Read Kalderash Romani Cornilescu Bible 2020 (Romania) Deutronomul 22 Bible Online

Deutronomul 22 - Kalderash Romani Cornilescu Bible 2020 (Romania) bible

Deutronomul 22

¹Kana dikhăs kă xasai'lo o guruw or e bakri te phralesti, te na kărdeos kă či dikhăsle, nigăr le te phralehkă.

²Kana teo phral či bešel paša tute, thai či prinjeanes les, te les o juvindimos tute khără, thai te ašel tute ji pune mangăles teo phral; thai atunčeara te des lehkă les.

³Sa kadea te kărăs i lehkă katîrosa, sa kadea te kărăs i lehka raxameasa, thai sa kadea te kărăs orsavea buteasa xasardi lestar thai arakhli tutar: te na kărdeos kă či dikhăs le.

⁴Kana dikhăs o katîri te phralehko or lehko guruw perado po drom, te na kărdeos kă či dikhăs les, ta te kandes les te vazdel pe.

⁵E juwli te na phiravel xureaimata muršane, thai o murši te na xureavel pe çoalença juwlikane; kă orkon kărăl kadala butea sî khă prikăjimos angloa Rai, o Dell tiro.

⁶Kana arakhăs po drom khă kuibo čirikleako, ande khă kašt or pe phuw, puiença or anrănça thai lendi dei bešlindoi pal pui or pal anŕă, te na les i la deia thai i lakă puien,

⁷ta te des drom la deia thai te les numai le puien, kaste aves baxtalo thai te aven tu des but.

⁸Kana vazdes khă khăr neo, te kărăs tukă khă than karing o berand, kaste na anes doši ratesti pa teo khăr, te perăla varekon pa leste.

⁹Te na thos ande phuw ande ti răz dui mode sămănçăngă, ka na varesar te maris o rodo la sămînçako kai thodean ande phuw thai la răzako.

¹⁰Te na aboldes e phuw khă guruwesa thai khă katîrosa andekhthan ando jugo.

¹¹Te na phiraves khă raxami astardi anda mai but mode, anda e pošom thai inoste andekhthan.

¹²Te kărăs čiukuri ka kukola štar kolçuri la raxameakă savi thosala pa tute.

¹³Kana khă manuši, kai lea pehkă khă romni, thai phandi'lo lasa, či mai dabadikhăla,

¹⁴pala kodea, došarăla buteandar bikărdimahkă thai ankalavel lakă khă anau jungalo, phenindoi: „Lem kadala juwlea, pašilem paša la, thai či arakhlem la šei bari,”

¹⁵atunčeara o dadd thai e dei la šeati te lel le semne lakă šeimahkă thai te anele angla le phură le četateakă, koa udar.

¹⁶O dadd la šeako te phenel le phurăngă: „Dem mîŕa šea dă romni le manušehkă kadalehkă, thai o lea te na mai dikhăla;

¹⁷akana došavela buteandar bikărdimahkă, phendindoi: „Či arakhlem šeibari tea šea.” Ta dikhăn le semne lakă šeimahkă.” Thai te pîtărăl lati raxami angla le phură la četateakă.

¹⁸Le phură la četateakă te len atunčeara kodole manušes thai te došavenles;

¹⁹Thai, anda kă andea khă anau jungalo kha šeiakobareako andoa Israelo, te thon les te potinel ăkh šell siklea rupune, save te del le daddes la šeakărăs. Oi te ašel lesti romni, thai o naštila te našavela sa pesti čivava.

²⁰Ta kana e fapta sî čeači, kana e šei či arakhadili šeibari,

²¹te ankalavel la šea koa udar le khărăhko pehkă daddehko; thai te avel mudardi baŕănça le manušendar anda e četatea, thai te merăl, anda kă kărdea khă lajeau ando Israelo, kurvărišind ando khăr pehkă daddehko. Te randes kadea o nasul anda teo maškar.

²²Kana arakhadeola khă murši suto kha juwleasa măritime, te merăn lidui: o murši kai suto la juwleasa, thai e juwli.Te randes kadea o nasul andoa maškar le Isrtaelohko.

²³Kana khă šeibari sî tomnime, thai arakhăla khă manuši ande četatea thai sovel lasa,

²⁴te anen le lidon koa udar la četateako, te mudarăn le baŕănça, thai te merăn lidui: e šei anda kă na deamui ande četatea, thai o manuši, anda kă deapolajau la romnea pehkă pašehkărea. Te randes kadea o nasul anda teo maškar.

²⁵Ta kana o manuši kodoa arakhăl po kîmpo kha šeia tomnime, lela zorasa thai sovel lasa, numai o manuši kai suto lasa te avel došaldo le mullimasa.

²⁶La šeakă te na kărăs lakă khanči; oi nai došaldi kha došasa barimasti sar o došimos le mullimasa, kă sî sar i khă manuši kai šudel pe pa pehko pašo thai mudarăles.

²⁷E šei e tomnime, kai arakhlea la o manuši kodoa po kîmpo, daštisardea te delmui bi te avel varekon te xutel te skăpila.

²⁸Kana khă manuši arakhăl khă šeibari bitomnime, lela zorasa thai sovel lasa, thai kărdeola pe te aven astarde,

²⁹o manuši kai suto lasa te del koa dadd la šeako panvardeši sikli rupune; thai, anda kă deala po lajau, te lela dă romni, thai naštila te našavela, sa pesti čivava.

³⁰Khonikh te na lel la romnea pehkă daddesti, thai či te na vazdel e perina pehkă daddesti.