Read Kalderash Romani Cornilescu Bible 2020 (Romania) Iosua 23 Bible Online

Iosua 23 - Kalderash Romani Cornilescu Bible 2020 (Romania) bible

Iosua 23

¹Dă but čiro o Rai deasas xodinimos le Israelos, izbăvisardea les anda sa lehkă dušmaia pa sal riga. O Iosua sas phuro, pherdo bărši.

²Atunčeara o Iosua akhardea soa Israelo, le phurăn lehkă, le šerănlebarăn, le krisitoren, thai le šerăbară la oasteakă. Thai phendea lengă: „Me sîm phuro, pherdo bărši.

³Dikhlean sa so kărdea o Rai, o Dell tumaro, sa le neamurengă kadalengă angla tumende; kă o Rai, o Dell tumaro, mardea pe anda tumende.

⁴Dikhăn, demtume mandimos andoa çîrdimos, pala tumară semençiiengă, le neamuri kadala kai ašile, dă kata o Iordano, thai sa le neamuri kai khosleam le, ji kai marea e barikaring perălokham.

⁵O Rai, o Dell tumaro, našavela le angla tumende; thai tume stăpînina lengo čem, sar phendea o Rai, o Dell tumaro.

⁶Thon tumengă sa e zor kaste arakhăn thai te pherăn sa so sî ramome ando lill la krisako le Moisahko, bi te len la či ande čeači či ande bičeači rig.

⁷Te na xamintume le neamurença kadalença kai ašile maškar tumende; te na phenen o anau lengă devlengo, thai te na solaxan pe leste; te na kanden le, thai te na rudin tume angla lende.

⁸Ta astardeon le Raiestar le Devllestar tumarăstar, sar kărdean ji ando des kadoa.

⁹O Rai našadea angla tumende neamuri bară thai zurale; thai khonikh ji ando des kadoa, naštisardea te bešel angla tumende.

¹⁰Iekh korkoŕo anda tumende jealas pala khă mia anda lende, kă o Rai, o Dell tumaro, marălas pe anda tumende, sar phendea.

¹¹Ašen dičimasa kai godi pa tumară sufletea, kaste kamen le Ras, le Devlles tumarăs.

¹²Te lenala rigate thai te astardeona le neamurendar kadalendar kai ašile maškar tumende, kana tidena tume iekh avrăsa kal phanglimata, thai te šona tume lença ando divano,

¹³te avel tume pateaimos kă o Rai, o Dell tumaro, či mai našavela kadala neamuri angla tumende; thai on avena tumengă khă kursa thai khă phal, khă bičio andel prašave, thai varesar kanŕă andel iakha, ji kana khosleona poa mui kadale čemehko le lašehko, kai dea tumengă les o Rai, o Dell tumaro.

¹⁴Dikta kă me ades jeau po drom kai jeal sa so sî phuweako. Prinjeanen ande sa tumaro illo thai anda sa tumaro sufleto, kă či iekh anda le divanuri le laše, phendine tumengă le Raiestar, le Devllestar tumarăstar, či ašilo bipherdo; sa pherdile tumengă, či iekh či ašilo bipherdino.

¹⁵Thai pala sar sa le divanuri le laše, kai mothodeasas tumengă le o Rai, o Dell tumaro, pherdile anda tumende, sa kadea o Rai pherăla anda tumende le divanuri le jungale, ji kana khosăla tume poa mui kadale čemehko le lašehko kai dea tumengă les o Rai, o Dell tumaro.

¹⁶Te ušteavena o phanglimos kai dea tumengă les o Rai, o Dell tumaro, thai te jeana te kanden avră devlengă thai te rudin tume angla lende, o Rai astardeo'la xoleatar anda tumende, thai nakhăna iekhatar andoa čem kadoa o lašo kai dea tume O.”