Read Kalderash Romani Cornilescu Bible 2020 (Romania) Deutronomul 32 Bible Online

Deutronomul 32 - Kalderash Romani Cornilescu Bible 2020 (Romania) bible

Deutronomul 32

¹Len godi čeruri, thai daua duma; Ašunta, phuw, le divanuri mîŕă mohkă.

²Sar o brîšind te šordeon le sîkaimata mîŕă, Sar e iasflačeareati te perăl o divano muŕo, Sar o brîšind iekhatar po zălenimos, Sar le piteaimata le brîšindehkă pe čear!

³Kă vestiua o Anau le Raiehko. Den slava le Devllehkă amarăhkă!

⁴O sî o Kotorlebaŕăhko; Lehkă butea sî mištokărdine, Kă sa le droma Lehkă sî orta; O sî khă Dell pateamahko thai bi nenčiačimahko. O sî orta thai ujo.

⁵On čioŕaile; O bilašimos Lehkă šeavengo, sî lengo lajaimos! Neamo biašndimahko thai rimome!

⁶Le Raies potinen kadea! Poporo bigodeako thai bixarano! Nai O kadea tiro Dadd, kai kărdea tu, Lašardea tu, thai dea tu čivava?

⁷Antukă godi le desăndar andal puraimata, Din le bărši, le bărši le manušengă pala le bărši le manušengă, Puši te daddes, thai sîkavela tu, Te phurăn, thai phenena tukă.

⁸Kana Kukoa Obut Baro dea khă mandimos le neamurengă, Kana xuladea le šeaven le manušengărăn, Thodea gor le phuweangă, Pala o dindimos le šeavengo le Israelohkă,

⁹Kă e rig le Raiesti, sî Lehko poporo, O Iakovo sî e rig lesti le mandimatasti.

¹⁰O arakhlea les ande khă phuw pusto, Ande khă korkorimos pherdo çîpimatăngo darane; Thai arakhlea les sar e duda Lehkă iakhati.

¹¹Sar o vulturo kai činol pehko kuibo, Xureal opral le puiengo, Tinzol pehkă phaka, lel le, Thai phiravel le pe lehkă por:

¹²Kadea phiradea o Rai korkoŕo Pehkă poporos, Thai nas či khă del străino Lesa.

¹³Ankaladea les pe le učimata le čemehkă, Thai o Israelo xalea le roade le kîmpohkă, Dea les te pel avdin anda o kotorlebaŕăhko, O zetino kai anklel anda o kotorlebaŕăhko o mai zuralo,

¹⁴E čil katal gurumnea thai o thud le bakreango, La khoiasa le bakrišendi, Le bakrăndi andoa Basano thai le busnengo, Le thulimasa le divehko, thai pilean moll, o rat le strugurohko.

¹⁵O Israelo thulilo, thai dea andoa punŕo; Thulilean, thuleailean thai buflilean! Thai mukle le Devlles, lehko Vazditori, Dea rigate o Kotorlebaŕăhko lehka skăpimahko,

¹⁶Açîçîsarde Les kai gelozia anda le del le străinea, Xolearde Les andal prikăjimata;

¹⁷Andine jertfe le bengăngă, le idolengă kai nai del, Ka iekh del kai či prinjeanenas le, Del neve, avinde dă iekhatar, Savendar či darailesas tumară dadda.

¹⁸Mukleano Kotorlebaŕăbarăhko kukoa kai kărdea tu, Thai bîstărdean le Devlles kai dea tu čivava.

¹⁹O Rai dikhlea kadea buti, thai xoleai'Lo, Xoleai'Lo pe le šeave thai le šeia Lehkă.

²⁰O phendea: „Garavaua Muŕo Mui lendar, Thai dikhaua sao avela lengo gor, Kă sî khă neamo rimome, Sî varesar šeave bipateamahko.

²¹Astardine Mîŕî gelosia anda so nai Dell, Xolearde Ma pehkă idolença khančehkă; Thai Me astaraua le la gelosiasa anda khă poporo kai nai khă poporo. Xolearaua le anda khă neamo biprinjeandimahko.

²²Kă e iag Mîŕa xolleati astardili, Thai phabola ji ando fundo le thanehko le mullengo, Xasarăla e phuw thai le roade lakă, Phabarăla le temelii le baŕăbarăngă.

²³Tidaua sa le prikăjimata pa lende, Šudaua sa Mîŕă săjeçi pa lende.

²⁴Avena bilade bokhatar, mudarde šilendar, Thai boalendar phară; Tradaua ande lende le dand le juvimatăngă văšune Thai e otrava le sapendi.

²⁵Avri, merăna sabiatar, Thai andră, merăna daratar: I o tărno thai i e šei, I o šeaoŕo la čiučeako sar i o phuro.

²⁶Kamauas te phenau: „Laua le khă phurdimasa,” Khosaua lendi pomenirea maškar le manuši!

