Read Kalderash Romani Cornilescu Bible 2020 (Romania) Efesenea 5 Bible Online

Efesenea 5 - Kalderash Romani Cornilescu Bible 2020 (Romania) bible

Efesenea 5

¹Phirăn pala e pilda le Devllesti sar varesar šeaoŕă kuči kambline.

²Traisarăn ando kamblimos, pala sar i o Kristoso kambleame, thai dea Pe Pes anda amende „sar khă dimos thai sar khă jertfa laši khandimasti”, le Devllesti.

³E kurvia, thai orsao biujimos, or o xîpalimos le mandimahko, čina te na aven phendine maškar tumende, kadea sar čina či trăbul le sfinçăngă.

⁴Te na ašundeon pe či divanuri marimene, či orbe bigîndime, či asaimata dile, kai nai laše; ta mai iekhatar divanuri naismahkă.

⁵Kă jeanen mišto kă či khă kurvari, či khă rimome, či khă xîpalo pala e mandin, sao sî khă rudimatorii kal idolea, nai les rig mandimatastar ando Thagarimos le Kristosohko thai le Devllehko.

⁶Khonikh te na athavel tume orbença xoxamne; kă anda e zan kadale buteandi avel e xoli le Devllesti pa le manuši kai či ašunen.

⁷Te na kîrdîšin tume dălokh lença.

⁸Mai anglal sanas ando tuneriko; ta akana san ande lumina ando Rai. Phirăn kadea sar varesar šeave la luminakă.

⁹Kă e rodo la luminako bešel ande orsao lašimos, ando bibezexalimos thai ando čeačimos.

¹⁰Roden so sî čeailo angloa Rai,

¹¹thai na len dălokh rig ka le butea birodohkă le tunerikohkă, ba mai iekhatar došaven le.

¹²Kă sî lajeau numai te phenas so kărăn on ando tuneriko.

¹³Ta sa kadala butea, kana sî došale ande lumina, sî dine dičimahkă; anda kă so ankalavel sa koa dičimos, sî e lumina.

¹⁴Anda kodea phenel pe: „Uštita tu, kai soves, ušti andal mulle, thai o Kristoso luminila tu.”

¹⁵Len sama kadea te phirăn šutimasa samako, na sar varesar bigodeako, ta sar varesar godeasa.

¹⁶Potinen o čiro, kă le des sî jungale.

¹⁷Anda kodea na aven biprinjeande, ta atearăn sao sî o kamimos le Raiehko.

¹⁸Na mateon molleatar, kadea sî khă lajaimos. Avervaresar, aven pherde Duxo.

¹⁹Den duma maškar tumende psalmença, le dileança le lăudimahkă thai le dileança duxovničiskureança, thai dilaban thai anen anda sa o illo lăudimos le Raiehkă.

²⁰Naisarăn orkana le Devllehkă le Daddehkă, anda sa le butea, ando Anau le Raiehko amarăhko le Isus Kristosohko.

²¹Mekăn tume iekh avrăngă ande dar le Kristososti.

²²Romnealelor, aven mekline tumară romengă sar le Raiehkă;

²³kă o rom sî o šero la ŕomneako, pala sar i o Kristoso sî o Šero la Khăngăreako, O, Skăpitorii le statohko.

²⁴Thai pala sar e Khăngării sî meklini le Kristosohkă, sa kadea le romnea te aven mekline pehkă romengă ande sa le butea.

²⁵Romale, kamen tumară romnean sar kamblea i o Kristoso la Khăngărea thai dea pe Pes anda late,

²⁶kaste sfinçola, pala so ujeardea la ando bolimos le paiesa ando Divano,

²⁷Kaste thol angla Peste kadea Khăngări, slăvime, bimakhli, bi bîrčimos or avervareso sakadea, ta sfînto thai bi došako.

²⁸Sa kadea trăbun te kamen i le rom pehkă romnean, sar pehkă staturen. Kon kamel pehka romnea, kamel pe orta pes.

²⁹Kă khonikh či nadabadikhlea vokhdata pehko stato, ta deles te xal, kande les dragosa, sar o Kristoso la Khăngărea;

³⁰anda kă ame sam le kokala le statohkă Lehkă, mas andoa mas Lehko thai kokalo andal kokala Lehkă.

³¹Anda kodea mekăla o manuši pehkă daddes thai pehka deia, thai astardeola pehka romneatar, thai kola le dui avena khă korkoŕo stato.”

³²O garaimos kadoa sî baro — (dau duma poa Kristoso thai pai Khăngări). —

³³Intea orsao anda tumende te kamel pehka romnea sar pe peste; thai e romni te daral le romestar.