Read Kalderash Romani Cornilescu Bible 2020 (Romania) Evreia 5 Bible Online

Evreia 5 - Kalderash Romani Cornilescu Bible 2020 (Romania) bible

Evreia 5

¹Ande čeačimaste, or sao baro rašai, lino anda o maškar le manušengo, sî thodino andal manuši andel butea dikhlimasa koa Dell, kaste anel pativa thai jertfe andal bezexa.

²O daštil te avel iertimasa kolença bijeangline thai xasardine, anda kă i o sî astardo kovlimasa.

³Thai, anda kadoa kovlimos, trăbul te anen pe jertfe kaditi anda lehkă bezexa, sode i anda le norodohkă.

⁴Khonikh či lel pesti pativ kadea korkoŕo, ta lel la kana sî akhardo le Devllestar, sar sas o Arono.

⁵Sa kadea i o Kristoso, či lea Pehkă korkoŕo e slava te avel Baro Rašai, ta sî Les kata Kukoa kai phendea Lehkă: „Tu san Muŕo Šeau, ades kărdem Tu.”

⁶Thai sar phenel pale ande aver than: „Tu san rašai ando veako, pala o lašardimos le Melxisedekohko.”

⁷O sî Kodoa kai, andel des phuwikane la čivavakă Pehkă, andindoi rudimata thai manglimata bară çîpimatănça thai iasfănça karing Kukoa kai daštilas te skăpil Les andoa mullimos, thai avindoi ašundino anda Lehko pateamos,

⁸barem kă sas Šeau, sîtilo te ašunel andal butea kai kăsnisardea le.

⁹Thai pala so sas kărdo bidošako, kărdi'lo anda sa kola kai ašunen Les, o kărditorii khă skăpimahko vešniko,

¹⁰kă sas dino anau le Devllestar: Baro Rašai „pala o lašardimos le Melxisedehko.”

¹¹Pa kodola dă mai opral same but phendimahko, thai butea phară phendimahkă; anda kă kărdilean phară koa atearimos.

¹²Ande čeačimaste, tume kai dămult trăbunas te aven sîkaitorea, sî tume pale trăbuimos ta varekon te sîkavel tume le mai anglal čeačimata le divanurengă le Devllehkă, thai arăslean te avel tume trăbuimos thudestar, na xamostar zuralo.

¹³Thai orkon kai či xrănil pe numai thudesa, nai sîkado le divanosa poa bibezexalimos, kă sî khă gloata.

¹⁴Ta o xamos o zuralo sî andal manuši le bară, anda kola savendi kris pîtărdili, andoa kărdimos, te alol so sî mišto thai nasul.