Read Kalderash Romani Cornilescu Bible 2020 (Romania) Ioan 10 Bible Online

Ioan 10 - Kalderash Romani Cornilescu Bible 2020 (Romania) bible

Ioan 10

¹Čeačes, čeačes, phenau tumengă, kon či šol pe poa udar le çîrkosti le bakreandi, thai xutel pa aver rig, sî ăkh čior thai ăkh mudarditori.

²Ta kon šol pe poa udar, sî o bakreari le bakreango.

³O udari pîtărăl lehkă, thai le bakrea ašunene lehko mui; o akharăl pehkă bakrean po anau, thai ankalavel le avri andoa çarko.

⁴Pala so ankaladea sa pehkă bakrean, jeal angla lende; thai le bakrea jean pala leste, anda kă prinjeanen lehko mui.

⁵Či jean le bakrea dălokh pala khă străino; našen lestar, anda kă či prinjeanen o mui le străinohko.”

⁶O Isus phendea lengă kadea paramiči, ta on či ateardine pa soste dea lengă duma.

⁷O Isus mai phendea lengă: „Čeačes, čeačes, phenau tumengă kă Me sîm o udar le bakreango.

⁸Sa kukola kai avile angla mande, sî čior thai mudarditorea; ta le bakrea či ašundine lendar.

⁹Me sîm o Udar. Kana šol pe varekon ande Mande, avela skăpime; šola pe thai anklela, thai arakhăla čeareakothan.

¹⁰O čior či avel numai te čiorăl, te delšuri, thai te mudarăl. Me avilem ta le bakrea te avele čivava, thai te avel ando butimos.

¹¹Me sîm o Bakreari o lašo. O Bakreari o lašo del pesti čivava anda le bakrea.

¹²Ta kukoa o potindo, kai nai bakreari, thai savehkă bakrea nai lehkă, kana dikhăl o ruw avindoi, mekăl le bakrean thai našel; thai o ruw čiorăle thai pharavele.

¹³Kukoa o potindo našel, anda kă sî potindo, thai či fales andal bakrea.

¹⁴Me sîm o Bakreari o lašo.Me prijeanau Mîŕă bakrean, thai on prinjeanen Ma Man,

¹⁵kadea sar prijeanelma Man o Dadd, thai sar prinjeanau Me le Daddes; thai Me dau Mîŕă čivava anda Mîŕă bakrea.

¹⁶Mai sî ma i aver bakrea, kai nai andai stîna kadea; thai i kodolen trăbul te anau le. On ašunena mîŕă muiestar, thai avela khă turma thai khă Bakreari.

¹⁷O Dadd kamel ma, anda kă dau Mîŕî čivava, ka pale te lau la.

¹⁸Khonikh či lel mangăla la zorasa, ta dau la Me Mandar.Sîma zor te dau la, thai sîma zor te lau la pale: koadoa sî o mothodimos, kai lem les kata Muro Dadd.”

¹⁹Anda e doši kadale divanurendi, pale kărdi'lo pharadimos maškar le Iudeia.

²⁰But anda lende phenenas: „Sî les beng, sî dilo; sostar ašunen Les?”

²¹Aver phenenas; „Le divanuri kadala nai divanuri bengailehkă; daštil khă beng te pîtîrăl le iakha le koŕăngă.”

²²Ando Ierusalimo prăznuilas pe o prazniko Le Nevimahko le Templohko. Sas iwend.

²³Thai o Isus phirălas andoa Templo, tala o pridvoro le Solomonohko.

²⁴Le Iudeia dinelesroata, thai phende Lehkă: „Ji kana nikărăs amaro dii çapăno? Kana san o Kristoso, phen amengă čeačes.”

²⁵„Phendem tumengă”, dea le anglal o Isus, „thai či patean. Le butea, kai Me kărau le, ando Anau Mîŕă Daddehko, on denduma pa Mande.

²⁶Ta tume či patean, anda kă, pala sar phendem tumengă, či san anda Mîŕă bakrea.

²⁷Mîŕă bakrea ašunen Muŕo mui; Me prinjeanau le, thai on aven pala Mande.

²⁸Me dau le e čivava e vešniko, ando veako či xasaona, thai khonikh či çîrdela le anda Muŕo vast.

²⁹Muŕo Dadd, kai dea Mangă le, sî mai baro dă sar sa; thai khonikh našti çîrdele anda o vast Mîŕă Daddehko.

³⁰Me thai o Dadd iekh sam.

³¹Atunčeara le Iudeia pale line baŕ kaste mudarăn Les.

³²O Isus phendea lengă: „Sîkadem tumengă but butea lašea, kai aven kata Muŕo Dadd: anda save kadala butea šuden le baŕănça ande Mande?”

³³Le Iudeia dine Les anglal: „Na anda khă buti laši šudas ame le baŕănça ande Tute, ta anda khă prasaimos, thai anda kă Tu, kai san khă manuši, Tu kărdeos o Dell.”

³⁴O Isus dea le anglal: „Nai ramome ande tumari Kris: „Me phendem: San Devlla?”

³⁵Kana e Kris dea anau „devlla”, kolen, kai dea lengă duma o Divano le Devllehko, — thai o LillleDevllehko našti avel pharado, —

³⁶sar phenen tume kă prasau Me, kai o Dadd sfinçosardea Ma thai trdea Ma ande lumea? Thai kadea, anda kă phendem: „Sîm o Šeau le Devllehko!”

³⁷Kana či kărau le butea Mîŕă Daddehkă, patean Ma, te na patean Ma.

³⁸Ta kana kărau le, orta kana či patean Ma Man, patean barem le butea kadala, kaste arăsăn te prinjeanen thai te jeanen kă o Dadd sî ande Mande thai Me sîm ando Dadd.”

³⁹Koa ašundimos kadale orbengo, rodenas pale te astarăn Les; ta O skăpisardea anda lengă vast.

⁴⁰O Isus gălo pale înteal le Iordanostar, ando than kai boldeasas o Ioan dă anglal. Thai ašilo oče.

⁴¹But avenas Leste, thai phenenas: „O Iano či kărdea či khă sămno, ta sa so phendeas o Ioan poa manuši kadoa, sas čeačes.”

⁴²Thai but pateaine ande Leste ando than kodoa.