Read Kalderash Romani Cornilescu Bible 2020 (Romania) Iosua 3 Bible Online

Iosua 3 - Kalderash Romani Cornilescu Bible 2020 (Romania) bible

Iosua 3

¹O Iosua, uštindoi kana pharadilodes, teleardea andoa Sitim sa le šeavença le Israelohkă. Arăsline koa Iordano; thai ašiline oče pa e reat, angla te nakhăn.

²Pala trin des, le šerălebară la oasteakă nakhline anda e tabăra,

³thai dine le poporos kadoa mothodimos: „Kana dikhăna o chivoto le phanglimahko le Raiehko, le Devllehko tumarăhko, nigărdo le rašandar, kai sî andoa neamo le Leviçngo, te telearăn andoa than kai san, thai te jean pala leste.

⁴Ta maškar tumende thai leste te avel khă durimos duie miiengo koça; te na pašon lestar. O sîkavela tumengă o drom kai trăbun te phirăn, kă či mai nakhlean pa kadoa drom.”

⁵O Iosua phendea le poporohkă: „Sfinçon tume, kă texara o Rai kărăla butea minunengă maškar tumende.”

⁶Thai o Iosua phendea le rašangă: „Len o chivoto le phanglimahko, thai nakhăn angloa poporo.” On line o chivoto le phanglimahko, thai telearde angloa poporo.

⁷O Rai phendea le Iosuahkă: „Ades, thoaua te vazdau tu angloa soa Israelo, kaste jeanel kă avaua tusa sar sîmas le Moisasa.

⁸Te des kakoa mothodimos le rašangă kai nigrăn o chivoto le phanglimahko: „Kana arăsăna kai rig le paiendi le Ioranohkă, te atărdeon ando Iordano.”

⁹O Iosua phendea le šeavengă le Israelohkărăngă: „Pašeon, thai ašunen le divanuri le Raiehkă, le Devllehkă tumarăhkă.”

¹⁰O Iosua phendea: „Anda kadea prinjeanena kă o Raio juvindo sî ande tumaro maškar, thai kă našavela angla tumende le Kanaaniçăn, le Xetiçăn, le Xeviçăn, le Fereziçăn, le Ghirgasiçăn, le Amoriçăn thai le Iebusiçăn:

¹¹Dikta, o chivoto le phanglimahko le Raiehko sa la phweako nakhăla angla tumende ando Iordano.

¹²Akana, len dešudui rom anda le semençii le Israelohkă, po khă rom anda sako semençia.

¹³Thai andakhdata so le raša kai nigărăn o chivoto le Raiehko, le Devllehko sa la phuweako, thona e sujbiça ando pai le Iordanohko, le paia le Ioranohkă pharadeona ande donde, thai varesar le paia kai aven opral, atărdeona gomila.”

¹⁴O poporo ankăsto anda le çăre, kaste nakhăl o Iordano, thai le raša kai nigărănas o chivoto le phanglimahko telearde angloa poporo.

¹⁵Kana le raša, kai nigrănas o chivoto, arăsle koa Iordano, thai kana tindile lengă pînŕă koa gor la paiehko, — kă o Iordano šordel pe pa sal maluri lehkă ando čiro le tidimahko — ,

¹⁶le paia kai ulenas opral atărdi le, thai vazdile gomila, ka khă but dureaimos paša e četatea Adam, kai sî paša o Çartan; ta kukola kai ulenas karing o baro islazo, kai sî e marea e Londi, tidinisai le sa. O poporo nakhlo angloa Ierixono.

¹⁷Le raša kai nigrănas o chivoto le phanglimahkole Raiehko atărdile po šutimos, ando maškar le Iordanohko, ando čiro so sa o Israelo nakhălas po šutimos, ji kana isprăvisardea soa poporo ta nakhlo o Iordano.