Read Kalderash Romani Cornilescu Bible 2020 (Romania) Iakovohko 1 Bible Online

Iakovohko 1 - Kalderash Romani Cornilescu Bible 2020 (Romania) bible

Iakovohko 1

¹O Iakovo, robo le Devllehko thai le Raiehko le Isus Kristosohko, karing le dešudui semençii kai sî phaŕadine: sastimos!

²Mîŕă phral, te dikhăn bară bukurimasa kana nakhăn anda but zumaimata,

³sar iekh kai jeanen kă o zumaimos tumară pateaimahko kărăl buti ŕăbdimos.

⁴Ta o ŕăbdimos trăbul te kărăl pherdimasa e buti, anda kaste aven pherdine, bidošako, orta, thai te na nigrăn khančestar biavimos.

⁵Kana iekhăhkă anda tumende nai les o godimos, te mangăles katoa Dell, kai del saoŕăngă vastesa buflo thai bidinodumako, thai avelas lehkă dino.

⁶Ta te mangăles pateamasa, bi te bandeol ăkh çîra: anda kă kon bandeaol, ameal le valosa la mareako, biujardo thai spidino la bravalleatar orde thai întea.

⁷Khă kadea manuši te na ajukrăl pe te lel vareso kata o Rai,

⁸kă sî khă manuši kai či jeanel so kamel bijeanglimahko ande sa pehkă droma.

⁹O phral kai sî mai telal te lăudil pe pehkă vazdimasa.

¹⁰O bravalo, avervaresar, te lăudil pe pehkă meklimasa; kă nakhăla sar e lulludi la čeareati.

¹¹Anklel o kham pehkă tatimasa phabardino, thai šutearăl e čear: e lulludi lati perăl tele, thoa šukarimos lako dičimahko xasaol: kadea o bravalo šuteola ande pehkă phirimata.

¹²Baxtalo kolestar kai ŕăbdil o zumaimos. Kă pala so sas arakhado lašo, lela e koroana la čivavati, kai šinadeala o Dell kolengă kai kamen Les.

¹³Khonikh, kana sî zumado, te na phenel: „Sîm zumado le Devllestar.” Kă o Dell našti avel zumado kaste kărăl nasul, thai O orta či zumavel khanikas.

¹⁴Ta sakogodi sî zumado, kana sî çîrdino pehka poftatar kai kamela.

¹⁵Pala kodea e pofta, kana astardili, del kărdimos kai bezex; thai e bezex ăkhdata kărdini, anel o mullimos.

¹⁶Na athaven tume but kambline mîŕă phral:

¹⁷orso del pe amengă lašo thai orsavi pativ pherdini sî dă opral, ulindoi kata o Dadd le luminengo, ande sao nai či paruglimos, či ušal paruglimasti.

¹⁸O, lašo Pehkă kamimasa, kărdeme andoa Divano le čeačimahko, kaste avas sar iekh anglal kai sî kărdine Lestar.

¹⁹Jeanen mišto e buti kadea, but kamblne mîŕă phral! Or sao manuši te avel iekhatar koa ašundimos, kovlo koa dimosduma, kovleardo koa xolearimos;

²⁰kă e xolli le manušesti či kărăl o bibezexalimos le Devllehko.

²¹Anda kodea šuden orsao biujearimos thai orsao phutearimos nasulimatahko thai len lašimasa o Divano thodino ande tumende, kai dašti skăpil tumară duxurea.

²²Aven pherditorea le Divanohkă, na numai ašunditorea, xoxaindoi tume korkoŕo.

²³Kă kana ašunel varekon o Divano, thai či pherăles le kărdimasa, ameazăl khă manušesa, kai dikhăl pehko mui andkh glinda;

²⁴thai, pala so dikhlea pe, telearăl thai bîstrăl iekhatar sar sas.

²⁵Ta kon dikhăl andră pehkă dikhlimata ande kris e pherdini, kai sî e kris le slobozîmasti, thai ašela ande late, na sar khă ašunditori bîstărdino, ta sar khă pherditori le kărdimasa, avela baxtalo ande pesti buti.

²⁶Kana pateal varekon kă sî pateamno, thai či lopînzîl pesti šib, ta athavel pehko illo, o pateamos khă kadale manušehko sî dăiveantaină.

²⁷O pateamos ujo thai bimakhlo, angloa Dell, o Dadd amaro, sî te rodas le bidaddengo thai le phiwlean ande lengă kăsnimata, thai te arakhas ame bimakhlime la lumeatar.