Read Kalderash Romani Cornilescu Bible 2020 (Romania) Luka 21 Bible Online

Luka 21 - Kalderash Romani Cornilescu Bible 2020 (Romania) bible

Luka 21

¹O Isus vazdea Pehkă iakha, thai dikhlea varesar bravale kai šudenas pehkă pativa ande visteria.

²Dikhlea i khă phiwli čioŕî, šudindoi oče dui louoră.

³Thai phendea: „Čeačimasa phenau tumengă kă kadea čioŕî phiwli, šudea mai but dă sar le kolaver;

⁴kă sa kadala šudine pativa anda lengo bravalimos; ta oi šudea anda pehko čioŕîmos, sa so sas la kaste trail.”

⁵Ta kana denas duma unii poa Templo, kă sî šukar xureadino baŕînça kuči thai pativença, o Isus phendea:

⁶„Avena des kana, či ašela baŕ pe baŕăste, kai te na avel perado.”

⁷„Sîkaitorina,” pušle Les on, „kana kărdeona pe sa kadala butea? Thai sao avela o sămno kana avena kadala butea?”

⁸O Isus dea anglal: „Šon mišto sama te na atxavel tume varekon. Kă avena but ando Anau Muŕo, thai phenena: „Me sîm o Kristoso”, thai „O čiro pašol.” Te na jean pala lende.

⁹Kana ašunena anda le mardimata thai le răskoale, te na daraon; anda kă mai anglal trăbun te aven kadala butea. Ta o gor lengo či avela iekhatar.

¹⁰„Pala kodea”, phendea lengă O,” khă neamo uštela pa aver neamo, thai khă thagarimos pa aver thagarimos.

¹¹Ande iekhthana avena bară isdraimata phuweakă, bokh thai čiuma; avena sîkaimata daraimatăngă, thai sămnuri bară ando čeri.

¹²Ta anglal dă sa kadala, thona o vast pe tumende, thai našavena tume: dena tume po vast le khăngăreango, šudena tume ando beči, çîrdena tume angla le thagarimata thai angla le guvernatorea, anda e doši le Anavesti Mîŕăsti.

¹³Kadala butea kărdeona kaste aven phendimos.

¹⁴Nikrăn mišto godi, te na den godi mai anglal so phenena;

¹⁵Kă daua tume khă mui thai khă xaraimos, savehkă našti dena les anglal, čina či te bešen tumară dušmaia anglal.

¹⁶Avena dine andel vast lengă i tumară daddendar, phralendar, neamurendar thai amalendar tumarăndar; thai mudarăna buten anda tumende.

¹⁷Avena bidikhline saoŕănça anda e doši Mîŕă Anavesti.

¹⁸Ta či khă bal anda tumaro šero či xasardeola.

¹⁹Ando răbdimos tumaro, skăpina tumară sufletuerii.

²⁰Kana dikhăna o Ierusalimo dinoroata kătanendar, te jeanen kă atunčeara lehko pustimos sî paše.

²¹Atunčera, kola anda e Iudea te našen andel baŕbară, kola andoa maškar le Ierusalimohko te anklen avri anda leste, thai kola katar le phuwea te na šon pe ande leste.

²²Kă le des kodola avena des amboldimahkă, kaste pherdeol sa so sas ramome.

²³Vai le juwleandar kai avena pharea, thai kolendar kai dena čiuči andel des kodola! Anda kă avela kadea khă baro strandimos ando čem, thai xoli poa norodo kadoa.

²⁴Perăna tala o skuçimos la sabiako, avena line robea maškar le neamuri; thai o Ierusalimo avela ušteado andel pînŕă le neamurendar, ji kana pherdeona le čiruri le neamurengă.

²⁵Avena sămnuri ando kham, ando šonuto thai andel čeraia. Thai pe phuw avela tidimos maškar le neamuri, kai či jeanena so te kărăn koa ašundimos le xuxuimahko la mareko thai le valurengo;

²⁶le manuši dena pehko sufleto daratar, ando ajukărimos le buteango kai sî te avena pe phuw; kă e zor le čerendi avela mištisardi.

²⁷Atunčeara dikhăna le Šeaves le manušehko avindoi po noro zorasa thai slavasa bari.

²⁸Kana avena te kărdeon kadala butea, te dikhăn opră, thai te vazden tumară šeră, anda kă tumaro skăpimos pašol.”

²⁹Thai phendea lengă khă pilda: „Dikhăn o smoitino thai sa le kašt.

³⁰Kana den le patrea, thai dikhăn le, tume korkoŕo prinjeanen kă akana o milai sî paše.

³¹Sa kadea, kana dikhăna kadala butea kă avena, te jeanen kă o Thagarimos le Devllehko sî paše.

³²Čeačimasa phenau tumengă kă či nakhăla o neamo kadoa, ji kana pherdeona sea kadala butea.

³³O čeri thai e phuw nakhăna, ta le divanuri Mîŕă či nakhăna.

³⁴Len sama orta tumende, ka na varesar te phareon tumară ille bute xabenesa thai pimasa, thai le daraimatănça kadale traiohkă, thai kadea o des kodoa te avel pa tumende bi vesteako.

³⁵Kă o des kodoa avela sar laviça pa sa kukola kai bešen pe soa mui la phuweako.

³⁶Arakhăn soa čiro, thai rudin tume, kaste avel tume zor te skăpin anda sa le butea kadala, kai sî te avena, thai te ašen ande pînŕănde angloa Šeau le manušehko.”

³⁷Desă, o Isus sîkavelas le norodos ando Templo, rete jealas ta bešelas ando baŕobaro kai bušol o baŕbaro le Zetinengo.

³⁸Thai soa norodo avelas dă droboitu iekhatar Leste ando Templo, kaste ašune Les.