Read Kalderash Romani Cornilescu Bible 2020 (Romania) Krisînitorea 14 Bible Online

Krisînitorea 14 - Kalderash Romani Cornilescu Bible 2020 (Romania) bible

Krisînitorea 14

¹O Samsono ulisto ande Timna, thai dikhlea oče khă juwli anda le šeia le Filisteaiengă.

²Kana ankăsto parpale, phendea kadea buti pehkă daddehkă thai pehka deiakă, thai phendea: „Dikhlem ande Timna khă juwli anda le šeia le Filisteaiengă; len mangăla akana dă romni.”

³Lehko dadd thai lesti dei phende lehkă: „Nai koče či khă juwli maškar le šeia le phralengă tirăngă thai ande sao o poporo amaro, ta jeas te les tukă romni katal Filistenea, kai sî bišindineroata?” Thai o Samsono phendea pehkă daddehkă: „Le mangă la, kă čeailel ma?”

⁴Lehko dadd thai lesti dei či jeanenas kă kadea buti avelas kata o Rai: kă o Samson rodelas vareso xolli andai rig le Filisteanendi. Ando čiro kodoa le Filistenea stăpîninas poa Israelo.

⁵O Samson ulisto andekhthan pehkă daddesa thai pehka deiasa ande Timna. Kana arăsle andel răza andai Timna, dikta kă ankăstea lengă anglal khă leo tărno kai çîpilas.

⁶O Duxo le Raiehko avilo poa Samsono; thai, bi te aveles vareso ando vast, o Samsono pharadea le leos sar pharaves khă busno.Či phendea pehkă daddehkă thai pehka deiakă so kărdeasas.

⁷Ulisto thai dea duma la juwleasa kodolasa, thai i oi čeaileala.

⁸Pala vareso čiro, gălo pale ande Timna kaste lela, thai gălo te dikhăl o xoito le leohko. Thai dikta kă ando stato le leohko sas khă ŕoio birowleango thai avdin.

⁹Lea e avdin ando vast, thai xaleala po drom, thai kana arăslo ka pehko dadd thai ka pesti dei, dea le, thai xaline i on anda late. Ta či phendea lengă kă leasas e avdin kadea andoa stato le leohko.

¹⁰O dadd le Samsonohko ulisto kai juwli kodea. Thai oče o Samson kărdea khă govia, kă kadea kărănas le tărne.

¹¹Sar dikhline les i akhardine treanda jene, kai bešline andekhthan lesa.

¹²O Samsono phendea lengă: „Sî te phenau tumengă khă pušlimos. Te phenena mangă les ande kola efta des le abeaohkă, thai te pîtărăna les, daua tume treanda gada thai treanda raxamea paruglimahkă.

¹³Ta kana či arakhăna, te den ma tume treanda gada thai treanda raxamea paruglimahkă.” On phendine lehkă: „Phen amengă o pušlimos kaste ašunas les.”

¹⁴Thai o phendea lengă: „Anda kukoa kai xal ankăsto so xal pe, Thai anda kukoa o zuralo ankăsto guglimos.”

¹⁵Trin des, naštisardine te pîtărăn o pušlimos. Ando des le eftango, phendine la romneakă le Samsonohkă: „Phen te romehkă te pîtrăl amengă o pušlimos; te na, phabarasa tu, i tut thai i o khăr te daddehko. Tidean ame koče kaste len pa amende, nai kadea?”

¹⁶E romni le Samsonosti rovelas paša leste thai phenelas: „Tu nai tu dăsar xolli pe mande, thai či kames ma, thodean khă pušlimos le šeavengă mîŕă poporohkă, thai či pîtărdean mangă les! Thai o dea la anglal: „Či pîtărdem les či mîŕă daddehkă či mîŕa deiakă: te pîtrau les tukă?”

¹⁷Oi ruia paša leste soa čiro kole efta desăngo sode nikărdea o abeau; thai ando eftato des, pîtărdea lakă les, kă xolearălas les. Thai oi dea les le šeavengă lakă poporohko o pîtărimos le pušlimahko.

¹⁸Le manuši andai četatea phendine le Samsonohkă ando eftato des, angla te perăl o kham: „So sî mai guglo sar o avdin, thai so sî mai zuralo sar o leo? Thai o phendea lengă: „Te na dinorigatephuw mîŕa gurumnioŕasa, Nahkă pîtărăn muŕo pušlimos.”

¹⁹O Duxo le Raiehko avilo pa leste, thai o ulisto ando Askalono. Oče mudardea treanda manuši, lea lengă çoale thai dea le çoale le paruglimahkă kolengă kai pîtărdesas o pušlimos. Sas astardo xolleatar, thai ankăsto koa khăr pehkă daddehko.

²⁰Lesti romni sas dini iekhăhkă anda lehkă jene, savesa o sas amal.