Read Kalderash Romani Cornilescu Bible 2020 (Romania) Iakovohko 2 Bible Online

Iakovohko 2 - Kalderash Romani Cornilescu Bible 2020 (Romania) bible

Iakovohko 2

¹Phralale mîŕă, te na nikrăn o pateamos le Raiehko amarăhko le Isus Kristosohko, o Rai la slavako, rodindoi koa mui le manušehko.

²Kă, kana, šol pe khă manuši ande tumaro tidimos kha angrusteasa sumnakui thai kha raxameasa kai străfeal, thai šol pe i khă čioŕo xureado čioŕăs;

³thai tume thon le iakha pe kukoa kai phiravel e raxami kai străfeal, thai phenen lehkă: „Tu beši ando than kadoa o lašo!” thai pala kodea phenen le čioŕăhkă: „Tu beši kote ande pînŕănde!” Or: „beši tele kal pînŕă mîŕă!”

⁴Či kărăn tume khă ameazămos ande tumende orta, thai či kărăn tume krisînitorea gîndurença jungale?

⁵Ašunen, but kambline mîŕă phral: či alosardea o Dell kolen kai sî čioŕă andel iakha kadala lumeakă, kaste kărăle bravalle ando pateamos thai manditorea le Thagarimahkă, kai šinadea la kolengă kai kamen Les?

⁶Thai tume prasan koles le čioŕăs! Ta na le bravalle sî pa tumende thai çîrden tume anglal krisînitorea?

⁷Či prasan on o šukar anau kai phiraven les?

⁸Kana pherăn e kris e thagarni, lašardi la LašeaVesteasa: Te kames te pašes sar tut orta”, mišto kărăn.

⁹Ta kana sî tume ando dikhlimos o mui le manušehko, kărăn khă bezex, thai san došalde la Krisatar sar varesar ušteaditorea la krisatar.

¹⁰Kă, kon arakhăl sai Kris, thai athadeol ande iekh mothodimos, kărdeol došalo saoŕăndar.

¹¹Kă, Kukoa kai phendea: „te na butkurvis”, phendea i „Te na mudarăs.” Akana, kana či butkurvis, ta mudarăs, kărdeos ušteasditorii la Krisako.

¹²Te den duma thai te kărăn buti sar varesar manuši kai sî te aven krisînime avrea krisatar le slobozîmasti:

¹³kă e kris sî bi milako anda kukoa kai nas les mila; ta e mila mai bari sar e kris.

¹⁴Mîŕă phral, so valoso sî varekas te phenel kă sî les pateamos, kana nai les kărdimata? Dašti kadea o pateamos kadoa te skăpiles?

¹⁵Kana khă phral or khă phei sî nangă thai nai le xamos sa le desăngo,

¹⁶thai iekh anda tumende phenen lengă: „Jean pe pačea, tateon thai čeaileon tumengă!” bi te den le so trăbul lengă statohkă, ka soste kandela les?

¹⁷Sa kadea i o pateamos: kana nai les kărdimata, sî mullo orta ande peste.

¹⁸Ta phenela varekon: „Tut sî tu pateamos, thai man sî ma le kărdimata. „Sîkau mangă teo pateamos bi kărdimatăngo, thai me sîkavaua tukă o pateamos muŕo anda mîŕă kărdimata.”

¹⁹Tu pateas kă o Dell sî iekh, thai mišto kărăs; ta i le beng patean… thai on isdran!

²⁰Kames kadea te atearăs, manuši bidindo, kă o pateamos bi le kardimatănça sî dă iveantaină?

²¹O Avraamo, o rašai amaro, nas o dindo bibezexalo andal kărdimata, kana nigărdea pehkă šeaves le Isakos jertfa po altarii?

²²Dikhăs kă o pateamos kărălas buti andekhthan lehkă kărdimatănça, thai, andal kărdimata, o pateamos arăslo pherdino.

²³Kadedar pherdili e LašiVestea kai phenel: „O Avraamo pateaia le Devlles, thai dindeape lehkă sar bibezexalimos”; thai o sas dino anau „o amal le Devllehko.”

²⁴Dikhăn kadea kă o manuši sî dindo bibezexalo andal kărdimata, thai na numai andoa pateaimos.

²⁵Sa kadea, e kurva e Raxav: nas dindi i oi bibezexali andal kărdimata, kana gostisardea le tradinen thai ankaladea le avri anda aver drom?

²⁶Pala sar o stato bi duxohko sî mullo, sa kadea i o pateamos bi kărdimatănça sî mullo.