Read Kalderash Romani Cornilescu Bible 2020 (Romania) Luka 2 Bible Online

Luka 2 - Kalderash Romani Cornilescu Bible 2020 (Romania) bible

Luka 2

¹Ando čiro kodoa ankăsteasas khă mothodimos katar o Čezar Augusto te ramol pe sai lumea.

²O ramos kadoa kărdilo mai anglal kana sas baro ande Siria o Quirinius.

³Saoră jeanas te ramon pe, sakogodi ande lesti čeata.

⁴O Iosif ankăsto i anda e Galilea, anda e četatea le Nazaritosti, kaste jeal ande Iudea, ande četatea le Davidosti, kai bušolas Betleem, — anda kă sas andoa khăr thai anda e semençia le Davidosti, —

⁵te ramol pe andekhthan la Mariasa, lesti tomnime, kai sas phari.

⁶Kana sas on oče, pherdilo o čiro kă e Maria trăbulas avel lako çînoro.

⁷Thai kărdea pehkă Šeaves, o anglal kărdino, pateardea Les andel pharne, thai sovleardea Les ande khă ieslea, kă ando khăr le soimahko nas than anda lende.

⁸Pe phuw kodea sa varesar bakrearea, kai bešenas avri po kîmpo, thai kărănas reate arakhadimos paša pehkă turme.

⁹Thai dikta khă înjero le Raiehko avilo angla lende, thai e slava le Raiesti străfeaili angla lende. On daraile but zurales.

¹⁰Ta o înjero phendea lengă: „Na daran: kă anau tumengă khă vestea laši, kai avela khă baro baxtalimos anda soa norodo:

¹¹ades ande četatea le Davidosti, kărdilo tumengă khă Skăpitori, kai sî o Kristoso, o Rai.

¹²Dikta o sămno, pala sao prinjeanena Les: arakhăna khă çînoro pateardo andel pharnoră thai suto ande khă ieslea.”

¹³Thai andakhdata, andekhthan le înjerosa tidinisaili khă butimos manušengo andoa čeri, lăudindoi le Devlles, thai phendindoi:

¹⁴„Slavă le Devllehkă ande le thana le bară, thai pačea pe phuw maškar le manuši kai Les čeailol.”

¹⁵Pala so telearde le înjerea lendar, kaste ambolden pe ando čeri, lebakrearea phendine iekh karing o kolaver: Aven te jeas ando Betleemo, thai te dikhas so phendeas pe amengă thai so kărdea mengă prinjeando o Rai.

¹⁶Telearde iekhatar, thai arakhle la Maria, le Iosifos, thai o çînoro suto ande ieslea.

¹⁷Pala so dikhline Les, dine duma so phendeasas pe lengă poa Çînoro.

¹⁸Saoŕă kola kai ašunde le, mirisai le anda so phenenas lengă le bakrearea.

¹⁹E Maria garavelas sa le divanuri kodola, thai delas pe godi lende ande lako illo.

²⁰Thai le bakrearea amboldile, slăvindoi thai lăudindoi le Devlles, anda sa so ašundinesas thai dikhlesas, thai save sas orta sar phendeas pe lengă.

²¹Kana avilo le oxtongo des, ande sao trăbulas šindoroata o Çînoro, thodine Lehkă o anau Isus, anau, kai sas phendino le înjerostar anglal te avel O thodino ando păŕ.

²²Thai, kana pherdile le des le ujimahkă lengă, pala e Kris le Moisasti, o Iosif thai e Maria andine le Çînorăs ande Ierusalimo, kaste anen Les angla o Rai,

²³pala sar sî ramome ande Kris le Raiesti: „Orsao anglal kărdo anda e rig e muršani avela dino le Raiehkă,”

²⁴thai te anel jertfa: dui čirikleora or dui puiç golumbohkă, pala sar sî mothodino ande e Kris le Raiesti.

²⁵Thai dikta kă ando Ierusalimo sas khă manuši kai bušolas Simeono. O manuši kadoa nigrălas khă čivava sfînto, thai sas la darasa le Devllestar. O ajukrălas o dabadičimos le Israelohko, thai o Sfînto Duxo sas pa leste.

