Read Kalderash Romani Cornilescu Bible 2020 (Romania) Ioan 7 Bible Online

Ioan 7 - Kalderash Romani Cornilescu Bible 2020 (Romania) bible

Ioan 7

¹Pala kodea, o Isus marălas sai Galilea; či kamelas te bešel ande Iudea, anda kă le Iudeia rodenas te mudarăn Les.

²Thai o prazniko le Iudeiengo, o prazniko phendino le Çărengo, sas paše.

³Lehkă phral phende Lehkă: „Telear kocal, thai jeatar ande Iudea, kaste dikhăn i Te jene le butea, kai kărăs le Tu.

⁴Khonikh či kărăl vareso garado, kana rodel te kărdeol pe prinjeando: kana kărăs kadala butea, sîkav Tu la lumeakă.”

⁵Kă či Lehkă phral či pateanas ande Leste.

⁶O Isus phendea lengă: „O čiro Muŕo či avilo înkă, ta tumengă o čiro sî tumengă orkana lašo.

⁷Tumen e lumea našti te na dabadikhăl tume; Man či dabadikhăl Ma, anda kă Me phenau pa late kă lakă butea sî jungalea.

⁸Anklen tume koa prazniko kadoa; Me ta či ankleau koa prazniko kadoa, anda kă či pherdilo Muŕo čiro.”

⁹Pala so phendea lengă kadala butea, ašilo ande Galilea.

¹⁰Pala so ankăste Lehkă phral koa prazniko, ankăsto i O, ta na te dičio, ta kam mai garado.

¹¹Le Iudeia rodenas Les ando čiro le praznikohko, thai phenenas: „Kai Lo?”

¹²Le noroade denas duma but čioreal pa Leste. Iekh phenenas: „Sî khă manuši lašo.” Aver phenenas: „Či, ta nigrăl o norodo ando xasarimos.”

¹³Falpe, kă daratar le Iudeiendar, khonikh či delas duma pa Leste anglal.

¹⁴Koa dopaši le praznikohko, o Isus ankăsto ando Templo. Thai sîkavelas le norodos.

¹⁵Le Iudeia mirinas pe, thai phenenas: „Sar sî le manušes kadales sîkaimos, kă či sîtilo čiăkhdata.”

¹⁶O Isus dea le anglal: „O sîkaimos Muŕo, nai Muŕo, ta Kolehko kai trdea Ma Man.

¹⁷Kana kamel varekon te kărăl Lehko kamimos, arăsăla te prinjeanel kana o sîkaimos sî kata o Dell, or kana Me dau duma Mandar.

¹⁸Kon del duma pestar, rodel e slava lesti; ta kon rodel e slava Kolesti kai trdea Les, kodoa sî čečio, thai ande leste nai bandimos.

¹⁹Ta či dea tume o Moise e Kris? Thai sa khonih anda tumende či nikrăl e Kris. Sostar roden te mudarăn Ma?”

²⁰O norodo dea les anglal: „Sî tu beng. Kon rodel te mudarăl Tu?”

²¹Čeačio phendimos, o Isus phendea lengă: „Khă buti kărdem, thai saoră mirin tume latar.

²²O Moise dea tume o mothodimos dičimasa koa šindimosroata — na kă oi avel kata o Moise, ta katal patriaxa — thai tume šinenroata le manušes ando des le Savatohko.

²³Kana khă manuši lel o šindimoroata ando des le Savatohko, kaste na ušteavel pe e Kris le Moisasti, sostar turbean xoleatar anda Mande, anda kă sasteardem khă manuši întrego ando des le Savatohko?

²⁴Na krisînin pala o dikhlimos, ta krisînin pala o čeačimos.

²⁵Vareasar bešlitorea andoa Ierusalimo phenenas: „Nai o Kukoa, kai roden on te mudarăn Les?

²⁶Thai sa, dikta kă del lengă duma angla, thai on či phenen Lehkă khanči! Na varesar, pe čiačimaste, le mai bară prinjeandino kă o sî o Kristoso?

