Read Kalderash Romani Cornilescu Bible 2020 (Romania) Kolosenea 3 Bible Online

Kolosenea 3 - Kalderash Romani Cornilescu Bible 2020 (Romania) bible

Kolosenea 3

¹Kana juvindisardean tume andekhthan le Kristososa, te phirăn pala le butea dă opral, kai o Kristoso bešel ande čeači rig le Devllesti.

²Den tume gîndo kal butea opral, na ka kukola pai phuw.

³Kă tume mullean, thai tumari čivava sî garadi le Kristososa ando Dell.

⁴Kana sîkadeola o Kristoso, e čivava tumari, atunči sîkadeona i tume andekhthan Lesa ande slava.

⁵Andakodea, mudarăn le kokala tumară kai sî pe phuw: e kurvia, o biujimos, e patima, e pofta jungali, hai o xîpalimos, kai sî khă rudimos kal idolea.

⁶Andai doši kadale buteandi avel e xolli le Devllesti pa le šeave biašundimahkă.

⁷Anda lengo dindimos sanas i tume averdata, kana trainas ande kadala bezexa.

⁸Ta akana mekăn tume sa kadale buteandar: la xolleatar, la dušmăniatar, le jungalimastar, le pupuimastar, le orbendar lajavehkă, kai dašti anklen tumengă anda o mui.

⁹Na xoxaven tume iekh avrăn, kă nandeardean tume le manušestar le puranestar, lehkă buteandar,

¹⁰thai xureadean tume le manušesa le nevesa, kai nevearăl pe karing o prinjeandimos, pala o tipo Kolehko kai kărdea les.

¹¹Koče manai či Greko, či Iudeo, či šindimosroata, či bišindimosroata, či Barbarii, či Schito, či robo, či slobodo, ta o Kristoso sî sa ande saoŕă.

¹²Kadeadar, sar varesar alosardine le Devllehkă, sfinçi thai but kuči, xureaven tume khă illesa pherdo mila, lašimasa, meklimasa, kovlimasa, butimasa răbdimos.

¹³Dabadikhăn tume iekh avrăn, thai, kana iekhăs sî les khă doši te rovel pe avrăstar, iertin tume iekh avrăs. Sar iertisardea tume o Kristoso, kadea iertin tume i tume.

¹⁴Ta mai opral dă sa kadala, xureaven tume le kamblimasa, kai sî o phanglimos la bidošako.

¹⁵E Pačea le Kristososti, ka savi sanas akharde, kaste aven khă korkoŕo stato, te stăpînil ande tumară ille, thai te aven prinjeandine.

¹⁶O Divano le Kristosohko te bešel bravallimasa ande tumende ande soa xaraimos. Sîkaven tume thai den tumengă duma iekh avrănça psalmença, dilabaimança lăudimahkă thai dilabaimança duxovničiskurea, dilabaindoi le Devllehkă naismasa ande tumaro illo.

¹⁷Thai or so kărăn, le divanosa or le kărimasa, te kărăn sa ando Anau le Raiehko le Isusohko, thai naisarăn, anda Leste, le Devllehkă o Dadd.

¹⁸Romneale, aven ašunendine tumară romendar, sar trăbul ando Rai.

¹⁹Romale, kamen tumară romnean, thai na nikrăn xolli pe lende.

²⁰Šaoŕale, ašunen tumară daddendar ande sal butea, kă e buti kadea čeaileol le Raies.

²¹Daddale, na xollearăn tumară šaoŕăn, kaste na xasarăn pehko ajukărimos.

²²Robina, ašunen ande sal butea tumară stăpînen le phuwikane; na numai kana san tala lengă iakha, sar kukola kai roden te čeailon le manušengă, ta le ujimasa le illehko, sar iekh kai daran le Raiestar.

²³Or so kărăn, te kărăn anda soa illo, sar andoa Rai, na sar andal manuši,

²⁴sar uni kai jeanen kă lena kata o Rai o potindimos le mandimahko. Tume kanden le Raiehkă le Kristosohkă.

²⁵Kă kon phirăl le bandimasa, lela pehko potindimos pala o bandimos, kai kărdea les; thai či sî ando dikhlimos o mui le manušehko.