Read Kalderash Romani Cornilescu Bible 2020 (Romania) Ioan 1 Bible Online

Ioan 1 - Kalderash Romani Cornilescu Bible 2020 (Romania) bible

Ioan 1

¹Mai anglal sas o Divano, thai o Divano sas le Devllesa, thai o Divano sas o Dell.

²O sas dă anglal le Devllesa.

³Sal butea sas kărdine anda Leste; thai khanči anda so sas kărdo, nas kărdo bi Lehko.

⁴Ande Leste sas e čivava, thai e čivava sas e lumina le manušendi.

⁵E lumina străfeal ando tuneriko, thai o tuneriko či nakhadeala.

⁶Avilo khă manuši tradino le Devllestar: o anau lehko sas Ioano.

⁷O avilo sar martoro, te delduma pa e Lumina, anda ka saoŕă te patean anda leste.

⁸Nas o e Lumina. Ta o avilo te delduma pa e Lumina.

⁹E Lumina kadea sas e čeači Lumina, kai străfeal orsave manušes, avindoi ande lumea.

¹⁰O sas ande lumea, thai e lumea sas kărdi Lestar, ta e lumea či prinjeandea Les.

¹¹Avilo ka Pehkă, thai Lehkă či primisarde Les.

¹²Ta saoŕăngă kolengă kai primisarde Les, kolengă kai patean ande Lehko Anau, dea le o čeačimos te kărdeon šeave le Devllehkă;

¹³Kărdine na andoa rat, čina anda o kamimos lengo, čina andoa kamimos vokh manušehko, ta andoa Dell.

¹⁴Thai o Divano kărdi'lo stato, thai bešlo maškar amende, pherdo xaro thai čeačimos. Thai ame dikhleam e slava Lesti, khă slava orta sar e slava le korkorăhko kărdo andoa Dadd.

¹⁵O Ioan deaduma pa Leste, kana çîpisardea: „O sî Kukoa pa sao phendemas me: „Kukoa kai avel pala mande, sî angla mande, angla kă sas anglal mandar.”

¹⁶Thai ame saoŕă leam andoa pherdimos Lehko, thai xaro pala xaroste;

¹⁷kă e kris sas dini andoa Moise, ta o xaro thai o čeačimos avile andoa Isus Kristoso.

¹⁸Khonikh či dikhlea vokh data le Devlles; korkoŕo Lehko Šeau, kai sî ando bărkh le Daddehko, Kodoa kărdea Les prinjeando.

¹⁹Dikta o dimosduma phendino le Ioanostar, kana le Iudeia tradine andoa Ierusalimo varesar raša thai Leviçea te pušen les: „Tu kon san?”

²⁰O deaduma thai či deapeparpale: phendea kă o nai o Kristoso.

²¹Thai on pušline les: „Ta kon san? San o Ilia?” thai o phendea: „Či sîm!” „San prooroko?” Thai o deas anglal: „Či!”

²²Atunčeara phendine lehkă: „Ta kon san? Kaste dašti phenas kolengă kai tradea me. So phenes tu korkoŕo pa tute?”

²³„Me”, phendea o, „sîm o mui kolehko kai çîpil ande pustia: „Orton o drom le Raiehko”, sar phendea o prooroko o Isaia.”

²⁴Le tradine sas andai rig le Fariseiendi.

²⁵On mai thodine lehkă kakoa pušlimos: „Atunčeara sostar boles, kana či san o Kristoso, či o Ilia, či o prooroko?”

²⁶Orta čeačimos, o Ioano phendea lengă: „Me bolau paiesa; ta ando maškar tumaro bešel Iekh, kai tume či prinjeanen Les.

²⁷O sî Kodoa kai avel pala mande, — thai kai bešel angla mande; me na sîm vreaniko te pîtrau Lesti aravli Lehkă podimasti.”

²⁸Kadala butea sas kărdine ande Betabara, înteal o Iordano, kai bolelas o Ioano.

