, thai mothodea te anen les Leste; thai, pala so paši'lo, pušlea les:

⁴¹„So kames te kărau tukă?” „Raia,” dea anglal o, „te lau muŕo dičimos.”

⁴²Thai o Isus phendea lehkă: „Le teo dikhaimos. O pateaimos tiro skăpisardea tu.”

⁴³Andakhdata, o koŕo lea pehko dikhlimos, thai gălo pala o Isus, slăvindoi le Devlles. Soa norodo, kana dikhlea kodola so sas, dea lăudimos le Devlles.