Read Kalderash Romani Cornilescu Bible 2020 (Romania) Ioan 2 Bible Online

Ioan 2 - Kalderash Romani Cornilescu Bible 2020 (Romania) bible

Ioan 2

¹O trito des kărdilea khă abeau ande Kana andai Galilea. E dei le Isusosti sas oče.

²Thai koa abeau sas akhardo i o Isus Pehkă jenença.

³Kana manas moll, e dei le Isusosti phendea Lehkă: „Manai le moll.”

⁴O Isus dea la anglal: „Juwlie, so sî Ma te kărau Me tusa? Či avilo akana Muŕo čeaso.”

⁵Lesti dei phendea le kanditorengă: „Te kărăn orso phenela tumengă.”

⁶Thai oče sas šov vasurea baŕăhkă, thodine pala o phurikano ujimos le Iudeiengo; thai ande sako vaso šonas pe po dui or trin kănçi.

⁷O Isus phendea lengă: „Pherăn kadala vasuri paiesa.” Thai pherde le ji opră.

⁸„Ankalaven akana,” phendea lengă O, thai „anen le tirveskă.” Thai andine lehkă:

⁹O tirvo, pala so zumadea o pai kărdino moll, — o či jeanelas katar avel e moll kadea (ta le kanditorea, kai ankaladesas o pai, jeanenas), akhardea le tărnes,

¹⁰thai phendea lehkă: „Orsao manuši thol kai skafidi anglal e moll e mai laši; ta tu nikărdean e moll e la ši ji akana.”

¹¹Kadoa sas anglal anda le sămnuri le Isusoskă kărdino ande Kana andai Galilea. O sîkadea Pesti slava, thai le jene Lehkă pateaine ande Leste.

¹²Pala kodea ulisto ando Kapernaum, andekhthan la dasa, le phralença thai le jenença Pehkă; thai oče či ašiline but des.

¹³E Patradi le Iudeiendi sas paše; thai o Isus ankăsto ando Ierusalimo.

¹⁴Ando Templo arakhlea kolen kai bitinenas guruv, bakrea thai gulumbea, thai le paruglitoren le lovengă, bešlindoi tele.

¹⁵Kărdea khă bičio anda le šele, thai ankaladea saoŕăn avri andoa Templo, andekhthan le bakreança thai le guruvença; šordea le love le paruglitorengă, thai dea lengă muial le skafidea.

¹⁶Thai phendea kukolengă kai bitinenas le gulumbea: „Vazden kadala koçal, thai na kărăn andoa khăr Mîŕă Daddehko ăkh khăr bitindimahko.”

¹⁷Lehkă jene andine pehkă godi kă sî ramome: „O kamimos andoa khăr Tiro xalma Man.”

¹⁸Le Iudeia line o divano, thai phende Lehkă: „Save sămnosa sîkaves amengă kă sî tu zor te kărăs kadala butea?”

¹⁹Čeačio phendimos, o Isus phendea lengă: „Rimon o Templo kadoa, thai ande trin des vazdaua les.”

²⁰Le Iudeia phende: „Trăbuisarde štarvardeši thai šou bărši, kaste vazdel pe o Templo kadoa, thai Tu vazdesa les ande trin des?”

²¹Ta o delas lengă duma poa Templo Lehkă statohko.

²²Orta anda kodea, kana ušti'lo anda le mulle, le jene Lehkă andine pehkă godi kă phendeasas lengă le orbe kadala; thai pateaine o LilleDevlehko thai le divanuri kai phendeasas le o Isus.

²³Ta kana sas o Isus ando Ierusalimo, koa prazniko la Patradeako, but pateaine ando Anau Lehko; kă dikhănas le sămnuri kai kărălas le.

²⁴Ta o Isus či patealas pe ande lende, anda kă prinjeanelas le saoŕăn.

²⁵Thai nas les trăbuimos te kărăl Lehkă khonikh phendimata pa či khă manuši, anda kă O korkoŕo jeanelas so sî ando manuši.