Read Kalderash Romani Cornilescu Bible 2020 (Romania) Efesenea 6 Bible Online

Efesenea 6 - Kalderash Romani Cornilescu Bible 2020 (Romania) bible

Efesenea 6

¹Šoŕale, ašunen ando Rai tumară daddendar, kă sî čeačio.

²„Te des pativ te daddes thai tea deia” — sî o mai anglal mothodimos avinoi les khă šinadimos —

³„kaste aves baxtalo, thai te trais but čiro pe phuw.”

⁴Thai tume daddale, na zumaven la xolleasa tumară šeaven, ta barearăn le, ande laši orba thai o sîkadimos le Raiehko.

⁵Kanditatorea, ašunen tumară stăpînendar la phuweakă, darasa thai izdraimasa, ando ujimos le illehko sar le Kristosostar.

⁶Kanden le na numai kana san tala lengă iakha, ta na varesar te čeaileon le manušengă, ta sar varesar robea le Kristosohkă, kai kărăn andoa illo o kamimos le Devllehko.

⁷Kanden le bukuriasa, sar le Raiehkă, ta na le manušengă,

⁸kă jeanen kă sakogodi, avela robo, avela slobodo, lela o potindimos kata o Rai, pala o mištimos kai kărdeasa les.

⁹Thai tume, stăpînina, phiraven tume sakadea lença; arakhăn tume tradimatăndar sar iekh kai jeanen kă o Stăpîno lengo thai tumaro sî ando čerii, thai kă angla Leste nai ando dičimos o mui le manušehko.

¹⁰Întea, phralale, zurearăn tume ando Rai thai ande zor Lehkă zuraimahko.

¹¹Xureaven tume sa la armurasa le Devllesti, kaste dašti nikrăn kolin angla le xunadimata le bengăhkă.

¹²Kă amen nai ame mardimos le masăsa thai le ratesa, ta avervaresar le šerănçalebarănça, avervaresar le raimatănça, avervaresar le stăpînimatănça le tunerikohkă kadale veakohkă, avervaresar le duxurença le nasulimatahkă kai sî andel thana le čerikane.

¹³Anda kodea, len sa e armura le Devllesti, kaste dašti te nikărăn tume ando des kodoa o nasul, thai te ašen andel pînŕă, pala so izbîndisardeana sa.

¹⁴Aven gata kadea, avindoi tume o maškar phanglo le čeačimasa, xureade la platošasa le bibezexalimasti,

¹⁵avindoi tume le pînŕă podime le rodimosa la LašeaVesteako la pačeako.

¹⁶Opral pa kadala sa, len o skuto le pateaimahko, savesa dašti mudarăna sa le săjeçea le phabarimahkă kolehkă le jungalehkă.

¹⁷Len i e stadi le skăpimasti thai e sabia le Duxosti, kai sî o Divano le Devllehko.

¹⁸Kărăn ande soa čiro, ando Duxo, sako moda rudimatăngo thai manglimatăngo. Len sama ka sa kadala, sa le rudimasa thai manglimasa anda sal sfinçea,

¹⁹thai i anda mande, ka, orsodivar pîtrau muŕo mui, te del pe mangă divano, kaste kărau zorasa prinjeando o gardimos la LašeaVesteako,

²⁰saveako solo andel lançurea sîm; anda kă, phenau, te dau duma zuralimasa, sar trăbul te dau duma.

²¹Akana, kaste jeanen i tume pa mande, o Tixiko, o but kamblino phral thai kanditorii pateamno ando Rai, kărăl tumengă prinjeando sa.

²²Tradem tumengă les po zumaimos, kaste len prinjeandimos pa amende akana, thai te zurearăl tumară ille.

²³Pače phralale, thai kamblimos andekhthan le pateamasa, andai rig le Devllesti o Dadd, thai andai rig le Raiesti o Isus Kristososti!

²⁴O xaro te avel saoŕănça so kamen amară Raies le Isus Kristosos ando ujimos. Amin.