Read Kalderash Romani Cornilescu Bible 2020 (Romania) Iosua 2 Bible Online

Iosua 2 - Kalderash Romani Cornilescu Bible 2020 (Romania) bible

Iosua 2

¹O Iosua, o šeau Le Nunohko, tradea čioreal andoa Sitim, dui manuši, sar te dikhănčiioreal, phendindoi lengă: „Jean ta dikhăn o čem, thai mai but o Ierixono.” Le dui manuši telearde, thai arăsle ando khăr kha kurvako, kai bušolas Raxav, thai sutine oče.

²Dea pe mui koa thagar andoa Ierixono, thai phende lehkă: „Dikta kă varesar manuši anda le šeave le Israelohkă avile koče, areat, kaste dikhănčioreal o čem.”

³O thagar le Ierixonohko tradea kai Raxav te phenen lakă: „Ankalau avri le romen kai avile tute, thai save šutepe ande teo khăr; kă avile te dikhănčioreal o čem.”

⁴E juwli lea le duie romen, thai garadea le; thai phendea: „Sî čeačimos kă kadala rom avile mande, ta či jeanauas katar sî;

⁵thai, anda kă e poarta sas te phandadeol reate, kadala rom ankăste avri; či jeanau kai găline: telearăn iekhatar pala lende, thai arăsăna le.”

⁶Oi ankaladeasas le po akoperišo, thai garadeasas le tala le drăza le inohkă, kai tinzosardea sas les po akoperišo.

⁷Le manuši kodola găline pala lende po drom kai jeal o pai le Iordanohko, thai pala so ankăste on, phandadili e poarta.

⁸Anglal te soven le diklitoreačioreal, e Raxav ankăsti lende po akoperišo,

⁹thai phendea lengă: „Jeanau kă o Rai deatume o čem kadoa, kă astardeame e dar anda tumende, thai sa le manuši le čemehkă isdran angla tumende.

¹⁰Anda kă ašundem sar, koa ankăstimos tumaro andoa Ejipto, O Rai šuteardea angla tumende le paia la mareakă la Lolleakă, thai ašundem so kărdean kukolengă le duie tagarengă le Amoriçăngă înteal o Iordano, le Sihonohkă thai le Ogohkă, kai khosleanle bimuklimahko.

¹¹Dă kana ašundeam e buti kadea, šindilo amaro illo, thai saoră xasardeam amari zor angla tumende; kă o Rai, o Dell tumaro, sî khă Dell opră andel čerurea thai tele pe phuw.

¹²Thai akana, rudi tume, solaxan mangă po Rai kă avela tume andoa khăr mîŕă daddehko sa kodoa lašimos kai sas ma man tumendar. Den ma khă sămno pateaimahko

¹³kă mekăna čivavasa mîŕă daddes, mîŕa deia, mîŕă phralen, mîŕă pheian, thai sa lengă, thai skăpina ame katao mullimos.”

¹⁴Le rom kodola mothodine lakă: „Sam gata te meras anda tumende, kana či den ame po mui; thai kana o Rai dela ame o čem kadoa, phiravasa ame tusa lašimasa thai pateamasa.”

¹⁵Oi dea le tele khă šelesa poa jeamo, kă o khăr ande sao bešelas sas paša o zîdo la četateako.

¹⁶Thai phendea lengă: „Jean karing o baŕobaro, kaste na arakhăn tume kola kai roden tume; garadeon oče trin des, ji kana amboldena pe; pala kodea, te dikhăn tumară dromestar.”

¹⁷Le rom kodola phendine lakă: Dikta sar avasa pîtărde andoa solaxaimos kai thodeaname te kăras les.

¹⁸Koa šutimos amaro ando čem, phande o šelo kadoa le thavehko kărămizio koa jeamo kai dean ame tele, thai tide tute ando khăr te daddes, tea deia, te phralen, thai sa tea familia te daddesti.

¹⁹Kana vo iekh anda lende ankle la poa udar te khărăhko, kaste jeal avri po drom, lehko rat perăla pa leste, thai ame avasa bidošale: ta te thola varekon o vast pe vo iekh anda kukola kai avena tusa ando khăr, o rat lehko perăla pa amaro šero.

²⁰Thai te deasa ame po mui, avasa pîtărde le solaxaimosa kai thodean ame te kăras les.”

²¹Oi dea le anglal: „Avela pala tumară divanuri.” Lea pehkă lašo avimos lendar, thai on telearde. Oi phanglea o šello kărămizio koa jeamo.

²²On telearde, thai arăsline koa baŕobaro, kai ašile trin des, ji kana amboldinisai le kola kai rodenas le. Kola kai gălinesas pala lende sa rodine le soa drom, ta či arakhline le.

²³Le dui manuši amboldi'le, dine pe tele poa baŕobaro, thai nakhline o Iordano. Aviline koa Iosua, o šeau le Nunohko thai phendine lehkă sa so kărdinesas.

²⁴On phendine le Iosuahkă: „Čeačimasa, o Rai dea ame soa čem ande amară vast, thai sa le manuši andoa čem isdran angla amende.”