Read Kalderash Romani Cornilescu Bible 2020 (Romania) Ioan 4 Bible Online

Ioan 4 - Kalderash Romani Cornilescu Bible 2020 (Romania) bible

Ioan 4

¹O Rai ašundea kă le Fariseaia ašundine kă O kărăl thai bolel mai but jenen sar o Ioan.

²Ta o Isus či bolelas orta O, ta Lehkă jene.

³Atunčeara telerdea andai Iudea, thai amboldi'lo ande Galilea.

⁴Anda kă trăbulas te nakhăl andai Samaria,

⁵arăslo paša khă četatea andai phuw la Samariati, kai bušolas Sixar, paše la phuweataer, kai deasla o Iakovo pehkă šavehkă le Iosifohkă.

⁶Oče arakhadeolas e xaing Iakovosti. O Isus, ašado le phirimastar, bešelas paša e xaing. Sas kam koa čeaso le šovengo.

⁷Avili khă juwli andai Samaria te ankalavel pai. „De Ma te peau,” phendea lakă o Isus.

⁸Kă le jene Lehkă gălesas ande četatea te tinen xamahko.

⁹E juwli e Samariteanka, phendea Lehkă: „Sar, Tu, Iudeo, mangăs te pes mandar, juwli Samariteanka?” — Le Iudea, ando čeačimos, nai le phanglimata le Samaritença.

¹⁰Čeačio phendimos, o Isus phendea lakă: „Te prinjeandino tu e pativ le Devllesti, thai Kon sî Kukoa kai phenel tukă: „De Ma te peau!” tu korkoŕo sahkă mangăs te pes, thai O sahkă del tu pai juvindo.”

¹¹„Raia”, phendea Lehkă e juwli, „nai sosa te ankalaves pai, thai e xaing sî andră; katar daštisa te aveltu kadoa pai o juvindo?

¹²San Tu mai baro sar amaro dadd o Iakovo, kai deame e xaing kadea, thai pilea o orta anda late thai lehkă šeave thai lehkă juvindimata?”

¹³O Isus dea la anglal: „Orkon pel andoa pai kadoa, avela lehkă pale truši.

¹⁴Ta orkon pel andoa pai, kai daua les Me, ando veako na mai avela lehkă truši; ta înkă o pai, kai daua les Me, kărdeola pe ande khă isvoro paiehko, kai ulela ande čivava e vešniko.”

¹⁵„Raia”, phendea Lehkă e juwli, „de ma kadoa pai, kaste na mai avel mangă truši, thai te na mai avau ji koče te ankalavau.”

¹⁶„Jeatar”, phendea lakă o Isus, „ta akhar te romes, thai av koče.”

¹⁷E juwli dea Les anglal: „Nai ma rom.” O Isus phendea: „Mišto phendean kă nai tu rom.

¹⁸Anda kă panji rom sastu; thai kodoa, kai sîtu akana, nai tukă rom. Koče phendean o čeačimos.”

¹⁹„Raia”, phendea Lehkă e juwli, „dikhau kă san prooroko.

²⁰Amară dadda rudisai le po baŕbaro kadoa; thai tume phenen kă ando Ierusalimo sî o than kai trăbul te rudin pe le manuši.”

²¹„Juwlie”, phendea lakă o Isus, „patea Ma kă avel o čeaso kana či mai rudina tume le Daddehkă, čina po baŕbaro kadoa, čina ando Ierusalimo.

²²Tume rudin tume ka so či prinjeanen; ame rudisaoas ka so prinjeanas, kă o Skăpimos avel katal Iudeia.

²³Ta avel o čeaso, thai akana i avilo, kana le rudimatorea čečimahkă rudina pe le Daddehkă ando duxo thai ando čeačimos; anda kă kadalendar ruditorea kamel i o Dadd.

²⁴O Dell sî Duxo; thai kon rudil pe Lehkă, trăbul te rudil pe Lehkă ando duxo thai ando čeačimos.”

²⁵„Jeanau”, phendea Lehkă e juwli, „kă sî te avel o Mesia, (savehkă phenela pe Lehkă Kristoso), kana avela O, sî te phenel amengă sa le butea.”

²⁶O Isus phendea: „Me, kukoa kai dau duma tusa, sîm Kodoa.”

