Read Kalderash Romani Cornilescu Bible 2020 (Romania) 2 Tesaloničenea 3 Bible Online

2 Tesaloničenea 3 - Kalderash Romani Cornilescu Bible 2020 (Romania) bible

2 Tesaloničenea 3

¹Întea, phralale, rudin tume anda amende ka, o Divano le Raiehko te tinzol pe thai te avel vestime sar sî tumende,

²thai te avas skăpime le manušendar bigodeako thai nasulimahkă; kă na sa sîle pateaimos.

³Pateamno sî o Rai: O zurearăla tume thai arakhăla tume le jungalestar.

⁴Dikhlimasa tumende, same pateaimos ando Rai kă kărăn thai kărăna so mothoasa tumengă.

⁵O Rai te ortol tumară ille karing o kamblimos le Devllehko thai karing o răbdimos le Kristosohko!

⁶Ando Anau le Raiehko amarăhko le Isus Kristosohko, mothoas tumengă, phralale, dentume rigate orsave phralestar, kai trail ando bilašardimos, thai na pala le sîkaimata, kai lean le amendar.

⁷Tume orta jeanen so trăbul te kărăn kaste jean pala amende, kă ame či traisardeam ando bilašardimos, maškar tumende.

⁸Či xaleam dă pomană o manŕo khanikahko; ta, kărindoi buti thai čiindoi, buteardeam des thai reat, kaste na avas pharimos khanikahkă anda tumende.

⁹Na kă nas ame o čeačio kadoa, ta kambleam te das tume orta ame khă pilda vreniko phirimasti.

¹⁰Kă, kana samas tumende, phenasas tumengă ortomasa: „Kon či kamel te kărăl buti, čina te na xal.”

¹¹Ašunas kadea kă iekh anda tumende train ando bilašardimos, či butearăn khanči, thai nikărdeon khančimatăndar.

¹²Mothoas kadale manušengă thai phenas lengă, ando Rai amaro o Isus Kristoso, te xan pehko manŕo butearindoi ujimasa.

¹³Tume, phralale, te na čiion ando kărdimos le mištimahko.

¹⁴Thai kana či ašunel varekon so phenas ame ande kadoa zakono, thonles rigate, thai te na avel tume či khă phanglimos lesa, kaste avel lehkă lajeau.

¹⁵Te na dinenles sar khă dušmanos, ta te den lehkă duma sar khă phralehkă.

¹⁶Orta o Rai la pačeako te del tume orkana e pačea or sar. O Rai te avel tumença saoŕănça!

¹⁷O phendimos le sastimahko sî ramome mîŕă vastesa: o Pavelo. Kadoa sî o sămno ande sako zakono; kadea ramo me.

¹⁸O Xaro le Raiehko amarăhko le Isus Kristosohko te avel tumença saoŕănça! Amin.