Read Kalderash Romani Cornilescu Bible 2020 (Romania) Deutronomul 25 Bible Online

Deutronomul 25 - Kalderash Romani Cornilescu Bible 2020 (Romania) bible

Deutronomul 25

¹Kana dui manuši avela le khă xolli maškar lende, thai avena angla e kris te aven krisînime, kolehkă bidošalo te des les drom, ta le došales te došaves les.

²Kana kukoa o došalo sî krisînime te avel mardo, o krisinitori te thol les te tinzol pe kai phuw thai te deles angla leste khă dindimos mardimata pala o pharimos leghka došako.

³Te na thol te deles mai but dă štarvardeši malaimata, ka na varesar, dindoi les mai but malaimata sar kaditi, teo phral te avel lajavehko angla tute.

⁴Te na phandes o mui le guruwehko kana tidel pe o div.

⁵Kana le phral bešena ande khă than thai, iekh anda lende merăla bi te mekăl šeave, e romni le mullesti te na măritil pe avri khă străinosa, ta o šogoro lako te jeal late, thai te lela dă romni, thai te phandel pe lasa sar o šogoro.

⁶O anglal kărdino, kai avela le, te lel le mandimata le phralehkă le mullehkă thai te phiravel lehko anau, anda ka o anau kadoa te na avel khoslo andoa Israelo.

⁷Kana o manuši kadoa či kamel te lel pehka šogoriça, oi te anklel koa udar la četateako, kal phură, thai te phenel: „Muro kumnato či kamel te vazdel ando Israelo a anau pehkă phralehko, či kamel te lel ma dă romni pala o čeačimos le kumnatohko.”

⁸Le phură la četateakă te akharăn les, thai te den lehkă duma. Kana o nikrăla pe iekh, thai phenel: „Či kamau te lau la,”

⁹atunči lesti kumnata te pašol lestar angla le phură, te ankalavel lehkă le papučea andal pînŕă, thai te čiungarde les ando mui. Thai lindoi o divano, te phenel: „Kadea te kărdeol le manušehkă kai či kamel te vazdel o khăr pehkă phralehko.”

¹⁰Thai lehko khăr bušola ando Israelo „o khăr kolehko pînŕango.”

¹¹Kana dui manuši xana pe iekh avrăsa, thai e romni iekhăsti avela te ankalavel pehkă romes anda o vast kolehko kai marăles, te tinzola o vast thai astarăl kadales mai palal le buteandar le lajane,

¹²te šines lako vast: te na fal tu či khă nasul latar.

¹³Te na avel tu ande teo gono dui mode pharimata, iekh mai bari thai iekh mai çîkni.

¹⁴Te na aveltu ando khăr dui mode pharimahkă, iekh bari thai aver çîkni.

¹⁵Ta te avel tu khă pharimos čeačeo thai orta, te avel tu khă tol čeači thai orta, kaste aven tu des but ando čem kai del tukă les o Rai, o Dell tiro.

¹⁶Kă orsao kărăl kadala butea, orsao kărăl khă bandimos sî khă prikăjimos angloa Rai, o Dell tiro.

¹⁷An tukă gpdi so kărdea tukă o Amalek po drom, koa ankăstimos tumaro andoa Ejipto:

¹⁸sar arakhlea tu po drom, thai, bi či kha darako le Devllestar, šudea pe pa tute dă palal, pa sa kukola kai avenas palal kai çîrdenas pe ande pori, kana sanas ašado thai bi zorăngo.

¹⁹Kana dela tu o Rai, o Dell tiro, xodinimos, pala so skăpila tu sa te dušmaiendar pa sal riga, ando čem kai o Rai, o Dell tiro, dela tukă les mandimos thai ando stăpînimos, te khosăs o anau le Amalekohko tala le čerurea: te na bîstrăs e buti kadea.