²⁹Ando duito des, o Ioan dikhlea le Isusos avindoi leste, thai phendea: „Dikta o bakrišo le Devllehko, kai vazdel o bezex la lumeako!

³⁰O sî Kodoa pa sao phenauas: „Pala mande avel khă manuši, kai sî angla mande, kă sas angla mande.

³¹Me či prinjeanauas Les, ta orta anda kodea avilem te bolau paiesa: Ka O te avel kărdo prinjeando le Israelohkă.”

³²O Ioano kărdea kadoa phendimos: „Dikhlem o Duxo ulindoi andoa čeri sar khă gulumbo thai atărdi'lo pa Leste.

³³Me či prinjeanauas Les; ta Kukoa kai tradea ma te bolau paiesa, phendea mangă: „Kodoa pa sao dikhăsa o Duxo ulindoi thai atărdeardoi, sî kukoa kai bolel Sfîntone Duxoasa.”

³⁴Thai me dikhlem e buti kadea, thai phendem kă O sî o Šeau le Devllehko.”

³⁵O duito des, o Ioan bešelas pale duie jenença lehkă.

³⁶Thai, ta kana dikhlea le Isusos phirindoi, phendea: „Dikta o bakrišo le Devllehko!”

³⁷Le dui jene ašunde les phendindoi kadala orbe, thai găline pala o Isus.

³⁸O Isus amboldea pe, thai, kana dikhlea le kă jean pala Leste, phendea lengă: „So roden?” On dine Les anglal: „Rabi (kai, amboldino, sî Sîkaitorina), kai bešes?”

³⁹„Aven ta dikhăn”, phendea lengă O. Găline thai dikhline kai bešelas; thai ando des kodoa ašile Leste. Sas kam koa čeaso le dešengo.

⁴⁰Iekh anda kukola dui, kai ašundinesas le divanuri le Ioanohkă thai gălesas pala o Isus, sas o Andrei, o phral le Simon Petrohko.

⁴¹O, kukoa anglal, arakhlea pehkă phrales le Simonos, thai phendea lehkă: „Ame arakhleam le Mesias” (kai, amboldino sî Kristoso).

⁴²Thai nigărdea les koa Isus. O Isus dikhlea pe leste, thai phendeas: „Tu san o Simono, o šeau le Ioanahko; tu bušosa Chifa „(kai, amboldino sî Petro).

⁴³O duito des kamblea te jeal ande Galilea, thai arakhlea le Filipos. Thai phendea lehkă: „Av pala Mande.”

⁴⁴O Filip sas anda e Betsaida, e četatea le Andreiesti thai le Petrosti.

⁴⁵O Filip arakhlea le Natanaelos, thai phendea lehkă: „Ame arakhleam Kukoles, pa sao ramosardea o Moise ande Kris, thai le prooročea: le Isusos andoa Nazareto, o šaeu le Iosifohko.

⁴⁶O Natanelo phendea lehkă: „Dašti anklel vareso lašo andoa Nazareto?” „Av thai dikh!” dea les anglal o Filip.

⁴⁷O Isus dikhlea le Natanaelos avindoi Leste, thai phendea pa leste: „Dikta čeačimasa khă Israelito, ande sao nai čiorimos.”

⁴⁸„Katar prinjeanes ma?” phendea Lehkă o Natanaelo. Čeačio phendimos o Isus phendea lehkă: „Dikhlem tu mai anglal kaste bušos Filip, kana sanas tala o smoitino.”

⁴⁹O Natanaelo dea Les anglal: „Rabi, Tu san o Šeau le Devllehko, Tu san o Thagar le Israelohko!”

⁵⁰Čeačio phendimos, o Isus phendea lehkă: „Anda kă phendem tukă kă dikhlem tu tala o smoitino, pateas? Butea mai bară dă sar kadala dikhăsa.”

⁵¹Pala kodea phendea lehkă: „Čeačimasa, čeačimasa, phenau tumengă, kă, dă akanara întea, dikhăna o čeri pîtărdo thai le înjeren le Devllehkă sar anklen thai ulen poa Šeau le manušehko.”