²⁷Atunčeara avile le jene Lehkă, thai mirinas pe kă delas duma kha juwleasa. Orsar či iekh anda lende či phendea Lehkă: „So rodes?” or: „Pa soste des duma lasa?”

²⁸Atunčeara e juwli meklea pesti kanta, găli ande četatea, thai phendea le manušengă:

²⁹„Aven te dikhăn khă manuši, kai phendea mangă sa so kărdem; na varesar kadoa sî o Kristoso?”

³⁰On ankăstine andai četatea thai avenas karing Leste.

³¹Ando čiro kadoa, le jene rudinas Les te xal, thai phenenas: „Sîkaitorina, xa!”

³²Ta O phendea lengă: „Man sîma te xau khă xabe, kai tume či prinjeanen les.”

³³Le jene line te phenen iekh avrăngă: „Na varesar andea Lehkă varekon te xal?”

³⁴O Isus phendea lengă: „O xabe Muŕo sî te kărau o kamimos Kolehko kai tradea Ma, thai te pherau e buti Lesti.

³⁵Či phenen tume kă mai sî štar šon ji koa tidimos? Dikta, Me phenau tumengă: Vazden tumară iakha, thai dikhăn le xolde, kai sî parne akana, gătime andoa tidimos.

³⁶Kon tidel, lel khă potindimos, thai tidel rodo andai čivava e vešniko; anda kă i kukoa kai thol ande phuw thai kukoa kai tidel te bukuril pe, ande sa kodoa čiro.

³⁷Kă ande kadoa dičimos, sî čečio o phendimos: „Iekh thol ande phuw, thai o kolaver tidel.”

³⁸Me tradem tume te tiden oče kai na tume ašadilean; aver ašadile, thai tume šutean tume ande lengo ašadimos.”

³⁹But Samaritenea andai četatea kodea pateaine ando Isus na anda so phendeas e juwli, kai phenelas: „Phendea mangă sa so kărdem.”

⁴⁰Kana avile le Samariteanea Leste, rudisarde Les te ašel lende. Thai O ašilo oče dui des.

⁴¹But mai but pateaine ande Leste anda le divanuri Lehkă.

⁴²Thai phenenas la juwleakă: „Akana či mai pateas anda le phendimata tiră, ta anda kă ame orta ašundeam Les, thai jeanas kă kadoa sî ando čeačimos o Kristoso, o Skăpitorii la lumeako.”

⁴³Pala kadala dui des, o Isus teleardea oçal, kaste jeal ande Galilea.

⁴⁴Kă O korkoro phendeasas kă ăkh prooroko nai kučimahko ande pehko čem.

⁴⁵Kana arăslo and Galilea, sas primime mišto le Galelienendar, kai dikhlesas sa so kărdeasas ando Ierusalimo ando čiro le praznikohko; kă sas i on koa prazniko.

⁴⁶O Isus amboldea pe ande Kana andai Galilea, kai parugleasas o pai ande moll. Ando Kapernaum sas khă kanditori tagaruno, savehko šeau sas nasfalo.

⁴⁷O kanditorii kadoa ašundea kă o Isus avilo sas andai Iudea ande Galilea, gălo Leste, thai rudisardea Les te avel kaste sastearăl lehkă šeaves, kai sas te merăll.

⁴⁸O Isus phendea lehkă: „Kana či dikhăn sămnuri thai minunea, či khă tiposa či patean!”

⁴⁹O kanditorii o tgagaruno phendea Lehkă: „Raia, av ji kana či merăll muro çînoro.”

⁵⁰„Jeatar”, phendea lehkă o Isus „teo šeau trail.” Thai o manuši kodoa pateaia le divanuri, kai phendea lehkăle o Isus, thai teleardea koa drom.

⁵¹Ta kana ulelas o, avile angla leste lehkă robea, thai dine les e vestea kă lehko šeau trail.

⁵²O pušlea le ando čeaso sao lea te avel lehkă mai mišto. Thai on phendine lehkă: „Arati, ando čeaso le eftango, mukle les le šilla.”

⁵³O dadd prinjeandea kă orta ando čeaso kodoa phendeas lehkă o Isus: „Teo šeau trail.” Thai pateaia o thai sa pehko khăr.

⁵⁴Kadoa sî pale o duito sămno, kărdo le Isusostar, pala so amboldi'lo andai Iudea ande Galilea.