²⁷Ta Mangă dar anda le phendimata le dušmanohkă, Mangă dar ka na varesar le dušmaia lengă te denpebară, Thai te phenen: Amaro vast o zuralo, Thai na o Rai kărdea sa kadala butea.”

²⁸On sî khă neamo kai xasarde pehko lašo atearimos, Thai nai prinjeandimos ande lende.

²⁹Te avino xarane, sahkă atearăn, Thai sahkă den pe godi ka so sî te avel lengă.

³⁰Sar phirăla iekh korkoŕo pala iekh mia anda lende, Sar thona dui po našimos deši mii, Te na bitindinole o Kotorlebaŕăbarăhko, Te na bitindinole o Rai?

³¹Kă lengo kotorlebaŕobaro nai amaro Kotorlebaŕăhkbarăhko, Le dušmaia amară orta sî le krisînitorea ande kadoa dičimos.

³²Lendi răz sî andoa than la Sodomako, Thai le phuwea la Gomorakă; Le drakha lengă sî drakha otrăvime, Le bombiç lengă sî kărkă;

³³E moll lendi sî venino sapengo, Sî otrava zurali aspidati.

³⁴Ta nai kadea buti garadi Mande, Pečetluime ane le mandina Mîŕă?

³⁵Muŕo sî o amboldimosparpale thai Me potinaua, Kana avela te istral lengo punŕo! Kă o des lengă prikăjimahko sî paše, Thai kodea so ajukră le či nai te avel.”

³⁶O Rai krisînila Pehkă poporos, Ta avelales mila Lehkă robendar, Dikhlindoi kă e zor lendi xasardila, Thai kă manai či robo či biphanglo.

³⁷O phene la: Kai sî lengă del, O kotorlebarăbarăhko kai sas le kandimahko,

³⁸Le del kukola kai xanas o thulimos lengă jertfengo, Kai penas e moll le jertfendi lengă pimasti? Te ušten, thai te kanden tume, Thai te aven paša tumende!

³⁹Te jeanen kadea kă me sîm o Dell, Thai kă nai aver del avri Mandar; Me dau čivava thai Me mudarau, Me dukhavau thai Me sastearau, Thai khonikh našti ankalavel varekas anda Muŕo vast.

⁴⁰Kă vazdau Muŕo vast karing o čeri, Thai phenau: „Sode sî dă čeačimos kă traiu ando veako,

⁴¹Kaditi sî dă čeačeo kă atunčeara, Kana askuçîua o trăsneto Mîŕa sabiako, Thai thoaua o vast te kărau kriss, Amboldauamaparpale pa sa Mîŕă potrivničea, Thai došavaua kolen kai čidabadikhăn Ma;

⁴²Mîŕă sabia nakhavela lengo mas, Thai materaua Mîŕă săjeçi ratesa, Andoa rat kolengo mudarde thai astarde, Andal sa le šerăbarăngo le dušmaiengo.”

⁴³Neamurea, dilabana le laude Lehkă poporohkă! Kă o Rai amboldelparpale o rat Pehkă robengo, Oaboldelpeparpale karing Lehkă potrivničea, Thai kărăl iertimos andoa čem Lehko, anda Lehko poporo.”

⁴⁴O Moise avilo thai phendea sa le divanuri la dileakă kadalakă angloa poporo; o Iosua, o šeau le Nunohko, sas lesa.

⁴⁵Pala so isprăvisardea o Moise te phenel kadala divanuri angloa sa o Israelo,

⁴⁶phendea lengă: „Thon tumengă koa illo sa kadala divanuri kai solaxama ades te mothon le tumară šeavengă, kaste arakhăn thai te pherăn sa le divanuri kadala krisakă.

⁴⁷Kă nai khă buti bi avimahko anda tumende; sî e čivava tumari, thai anda kadea lunjeona tumară des ando čem kai lena les ando stăpînimos, pala so nakhăna o Iordano. O Rai del duma le Moisahkă.

⁴⁸Ande kodoa des, o Rai dea duma le Moisaskă, thai phendea:

⁴⁹Ankli po baŕbaro kadoa o Abarim, po baŕobaro o Nebo ando čem le Moabohko, angloa Ierixono; thai dikh o čem le Kanaanohko sao dau les ando stăpînimos le šeavengă le Israelohkă.

⁵⁰Tu merăsa po baŕbaro pe sao anklesa, thai avesa thodino koa poporo tiro, pala sar o Arono, teo phral, mullo po baŕobaro o Xor thai sas thodino ka pehko poporo,

⁵¹anda kă bezexardean angla Mande ando maškar le šeavengo le Israelohkă, pašea le paia Meriba, ando Kades, ande pustia Çin, thai či sfinçosardean Ma ando maškar le šeavengo le Israelohkă.

⁵²Tu dikhăsa numai dă dural o čem angla tute, ta či šosa tu ando čem kai daua le šeaven le Israelohkărăn.