Read Kalderash Romani Cornilescu Bible 2020 (Romania) 1 Korintenea 12 Bible Online

1 Korintenea 12 - Kalderash Romani Cornilescu Bible 2020 (Romania) bible

1 Korintenea 12

¹Ande so dikhăl le pativa le duxovničiska, phralale, či kamau te na aven ando biprinjeandimos.

²Kana sanas bibolde, jeanen kă jeanas pal le idolea kola le but, pala sar sanas nigărdine.

³Anda kodea phenau tumengă kă khonikh, kana del duma andoa Duxo le Devllehko, či phenel: „O Isus te avel armandino!” Thai khonikh našti phenel: „O Isus sî o Rai,” numai andoa Sfînto Duxo.

⁴Sî mai but pativa, ta sî sakodoa Duxo;

⁵sî mai but kandimata, ta sî sakodoa Rai,

⁶sî mai but butea, ta sî sakodoa Dell, kai kărăl buti sa ande saoŕă.

⁷Thai orsavehkă del pe lehkă o sîkaimos le Duxohko karing o valoso avrăngo.

⁸Kadeadar, iekhăhkă sî lehkă dino, andoa Duxo, te del duma poa xaraimos; avrăhkă, te del duma poa prinjeandimos, sa kodole Duxohkă;

⁹avrăhkăo pateamos, anda sa kodoa Duxo; avrăhkă, e pativ le sastimatahko, anda sa kodoa Duxo;

¹⁰avrăhkă, e zor te kărăl minunea; avrăhkă, e prooročia; avrăhkă, te prinjeanel le duxuri, avrăhkă, avermoda šibendi; thai avrăhkă te amboldel le šiba.

¹¹Ta sa kadala butea kărăl le iekh thai sa kodoa Duxo, kai del orsavehkă ande rig, sar kamel.

¹²Kă, pala sar o stato sî iekh thai sî les mai but kotora, thai pala sar sa le kotora le statohkă, barem kă sî mai but, sî khă korkoŕo stato, — sa kadea sî i o Kristoso.

¹³Ame sa, ande čeačimaste, samas bolde khă korkoŕo Duxostar, kaste avas khă korkoŕo stato, avena Iudeia, avena Grečea, avena robea, avena slobozî; thai saoŕă samas pravarde andakh korkoŕo Duxo.

¹⁴Kadeadar, o stato nai khă korkoŕo kotor, ta mai but.

¹⁵Kana o punŕo sahkă phenel: „Anda kă či sîm vast, či sîm andoa stato”, — či sî anda kadea andoa stato?

¹⁶Thai kana o kan sahkă phenel: „Anda kă či sîm iakh, či sîm andoa stato”, či sî anda kadea ando stato?

¹⁷Kana soa stato sahkă avel iakh, kai avela o ašundimos „Kana sa avela ašundimos, kai avela o sungaimos?

¹⁸Akana ta o Dell thodea le kotora ando stato, sakoiekhăs kadea sar kamblea O.

¹⁹Kana saoŕă avenas iekh kotor, kai sahkă avel o stato?

²⁰Kadea kă sî mai but kotora, ta iekh korkoŕo stato.

²¹E iakh našti phenel le vastehkă: „Naima trăbuimos tutar”; či o šero našti phenel le pînŕăngă: „Naima trăbuimos tumendar.”

²²Ta mai but, le kotoriça le statohkă, kai amean mai kovle, sî biklemasa jutimahkă.

²³Thai le riga le statohkă, kai amean vreničea mai xançî pativakă, xureavas le mai bute kučimasa. Kadea kă le riga mai xançî šukar amară statohkă len mai but šukarimos,

²⁴ta kukola le šukar nai te aven xureadine. O Dell kărdea o stato kadea kaste del mai but pativ le kotorăngă bi pativakă:

²⁵kaste na avel či khă bialosardimos ando stato: ta le kotora te kanden pe saoŕă iekh avrăndar.

²⁶Thai kana vatil khă kotor, sal kotora vatin andekhthan lesa, kana sî kuči khă kotor, sa le kotora bukurin pe andekhthan lesa.

²⁷Tume san o stato le Kristosohko, thai orsao, ande rig, le kotora lehkă.

²⁸Thai o Dell lašardea ande Khăngări, anglal, apostolea; o duito, prooročea; o trito, sîkaitorea; pala kodea kolen kai sî le e pativ le sastimasti, le kandimasti, le tradimasti, thai o dimos duma ande aver šiba.

²⁹Ta saoŕă sî apostolea? Saoŕă sî prooročea? Saoŕă sî sîkaitorea? Saoŕă kărăn minunea?

³⁰Saoŕă sî le e pativ le satimasti? Saoŕă den duma ande aver šiba? Saoŕă ambolden?

³¹Phirăn kadea pala le pativa le mai laše. Thai sîkavaua tumengă khă drom butimasa mai lašo.