Read Kalderash Romani Cornilescu Bible 2020 (Romania) Luka 24 Bible Online

Luka 24 - Kalderash Romani Cornilescu Bible 2020 (Romania) bible

Luka 24

¹Ando des anglal le kurkăhko, le juwlea kadala, thai aver andekhthan lença, avile koa mormînto kana pharadeolas o des, thai andine le miresme, kai lašardesas le.

²Arakhline o baŕ dinorigate poa mormînto,

³šute pe andră, thai či arakhline o stato le Raiehko le Isusohko.

⁴Anda kă či jeanenas so te patean, dikta kă sîkadi lengă dui murši, xureade andel çoale kai străfeanas.

⁵Darardea, le juwlea mekle pehkă muia kai phuw. Ta on phende lengă: „Sostar roden maškar kola le mulle Kukoles kai sî juvindo?

⁶Nai koče, ušti'lo. Anen tumengă godi so phendea tumengă kana sas ande Galilea,

⁷kana phenelas kă o Šeau le manušehko trăbul te avel dino ando vast le bezexalengo, te avel karfome po trušul, thai o trito des te uštel.”

⁸Thai on andine pehkă godi le divanurendar le Isusohkă.

⁹Koa amboldimos lengo katoa mormînto, phendine sa kadala butea kolengă dešuiekhăngă thai sa le kolavrăngă.

¹⁰Kukola kai phendine kadala butea le apostolengă, sas: e Maria Magdalina, e Ioana, e Maria, e dei le Iakovosti, thai le kolaver, kai sas andekhthan lença.

¹¹Le divanuri kadala falas pe le apostolengă paramičea, thai či pateanas le.

¹²Ta o Petro ušti'lo, thai našlo koa mormînto. Muklea pe tele, thai dikhlea andră, ta či dikhlea numai le făšii le poxtanehkă, kai bešenas pe phuw; pala kodea teleardea khără, mirime anda kola kai kărdilesas.

¹³Ande kodoa des, dikta, dui jene jeanas ande khă gau, dinoanau Emaus, kai sas ka khă durearimos dă šovardeši stadii le Ierusalimostar;

¹⁴thai denas duma maškar lende pa sa so kărdileasas.

¹⁵Ta kana denas duma on thai pušenas pe, o Isus paši'lo, thai jealas po drom andekhthan lença.

¹⁶Ta lengă iakha sas amblade te prinjeanen Les.

¹⁷O phendea lengă: „So orbe sî kadala kai paruven le maškar tumende po drom?” Thai on atărdi le, dikhlindoi tristome.

¹⁸Čeačio phendimos, iekh anda lende, dinoanau Kleopa, phendea Lehkă: „Tu san korkoro străino koče ando Ierusalimo, ta či jeanes so kărdilea ande leste andel des kadala?”

¹⁹„So?” phendea lengă O. Thai on dine Les anglal: „So kărdileas le Isusosa andoa Nazareto, kai sas khă prooroko zuralo andel kărimata thai andel divanuri, angloa Dell thai angloa soa norodo.

²⁰Sar le raša le mai bară thai le mai bară amară dine Les te avel došalo koa mullimos, thai mardine Les po trušul?

²¹Ame çîrdasas ajukărimos Kă O sî Kukoa, kai skăpila le Israelos; ta sa kadalença, dikta kă adesea sî o trito des dă kana kărdile kadala butea.

²²Ba varesar juwlea amareandar thodine ame ando mirazo: on găline kana pharadeol o des koa mormînto,

²³či arakhline Lehko stato, thai avile thai phendine kă dikhline i khă vedenia înjerendi, kai phenenas kă O sî juvindo.

²⁴Iekh anda kukola kai sas amença, găline koa mormînto, thai arakhline kadea sar phendinesas le juwlea, ta Les či dikle Les.”

²⁵Atunčeara o Isus phendea lengă: „O, bigodeavengo thai durearde le illesa, kana sî e orba te patean sa so phendine le prooročea!

