Read Kalderash Romani Cornilescu Bible 2020 (Romania) Deutronomul 14 Bible Online

Deutronomul 14 - Kalderash Romani Cornilescu Bible 2020 (Romania) bible

Deutronomul 14

¹Tume san le šeave le Raiehkă, le Devllehkă tumarăhkă. Te na kărăn tumengă ŕanglimata thai te na randen tume maškar le iakha anda khă mullo.

²Kă tu san khă poporo sfînto anda o Rai, o Dell tiro, thai o Rai o Dell tiro alosardea tu, kaste aves o poporo Lehko anda sa le popoare pa o mui la phuweako.

³Te na xas či khă buti skîrboso.

⁴Dikta le juvindimata kai trăbul te xas le: o guruw, e bakri thai e busni;

⁵o čerbo, e busneori thai o guruwkallo; o zimbro, e busni kali, e busni văšuni thai e jirafa.

⁶Te na xan anda orsao juvindimos kai sî les e kopita pitărdi, e undia xuladi ande donde thai xalčear.

⁷Ta te na xan anda kola kai xančear dăsar, or save sî dăsar e kopita xuladi ande donde. Kadeadar, te na xan e kămila, o šošoi thai o šošoi le khărăhko, kai xančear, ta nai le e kopita xuladi: te dikhăn le sar marime.

⁸Te na xan o ballo, kai sî les e kopita xuladi, ta na xalčear; te dikhăn les sar marime. Te na xan anda lengo mas, thai te na thon o vast pe lengă staturea le mulle.

⁹Dikta le juvindimata anda save xana, anda sa kukola kai sî ando pai: te xan anda sa kukola kai sî le naimahkă thai solzea.

¹⁰Ta te na xan anda či iekh kai nai les naimahkă thai solzea: te dikhăn le sar marime.

¹¹Te xan or savi čirikli bimarime.

¹²Ta dikta kukola lai či daštin te xan le: o vulturo, o gripsoro, thai o vulturo la mareako;

¹³o xîrçaro, o šoimio, e gaia thai sa so nikărăl lengă neamostar;

¹⁴o korbo thai sa lehkă soiurea;

¹⁵o štruço, e kukumeaua, o pekărelo, o koroio thai so nikărăl lehkă neamostar;

¹⁶o xuxurezo, o kokostîrko thai e lebăda;

¹⁷o pelikano, o korbo la mareako thai o xereto,

¹⁸e barza, o bătlano thai so nikărăl lehkă neamostar, e pupăza thai o liliako.

¹⁹Te dikhăn sar marime orsavi çîrditoarea kai xureal: te na xan anda late.

²⁰Te xan orsavi čirikli bimarime.

²¹Te na xan anda či khă mărtăčina; te den la koa străino kai avela ande te četăçi, te xal la, or te bitines la khă strinohkă; kă tu san khă poporo sfînto anda o Rai, o Dell tiro.Te na tiraves o iedo ando thud lehka deiako.

²²Te les dešimos anda sa so anela tukă e sămînça, anda so anela tukă ti phuw ande sako bărši.

²³Thai te xas angla o Rai o Dell tiro, ando than kai alosarăla les kaste thol Pehko Anau oče, o dešimos anda teo div, andoa musto tiro, anda o zetino tiro, thai le anglal kărdine anda e čireada thai ti turma, kaste sîteos te daras orkana andoa Rai, o Dell tiro.

²⁴Daštila kana delatudumadămišto o Rai, o Dell tiro, o drom avela but dureardo kaste nigărăs teo dešimos oče, kă sî but dureardo o than kai alosarăla les o Rai, o Dell tiro, kaste thol Pehko Anau oče.

²⁵Atunčeara, te paruves teo dešimos ande rupeste, te tides o rup kodoa ando vast, thai te jeas koa than kai alosarăla les o Rai, o Dell tiro.

²⁶Oče, te tines le rupesa kodolesa sa so kamesa: guruwa, bakrea, moll thai pimata zurale, sa so čeaileola tu, te xas le angloa Rai, o Dell tiro, thai te vesălis tu, tea familiasa.

²⁷Te na mekăs le Levitos kai avela ande te četăçi, kă nai les či rig phuweati, či mandimos sar tute.

²⁸Pala trin bărši, te ankalaves soa dešimos anda so sî tu ando trinto bărši te thos les ande le četăçi tiră.

²⁹Atunčeara te avel o Levito, kai nai les či rig phuweati tusa, o străino, o bidaddehko, e phiwli, kai avena ande tiră četăçi, thai te xan thai te čeailon, anda kă o Rai, o Dell tiro, te deltudumadămišto ande sa le butea kai kărăsa le te vastença.