Read Kalderash Romani Cornilescu Bible 2020 (Romania) Iosua 18 Bible Online

Iosua 18 - Kalderash Romani Cornilescu Bible 2020 (Romania) bible

Iosua 18

¹Soa tidimos le šeavengo le Israelohko tidea pe ando Silo, thai anzarde oče e çăra le arakhadimasti. O čem sas tala lengo vast.

²Mai ašenas efta semençii le ševengă le Israelohkă kai či linesas pesti rig le mandimasti.

³O Iosua phendea le šeavengă le Israelohkă: „i kana bešen dăivea te jean te len ando stăpînimos o čem kai dea tumengă les o Rai, o Dell tumară daddengo?

⁴Alosarăn trin rom anda sako semençia, thai tradaua le. Te ušten, thai te phirăn o čem, te kărăn khă plano ando dičimos le xulaimahko, thai te ambolden pe mande.

⁵Te ulaven les ande efta riga, o Iuda te ašel ande le phuwea katar avelodes, thai o khăr le Iosifohko te ašel ande le phuwea lehkă katar avelereat.

⁶Tume dar, te kărăn khă plano xulaimahko ande efta riga, thai te anen mangă les koče. Šudaua o çîrdimos anda tumende angloa Rai, o Dell tumaro.

⁷Ta le Leviçea te na avel le rig ande tumaro maškar, kă lengo mandimos, sî o rašaimos le Raiehko; thai o Gad thai o Ruben thai dopaši anda e semençia le Manasosti, line pehko mandimos, kai dea lengă les o Moise, o robo le Raiehko, Ande kolaver rig le Iordanosti, katar anklelokham.”

⁸Kana uštile le rom thai telearde te kărăn o plano le čemehko, o Iosua dea le kakoa mothodimos: „Telearăn, phirăn soa čem, kărăn mangă khă plano, thai ambolden tume mande; pala kodea me šdaua anda tumende o çîărdimos angloa Rai, ando Silo.”

⁹Le rom kadalea telearde, phirdine soa čem, thai kărdine o plano pala le četăçi, ande khă lill, xulaindoi les ande efta riga, thai amboldi'le koa Iosua ande tabăra ando Silo.

¹⁰O Iosua šudea angloa Rai o çîrdimos anda lende ando Silo, thai xladea o čem maškar le šeave le Israelohkă, dindoi sakoiekhăs lesti rig.

¹¹O çîrdimos pelo pe semençia le šeavendi le Beneaminosti, pala lengă familii, thai rig kai pelea le ando çîrdimos sas la le phuwea maškar le šeave le Iudahkă thai le šeave le Iosifohkă.

¹²Karing perălereat, e phuw lendi telearălas kata o Iordano. Anklelas karing avelereat le Ierixonostar, vazdelas pe karing o baŕobaro karing perălokham, thai anklelas ande pustia Bet-Aven.

¹³Oçal nakhălas andoa Luz, karing avelodes le Luzostar, kai sas o Betelo, thai ulelas ando Atarot-Adar, poa baŕobaro kai sî katar avelodes le Bet-Xoronostar dă telal.

¹⁴Karing perălokham, e phuw jealas thai amboldelas pe katar avelodes, thai anklelas ando Chiriat-Baal, kai sî o Chiriat-Iearim, e četatea le šeavendi le Iudahkă. Kadea sî e rig katar perălokham.

¹⁵E rig katar avelodes avelas katar o gor le Chiriat-Iearimosti. E phuw jealas karing perălokham ji kai xaing le paiendi le Neftoaxuosti.

¹⁶Ulelas poa šero le baŕăbarăhko kai sî angla e xar Ben-Xinom, ande xar le Refaimiçăndi karing perălereat. Ulelas anda e xar e Xinom, pe rig le Iebusiçăndi, ji ando En-Roguel.

¹⁷Ortolas pe karing perălereat ando En-Šemeš, palal ando Ghelilot, kai sî angloa ankăstimos o Adumim, thai ulelas kata o baŕ le Boxanohko, o šeau le Rubenohko.

¹⁸Nakhălas anda e rig katar avelasereat angloa Arabei, thai ulelas kata o Araba,

¹⁹jealas angle pe rig katar avelereat le Bet-Xoglastar, thai anklelas ando bărkh katar avelereat la mareati la Londeati, karing o nakhadimos le Iordanohko karing avelodes. Kadea sas e phuw katar avelasodes.

²⁰Karing anklelasokham e phuw kărălas la o Iordano. Kadea sas o mandimos le šeavengo le Benimaminohkă, pala lengă familii, le phuweança lengă anda sa le riga.

²¹Le četăçi la semençiakă le šeavengă le Beniaminohkă, pala lengă familii lengă, sas: o Ierixono, Bet-Xogla, Emek-Cheçiç,

²²Bet-Araba, Çemaraim, Betel,

²³Avim, Para, Ofra,

²⁴Chefar-Amonai, Ofni thai Gheba; Dešudui četăçi, thai lengă gava.

²⁵Gabaon, Rama, Beerot,

²⁶Miçipe, Chefira, Moça,

²⁷Rechem, Iirpeel, Tareala,

²⁸Çela, Elef, Iebus, kai sî o Ierusalimo, Ghibeat thai Chiriat; dešuštar četăçi, thai lengă gava. Kadala sas o mandimos le šeavengo le Beniaminohkă, pala lengă familii.