Read Kalderash Romani Cornilescu Bible 2020 (Romania) Iosua 4 Bible Online

Iosua 4 - Kalderash Romani Cornilescu Bible 2020 (Romania) bible

Iosua 4

¹Pala so isprăvisardea soa poporo ta nakhlo o Iordano, o Rai phendea le Iosuahkă:

²„Le dešudui rom anda o poporo, po khă rom anda sako semençia.

³De le o mothodimos kakoa: „Len koçal, andoa maškar le Iordanohko, andoa than kai atărdile le raša, dešudui baŕ, kai te nigrăn le tumença, thai te thon le ando than kai reatearăna ande kadea reat.”

⁴O Iosua akhardea dešudui rom, kai alosardea le anda le šeave le Israelohkă, po khă rom anda sako semençia.

⁵Thai phendea lengă: „Nakhăn angloa chivoto le Raiehko, le Devllehko tumarăhko, ando maškar le Iordanohko, thai sakogodi anda tumende te len po khă baŕ po dumo, pala o dindimos le semençiengo le šeavengo le Israelohkă,

⁶anda kă kadea te avel khă sămno andimahko godeako ando maškar tumaro. Kana pušena tumară šeave ande khă des: „So amean kadala baŕ anda tumende?”

⁷te phenen lengă: „Le paia le Iordanohkă pîtărdi'le ande donde angloa chivoto le phanglimahko le Raiehko; kana nakhlo o chivoto o Iordano, le paia le Iordanohkă pîtărdile ande donde, thai le baŕ kadala te aven orkana khă andimos godeako anda le šeave le Israelohkă.”

⁸Le šeave le Israelohkă kărdine kadea sar mothodea lengă o Iosua. Line dešudui baŕ andoa maškar le Iordanohko, sar phendeasas le Iosuahkă o Rai, pala o dindimos le semeçiengo le šeavengo le Israelohkă, line le pesa, thai thodine le ando than kai avenas te ašen pai reat.

⁹O Iosua vazdea i o dešudui baŕ ando maškar le Iordanohko, ando than kai atărdilesas le pînŕă le rašangă kai nigrănas o chivoto le phanglimahko; thai on ašile oče ji ando des dă adesara.

¹⁰Le raša kai nigrănas o chivoto bešline ando maškar le Iordanohko ji kana pherdilo sa so mothodeasas le Iosuahkă o Rai te phenel le poporohkă, sa sar mothodeasas o Moise le Iosuohkă. Thai o poporo iuçîsai'lo te nakhăl.

¹¹Pala so isprăvisardea nakhlimahko soa poporo, o chivoto le Raiehko thai le raša nakhline angloa poporo.

¹²Le šeave le Rubenohkă, le šeave le Gadohkă, thai dopaši anda e semençia le Manasosti, nakhline înarmome angla le šeave le Israelohkă, sar phendesas lengă o Moise.

¹³Paše štarvardeši mii rom, gata marimahkă, nakhline gata te aven marimahkă angloa Rai ando islazo le Ierixonohko.

¹⁴Ando des kodoa, o Rai vazdea le Iosuas angloa soa Israelo; thai darai le lestar sar darailesas le Moisastar, ande sa le des lehka čivavakă.

¹⁵O Rai phendea le Iosuahkă:

¹⁶Motho le rašangă kai nigrăn o chivoto le phendimahko, te anklen andoa Iordano.”

¹⁷Thai o Iosua mothodea le rašangă: „Anklen andoa Iordano.”

¹⁸Kana ankăste le raša, kai nigrănas o chivoto le phanglimahko le Raiehko, andoa maškar le Iordanohko, thai kana ušteade le šubiçasa le pînŕăsti po šutimos, le paia le Ioranohkă amboldi'le ka pehko than, thai šorde pe sar mai anglal pa sa lehkă riga.

¹⁹O poporo ankăsto andoa Iordano ando dešto des, le šonehko anglal, thai anzarde pe ando Ghilgalo, kai rig kataravelokham le Ierixonosti.

²⁰O Iosua vazdea ando Ghilgalo le dešudui baŕ kai linesas le andoa Iordano.

²¹O phendea le šeavengă le Israelohkă: „Kana pušena tumară šeave ande khă des pehkă dadden: „So însomnol le baŕ kadala?”

²²te sîkaven tumară šeaven, thai te phenen lengă: „O Israelo nakhlo o Iordano kadoa sar po šutimos.

²³Kă o Rai, o Dell tumaro, šuteardea angla tumende le paia le Iordanohkă ji kana nakhlean, pala sar kărdeasas o Rai, o Dell tumaro kai Marea e Lolli, kai šuteardea la angla amende ji kana nakhleam,

²⁴anda ka sa le popoare la phuweakă te jeanen kă o vast le Raiehko sî zuralo, thai te daran orkana le Raiestar, le Devllestar tumarăstar.”