²⁶Či trăbulas te kăsnil o Kristoso kadala butea, thai te šol pe ande Pesti slava?”

²⁷Thai lea kata o Moise, thai kata sal prooročea, thai sîkadea lengă, ande sal LillaleDevllehkă, so sas dičimasa Leste.

²⁸Kana pašile ăl gavestar kai jeanas, O kărdi'lo kă kamel te jeal mai angle.

²⁹Ta on rudisaile Lestar, thai phendine: „Aši amença, kă sî karing e reat, thai o des paše kă gălotar.” Thai šutea pe te ašel lença.

³⁰Ta kana bešelas kai skafidi lença lea o manŕo; thai, pala so phendea o dinodumadămišto, phaglea les, thai dea lengă les.

³¹Atunčeara pîtărdile lengă iakha, thai prinjeande Les; ta O kărdi'lo bidikhlino angla lende.

³²Thai phendine iekh karing avrăste: „Či phabolas o illo ande amende, kana delas amengă duma po drom, thai pîtîrălas amengă o LillleDevllehko?”

³³Thai uštile orta ando čeaso kodoa, amboldile ando Ierusalimo, thai arakhline kolen dešuiekh thai kolen kai sas lença, ande khă than,

³⁴thai phendindoi: „Uštilo o Rai čeačimasa, thai sîkadi'lo le Simonohkă.”

³⁵Thai phendinelengă so kărdileasas lengă po drom, thai sar prinjeande Les koa phagaimos le manŕăhko.

³⁶Ta kana denas duma on kadea, orta o Isus bešlo ande lengo maškar, thai phendea lengă: „Pače tumengă!”

³⁷Pherde dar thai isdraimos, on pateanas kă dikhăn khă duxo.

³⁸Ta O phendea lengă: „Soste san biujearde? Thai sostar vazdel pe tumengă kadalendar gînduri ando illo?

³⁹Dikhăn kal wast thai le pînŕă Mîŕă, Me sîm; thon o vast pe Mande thai dikhăn: khă duxo nai les či mas či kokala, sar dikhăn kă Man sî Ma.”

⁴⁰(Thai pala so phendea kadala orbe, sîkadea lengă le vast thai le pînŕă Pehkă.)

⁴¹Anda kă on, baxtalimastar, înkă na pateanas, thai mirinas pe, O phendea lengă: „Sî tume koče vareso xamahko?”

⁴²Dine Les khă kotor mašo peko thai khă faguro avdin.

⁴³O lea le, thai xalea angla lende.

⁴⁴Pala kodea phendea lengă: „Dikta so phenauas tumengă înkă kana sîmas tumença, kă trăbul te pherdeol sa so sî ramome pa Mande ande Kris le Moisasti, andel Prooročea thai andel Psalmea.”

⁴⁵Atunčeara pîtărdea lendi godi, kaste atearăn o LillleDevllehko.

⁴⁶Thai phendea lengă: „Kadea sî ramome, thai kadea trăbulas te kăsnil o Kristoso, thai te uštel ando trito des andal mulle.

⁴⁷Thai te delduma seal neamurengă, ando Anau Lehko, o kăimos thai o iertimos le bezexăngo, dă andoa Ierusalimo.

⁴⁸Tume san le martorea kadale buteangă.

⁴⁹Thai dikta kă tradaua pa tumende o šinaimos Mîŕă Daddehko; ta ašen ande četatea ji kana avena xureade zorasa opral.”

⁵⁰O nigărdea le avri ji karing e Betania.Vazdea Pehkă vast, thai dealedumadămišto.

⁵¹Ta kana delasledumadămišto, xuladi'lo lendar, thai sas vazdino ando čeri.

⁵²Pala so rudisile Lehkă, on amboldile ando Ierusalimo khă bară baxtalimasa.

⁵³Thai soa čiro bešenas ando Templo, thai lăudinas thai denasdumadămišto le Devlles. Amin.