²⁷Ta ame jeanas katar sî o manuši kadoa, kana avela o Kristoso, khonikh či jeanela katar sî.”

²⁸Thai o Isus, ta kana sîkavelas le norodos ando Templo, çîpilas: „Prinjeanen Ma thai jeanen Ma katar sîm! Me či avilem Mandar korkoŕo, ta Kukoa kai tradea Ma, sî čeačio, thai tume či prinjeanen Les.

²⁹Me prinjeanau Les, kă avau Lestar, thai O tradea Ma.”

³⁰On rodenas te astarăn Les; thai khonikh či thodea o vast pe Leste, kă înkă či avilosas Lehko čeaso.

³¹But andoa norodo pateaine ande Leste, thai phenenas: „Kana avela o Kristoso, kărăla mai but sămnuri dă sar kărdea o manuši kadoa?”

³²Le Fariseaia ašundine le norodos phendindoi čioreal kadala butea pa Leste. Atunčeara le raša le ma bară thai le Farisea tradine varesar jandarea te astarăn Les.

³³O Isus phendea: „Mai sîm tumença xançorî čiro, thai pala kodea jeau ka Kukoa kai trdea Ma.

³⁴Tume rode na Ma, thai či arakhăna Ma; thai kai avaua Me, tume našti te aven.”

³⁵Le Iudea phendine maškar lende: „Kai sî les gîndo te jealtar o manuši kadoa, kaste našti te arakhas Les? Ta na avelales ande godi te jeal ka kukola pharadine maškar le Grečea, thai te sîkavel ăl Grečen?

³⁶So avena le divanuri kadala kai phendea mengă le: „Rode na Ma, thai či arakhăna Ma; thai kai avaua Me, tume našti te aven.”

³⁷Ando des dă mai palal, kai sas o des o baro le praznikohko, o Isus bešlo ande pînŕănde, thai dea mui: „Kana trušaol varekon, te avel Mande, thai te pel.”

³⁸Kon pateal ande Mande, anda lehko illo thavdena paia juvindimahkă, sar phenel o LillleDevllehko.”

³⁹Phenelas le divanuri kadala poa Duxo, kai avena te len Les kukola kai pateana ande Leste. Kă o Sfînto Duxo înkă či sas dino, anda kă o Isus nas înkă proslovime.

⁴⁰Iekh andoa norodo, kana ašundine kadala divanuri, phenenas: „Kadoa sî le čečimasa o Prooroko.”

⁴¹Aver phenenas: „Kadoa sî o Kristoso.” Thai aver phenenas: „Sar, andai Galilea sî te avel o Kristoso?

⁴²Či phenel o LillleDevllehko kă o Kristoso sî te avel andai sămînça le Davidosti, thai andoa gau o Betleem, kai sas o David?”

⁴³Kărdilea kadea pharaimos ando norodo anda Leste.

⁴⁴Iekh anda lende kamenas te astarăn Les; ta khonikh či thodea o vast pe Leste.

⁴⁵Le jandarea amboldile kal raša le mai bară thai kal Fariseia. Thai kadala phende lengă: „Sostar či andean Les?”

⁴⁶Le jeandarea dine anglal: „Čiăkdata či dea duma khă manuši sar o manuši kadoa.”

⁴⁷Le Farisea dine le anglal: „Ta na avena i tume nigărdine ando xasarimos?

⁴⁸Pateaia vo iekh ande Leste anda le mai bară amară or andal Fariseia?

⁴⁹Ta o norodo kadoa, kai či jeanel e Kris, sî dinorman!”

⁵⁰O Nikodimo, kukoa kai avilosas koa Isus reate thai kai sas iekh anda lende, phendea lengă:

⁵¹E Kris amari došavel oi khă manuši mai anglal kaste ašuneles thai te jeanel so kărăl?”

⁵²Čeačio phendimos, on phendine lehkă: „I tu san anda e Galilea? Rode mišto, thai dikhăsa kă anda e Galilea či vazdinisailo či khă prooroko.”

⁵³(Thai amboldine pe sakogodi khără.