Read Kalderash Romani Cornilescu Bible 2020 (Romania) Galatenea 5 Bible Online

Galatenea 5 - Kalderash Romani Cornilescu Bible 2020 (Romania) bible

Galatenea 5

¹Ašen kadea zurale thai na mekăn tume pale tala o xamo la robiako.

²Dikta, me, o Pavelo, phenau tumengă kă, kana šinena tume roata, o Kristoso či kandela tume khančesa.

³Thai phenau pale ăkh data orsave manušehkă kai lel o šindimosroata, kă sî unjile te pherăl sai Kris.

⁴Tume, kai kamen te aven dinde bibezexale ande Kris, xuladean tume le Kristosostar; pelean andoa xaro.

⁵Kă ame, andoa Duxo, ajukăras ando pateaimos ajukărimos le bibezexalimahko.

⁶Kă ando Isus Kristoso, či o šindimosroata, či o nešindimosroata naile vokh potindimos, ta o pateaimos kai kărăl buti ando kamblimos.

⁷Tume prasten mišto: kon šindea tumaro drom kaste na ašunen le čeačimastar?

⁸O atxaimos kadoa či avel kata Kukoa kai akhardea tume.

⁹Xançî drojdea phutearăl soa xumear.

¹⁰Me, dičimasa tumende, sîma, ando Rai, o pateamos kă či den tume godi avervaresar. Ta kukoa kai biujearăl tume, phiravela e doši, orsao avela o.

¹¹Sode pa mande, phralale, kana mai dauduma poa šindimosroata, sostar mai sîm našado? Atunči o amblaimos le lopînzîmahko le trušulehko gălotar.

¹²Thai, phadeona ăkhdata kukola kai biujearăn tume!

¹³Phralale, tume sanas akhardine koa slobozîmos. Numa, na kărăn andoa slobozîmos khă zan kaste train andai lumea la phuweati, ta kanden tume iekh avrăhkă ando kamblimos.

¹⁴Kă sai Kris astardeol ande khă iekh mothodimos: „Te kames te pašes sar tut orta.”

¹⁵Ta kana danddarăn tume thai xan tume iekh pe avrăn, len sama te na aven xasrde iekh avrăndar. Le kărimata le masăhkă phuwmnikano thai le Duxohkă.

¹⁶Phenau kadea: phirăn tradine le Duxostar, thai na pherăn le pofte le masăhkă la phuweako.

¹⁷Kă o mas la phuweako poftil poa Duxo thai o Duxo poa mas la phuweako; sî butea kai či daštin pe iekh avrăsa, kadea kă našti kărăn sa so kamen.

¹⁸Kana san phirade le Duxostar, či san tala e Kris.

¹⁹Thai le kărimata le masăhkă la phuweakă sî prinjeande, thai sî kadala: e preakurvia, e kurvia, o biujimos, o biatărdimos,

²⁰o rudimos kal idolea, o drabarimos, le čiungara, le zaia, le pupuimata, le xoleaerimata, le biatearimata, le pharaimata, le xamata le partidengă,

²¹le xolea iekh pe aver, le mudarimata, le matimata, le xamata poa čeailimos, thai aver butea sakadea varesar kadalendar. Phenau tumengă mai anglal, sar mai phendem, kă kodola kai kărăn kadalendar butea, či avena ando Thagarimos le Devllehko.

²²O rodo le Duxohko, avervaresar sî: o kamblimos, o bukurimos, e pačea, o but ajukărimos, o lašimos, o kărimos le mištimahko, o pateaimos,

²³o potolimos, o atărdimos le poftengo. Anda kadala butea nai kris.

²⁴Kola kai sî le Isus Kristosohkă, karfosarde pehko mas o phuwikano andekhthan le kamblimatança thai lehkă poftença.

²⁵Kana traisaras andoa Duxo, i te phiras ando Duxo.

²⁶Te na phiras pala khă slava întaină, xolearindoi ame iekh avrăn, thai te na dabadikhasa ame iekh avrăn.