Read Kalderash Romani Cornilescu Bible 2020 (Romania) 1 Tesaloničenea 5 Bible Online

1 Tesaloničenea 5 - Kalderash Romani Cornilescu Bible 2020 (Romania) bible

1 Tesaloničenea 5

¹Sode pal čiruri thai so sî te avela, nai tume trăbuimos te ramol pe tumengă, phralale.

²Anda kă tume orta jeanen but mišto kă o des le Raiehko avela sar khă čior reate.

³Kana phenena: „Pačea thai ujimos!” atunči khă mudardimos biajukărdo avela pa lende, sar le dukha le kărimahkă pai juwli e phari; thai či avela tipo skăpimahko.

⁴Ta tume, phralale, či san ando tuneriko, andoa des kodoa te astarăl tume sar khă čior.

⁵Tume san šeave la luminakă thai šeave le desăhkă. Ame či sam la reateakă, či le tunerikohkă.

⁶Anda kodea te na sovas sar le kolaver, ta te arakhas thai te avas ušteade.

⁷Kă kola kai soven, soven reate; thai kola kai mateon, mateon reate.

⁸Ta ame, kai sam šeave le desăhkă, te avas ušteade, te xureavas ame andelçoale ăl sastrune le pateamahkăthai le kamblimahkă, thai te avel ame orta koifo o ajukărimos le skăpimahko.

⁹Anda kă o Dell či lašardea me kai xolli, ta kaste las o skăpimos, anda o Rai amaro o Isus Kristoso,

¹⁰kai mullo anda amende, andakaste, avela kă ajukras, avela kă sovas, te traisaras andekhthan Lesa.

¹¹Anda kodea, zureaon thai zurearăn tume iekh avrăn, sar i kărăn ande čeačimaste.

¹²Rudisaras tume, phralale, te dikhăn mišto kolen kai čiion maškar tumende, kai traden tume ando Rai, thai sîkaven tume.

¹³Te kučearăn le mai but, ando kamblimos, andoa kărimos lenga buteako. Train ande pačea maškar tumende.

¹⁴Rudisaras tume, sakadea, phralale, xoleaon pe kola kai train ando bilašardimos; te zurearăn kolen biajukărimahko; te vazden kolen le kovlen, te aven ajukărimahko saoŕă.

¹⁵Len sama khonikh te na amboldel iekhăhkă nasul anda nasul, ta roden orkana te kărăn so sî mišto maškar tumende, sode i angla saoŕă.

¹⁶Bukurin tume orkana.

¹⁷Rudin tume biatărdimahko.

¹⁸Naisarăn le Devllehkă anda sal butea; kă kadoa sî o kamimos le Devllehko, ando Kristoso Isus, dikhlimasa tumende.

¹⁹Na mudarăn o Duxo.

²⁰Na čidabadikhăn le prooročii.

²¹Ta roden sal butea, thai nikrăn so sî lašo.

²²Arakhăn tume orsostar falpe tumengă nasul.

²³O Dell la pačeako te sfinçol tume O orta pe pherdimaste; thai: o duxo tumaro, o dii tumaro thai o stato tumaro, te aven arakhade dăsea, bidošako koa avimos le Raiehko amarăhko le Isus Kristosohko.

²⁴Kukoa kai akhardea tume sî pateaimahko, thai kărăla e buti kadea.

²⁵Phralale, rudin tume anda amende.

²⁶Phenen sastimos sa le phralengă khă čiumidimosa sfînto.

²⁷Ando Rai rudi tume iagasa ka o zakono kadoa te avel drabardo sa le phralengă.

²⁸O Xaro le Raiehko amarăhko le Isus Kristosohko te avel tumença saoŕănça! Amin.