²⁶O Sfînto Duxo phendeasas lehkă kă či merălla angla te dikhăl le Kristosos le Raiehko.

²⁷O avilo ando Templo, andino le Duxostar. Thai, kana andine le dadda andră le Çînorăs le Isusos, kaste pherăn dičimasa Leste so motholas e Kris,

²⁸o Simeono lea Les ande angali, deadumadămišto le Devlles, thai phendea:

²⁹„Akana, de drom ande pačea te robos, Stăpînona, pala o divano Tiro.

³⁰Kă dikhline mîŕî iakha Teo skăpimos,

³¹kai lašardean les te avel, angla sa le popoare,

³²e duda kai te dudearăl le neamuren, thai slava Te poporosti le Israelosti.”

³³Lehko dadd thai Lesti dei mirinas pe le buteandar kai phenenas pe pa Leste.

³⁴O Simeon dealedumadămišto, thai phendea la Mariakă, Lehka deiakă: „Dikta, o Šaoro kadoa sî avino kaste peravel thai te vazdel buten andoa Israelo, thai te avel khă sămno, kai kărăla pharadimata.

³⁵Orta teo sufleto avela pusado kha sabiatar, kaste sîkadeol pe le gînduri bute illengă.”

³⁶Mai sas oče i khă prooročiça, e Ana, e šei le Fanuelosti, anda e semençia le Ašerosti. Oi sas but phuri, thai bešlisas pehkă romesa efta bărši pala lako măritimos.

³⁷Ašili phivlli, thai sas la oxtovardeši thai štar bărši, e Ana či dureolas kata o Templo, thai i desă i reatae oi kandelas le Devlles postosa thai rudimasa.

³⁸Avili i oi ande kodoa čeaso, thai lea te lăudil le Devlles, thai te del duma poa Isus saoŕăngă kai ajukrănas o skăpimos le Ierusalimohko.

³⁹Pala so pherdine sa so motholas e Kris le Raiesti, o Iosif thai e Maria, amboldile ande Galilea, ande lendi četatea o Nazareto.

⁴⁰Ta o Çînoro bareolas thai zureaolas; sas pherdo xaraimos, thoa xaro le Devllesko sas pa Leste.

⁴¹Le dadd le Isusohkă jeanas ando Ierusalimo ande sako bărši, oa prazniko la Patraedeako.

⁴²Kana O sas dešdo băršengo, ankăste ando Ierusalimo, pala o običeio le praznikohko.

⁴³Pala, so nakhle le des le praznikohkă, kana amboldenas pe khără, o šeau o Isus ašilo ando Ierusalimo. Lehkă dadd na line sama e buti kadea.

⁴⁴Pateaine kă sî pehkă manušença le phirimahkă, thai găline drom khă desăsko, thai rode Les maškar pehkă neamuri thai pehkă prinjeande.

⁴⁵Ta či arakhle Les, thai ambolde pe ando Ierusalimo te roden Les.

⁴⁶Pala trin des, arakhle Les ando Templo, bešlindoi ando maškar le sîkaditorengo ašundindoi le thai thodindoi lengă pušlimata.

⁴⁷Sa kai ašunenas Les, ašenas mirime andoa xaraimos thai le phendimata Lehkă.

⁴⁸Kana dikhle Les le dadd Lehkă, ašile bitemištinpe; thai Lesti dei phendea Lehkă: „Šeava, anda soste phiradean Tu kadea amença? Dikta kă Teo dadd thai me rodeam Tu darasa.”

⁴⁹O phendea lengă: „Sostar rodean Ma? Ta na jeanenas kă trăbul te avau ando khăr Mîŕă Daddehko?”

⁵⁰Ta on na ateardine Lehkă phendimata.

⁵¹Pala kodea ulisto lença, thai avilo ando Nazareto, thai ašunelas lendar. Lesti dei garavelas sa kadala divanuri ande pehko illo.

⁵²Thai o Isus bareolas ando xaraimos, ando stato, thai sas sa mai mišto dikhlino angloa Dell thai anglal manuši.