Read Kalderash Romani Cornilescu Bible 2020 (Romania) Iosua 24 Bible Online

Iosua 24 - Kalderash Romani Cornilescu Bible 2020 (Romania) bible

Iosua 24

¹O Iosua tidea sa le semençii le Israelohkă ando Sixemo, thai akhardea le phurăn le Israelohkă, le šerănlebarăn lehkă, le krisînitorenlehkă thai le šerănlebarăn la oasteakă. On aviline angloa Dell.

²O Iosua phendea sa le poporohkă: „Kadea delduma o Rai, o Dell le Israelohko: „Tumaro dadd o Terax, o dadd le Avraamohko thai lehko dadd o Naxor, bešenas maidămult ande kolaver rig le Nanilašosti (Eufratosti), thai kandenas avră devlengă.

³Me lem tumară daddes le Avraamos anda e kolaver rig le Nanilašosti, thai phiradem les andoa soa čem le Kanaanohko; buteardem lesti sămînça, thai dem les le Isakos.

⁴Le Isakos dem les le Iakovos thai le Esaos: le Esaos dem les ando stăpînimos o baŕobaro o Seiro, ta le Iakovos thai lehkă šeaven uleardem le ando Ejipto.

⁵Tradem le Moisas thai le Aronos thai maladem o Ejipto le minuneança kai kărdem le ande lehko maškar; pala kodea ankaladem tume avri anda leste.

⁶Ankaladem tumară dadden andoa Ejipto, thai arăslean kai marea. Le Ejiptenea avile pala tumară dadda ji kai marea e Lolli, le urdonença thai le grastença.

⁷Tumară dadda dine mui karing o Rai. Thai o Rai thodea tuneriko maškar tumende thai le Ejiptenea, andea e marea parpale pa lende, thai garadea le. Dikhlean tumară iakhănça so kărdem le Ejiptenengă. Thai ašilean but čiro ande pustia.

⁸Andem tume ando čem le Amoriçăngo, kai bešenas înteal o Iordano, thai on mardine pe tumença. Dem le ande tumară vast; thodean stăpînimos pe lengo čem, thai khoslem le angla tumende.

⁹O Balak, o šeau le Çiporohko, o thagar le Moabohko, ušti'lo thai telerdea te marăl pe le Israelosa. Akhardea le Balaamos, o šeau le Beorohko, kaste del tume armaia.

¹⁰Ta či kamblem te ašunau le Balaamostar, o deatumedumadămišto, thai skăpisardem tume andoa vast le Balakohko.

¹¹Nakhlean o Iordano, thai arăslean ando Ierixono. Le manuši le Ierixonohko mardine pe tumença: le Amoriçea, le Fereziçea, le Kanaaniçea, le Xetiçea, le Ghirgasiçea, le Xeviçea, thai le Iebusiçea. Dem le ande tumară vast,

¹²tradem angla tumende birovli bondărisko, thai našadea le angla tumende, sar kukolen duie thagaren le Amoriçăngo: na la sabiasa, či te arkosa.

¹³Dem tume khă čem kai či kărdeanas les buti, četăçi save či vazdeanas le, ta ande save bešen, răza thai zetinuri kai či thodeanas le ande phuw, ta save kanden tume sar xamos.

¹⁴Akana daran le Raiestar, thai kanden Les kučimasa thai pateaimasa. Durearăn le del savengă knade tumară dadda înteal o Nanilaš thai ando Ejipto, thai kanden le Raies.

¹⁵Thai kana či arakhăn dromesa te kanden le Raies, alosarăn ades kahkă kamen te kanden: or le devlengă kai kandenas lengă tumară dadda înteal o Nanilaš, or le devlengă le Amoriçăngă ande savengo čem bešen. Sode pa mande, me thai muŕo khăr kandasa le Raiehkă.”

¹⁶O poporo dea anglal, thai phendea: „Dur amendar te das ame godi te mekas le Raies, thai te kandas avră devlengă.

¹⁷Kă o Rai o Dell amaro, O ankaladea me andoa čem le Ejiptohko, andoa khăr la robiako, amen thai amară dadden; O kărdea angla amară iakha kodola bară minuni, thai arakhleame ande soa čiro le dromehko kai phirdeam ando maškar sa le poparăngo, katar nakhleam.

¹⁸O našadea angla amende sea le popoară, i le Amoriçăn kai bešenas ando čem kadoa. I ame kandasa le Raiehkă, kă O sî o Dell amaro.”

¹⁹O Iosua phendea le poporohkă: „Tume naština te kanden le Raiehkă, kă sî khă Dell sfînto, khă Dell geloso; O na iertila tumară bilaše butea thai bezexa.

²⁰Kana mekăna le Raies, thai kandena iekhăngă dela străinea, O amboldela'Pe thai kărăla tumengă nasul, thai khosăla tume, pala so kădea tumengă mišto.”

²¹O poporo phendea le Iosuahkă: „Či! Kă kandasa le Raiehkă!”

²²O Iosua phendea le poporohkă: „Tume san martorea orta anda tumende kă alosardean le Raies, kaste kanden Lehkă.” On phendine: „Sam martorea!”

²³Ta ankalaven le devlen le străinen kai sî ande tumaro maškar, thai ambolden tumaro illo karing o Rai, o Dell le Israelohko.”

²⁴Thai o poporo phendea le Iosuahkă: „Ame kandasa le Raiehkă, le Devllehkă amarăhkă, thai ašunasa Lehkă mostar.”

²⁵O Iosua kărdea ande kodoa des khă phanglimos le poporosa, thai dea les krisa thai mothodimata, ando Sixemo.

²⁶O Iosua ramosardea kadala butea ando lill la krisako le Devllesti. Lea khă baŕ baro, thai vazdeales oče tala o stejari kai sas ando than dino le Raiehkă.

²⁷Thai o Iosua phendea sa le poporohkă: „Dikta, o baŕ kadoa avela martoro angla tumende, kă ašundea sa le divanuri kai phendea amengă le o Rai, o avela martori anda tumende kaste na aven bipateamahko le Devllehkă tumarăhkă.”

²⁸Pala kodea o Iosua dea drom o poporo, thai găle sakogodi ka pehko mandimos.

²⁹Pala kadala butea, o Iosua, o šeau le Nunohko, o robo le Raiehko, mullo, phuro dă ăkhšell thai deši bărši.

³⁰Praxosarde les ande phuw kai peleasas les koa xulaimos, ando Timnat-Serax, ando baŕobaro le Efraimohko, katar avelereat le baŕăbarăstar o Gaaš.

³¹O Israelo kandea le Raies ande sa o čiro la čivavako le Iosuahko, thai ande soa čiro la čivavako le phurăngo kai traisarde pala o Iosua thai save prinjeanenas sa so kărdeasas o Rai andoa Israelo.

³²Le kokala le Iosifohkă, kai andinesas le ăl šeave le Israelohkă andoa Ejipto, sas praxome ando Sixemo, kha šelasa dă chesita, thai savo arăslo o mandimos le šeavengo le Iosifohkă.

³³O Eleazar, o šeau le Aaronohko, mullo, thai sas praxome ando Gxibeat-Fineas, kai sas dino lehkă šeavehkă le Fineasoskă, ando baŕobaro le Efraimohko.