Read Kalderash Romani Cornilescu Bible 2020 (Romania) Krisînitorea 15 Bible Online

Krisînitorea 15 - Kalderash Romani Cornilescu Bible 2020 (Romania) bible

Krisînitorea 15

¹Pala vareso čiro, pe vreamea kana tidelas pe o div, o Samson gălo te dikhăl pehka romnea, thai nigărdea lakă khă busno. O phendea: „Kamau te šoau ma ka mîŕî romni ande lati odaia.”

²Ta o dadd lehka romneako či muklea les te šol pe. „Pateaiem kă či dabadikhăs la”, phendea o, „thai dem la te jenehkă. Nai lati phei e tărni mai šukar sar late? Lela la ando than lako.”

³O Samson phendea lengă: „Akana či avaua došalo angla le Filistenea, te kăraua lengă nasul.”

⁴O Samsono teleardea. Astardea trin šella xulpi, thai lea varesar ambral: pala kodea phanglea le xulpen pori poreate, thai thodea po khă ambral maškar lengă dui porea, ando maškar.

⁵Astardea le ambral, dea drom le xulpen andel diva le Filisteanengă, thai dea iag le drăza le divengă, sode i o div kai sas ande pînŕănde, ba i le barea le zetinurengă.

⁶Le Filistenea phendine: „Kon kărdea e buti kadea?” Dea pe lengă anglal: „O Samsono, o jeamîtro le Timeanohko, anda kă kadoa lea lehka romnea thai dea la lehkă jenehkă.” Thai le Filistenea ankăste, thai dine la iag i la thai i lakă daddes.

⁷O Samson phendea lengă: „Kadea kărăn? Či atărdiuaua dăsar pala so ambolaua tumengă so kărdean mangă.”

⁸Mardea le zurales, pel zăia thai po păŕ; pala kodea ulisto thai bešlo ando pharaimos le baŕăbarăhko o Etamo.

⁹Atunčeara le Filistenea telearde, avile ande Iuda, thai tinzosai le ji ande Lexi.

¹⁰Le rom andai Iuda phendine: „Anda soste ankăstean pa amende?” On dine le anglal: „Ankăsteam te phandas le Samsonos, kaste kăras lehkă kadea sar kărdea amengă o.”

¹¹Atunčeara trin mii rom andai Iuda uliste koa pharaimos le kotorăhko le baŕăbarăhko o Etam, thai phendine le Samsonohkă: „Či jeanes kă le Filistenea stăpînin pa amende? So kărdean amengă, kadea?” Thai o dea le anglal: „Kărdem lengă kadea sar kărde mangă i on mangă.”

¹²On phendine lehkă: „Ame ulisteam te phandas tu, kaste das tu andel vast le Filisteaiengă.” O Samson phendea lengă: „Solaxan mangă kă či mudarăna ma.”

¹³On dine les anglal: „Či; kamas dăsar te phandas tu, thai te das tu ande lengă vast, ta či mudarasa tu.” Thai phangle les do šellença neve, thai ankaladine les andoa kotor le baŕăbarăhko.

¹⁴Kana arăsle ando Lexi, le Filistenea line te çîpin bukuriatar angla leste. Atunči o Duxo le Raiehko avilo pa leste. Le šelle kai sas lença phanglo kal vast, kărdile sar le thava le inohkă phabarde ande iag, thai le phanglimata pelel lehkă pal vast.

¹⁵O arakhlea khă falka katîrosti înkă bišuti, tinzosardea o vast thai lea la thai mudardea lasa ăkh mia manuši.

¹⁶O Samson phendea: „Kha falkasa katîrosti, khă grămada, dui grămezi; Kha falkasa katîrosti, mudardem ăkh mia manuši.”

¹⁷Pala so isprăvisardea ta dea duma, šudea e falka andoa vast. Thai o than kodoa ašilo dino anau Ramat-Lexi (O Šudimos la falkako).

¹⁸Avindoi lehkă but truši, çîpisardea karing o Rai, thai phendea: „Tu meklean, andoa vast Tiră robohko, kadoa baro skăpimos; thai akana te merau trušatar, thai te perau andel vast kolengo bišinderoata?”

¹⁹O Dell pîtărdea o phraimos le baŕăbarăhko andai Lexi, thai ankăsto pai anda leste. O Samson pilea, o duxo zureai'lo thai avilo koathan. Anda kodea thodea pe anau le isvorăhkă kodolehkă En-Xankore (O Isvoro kolehko kai del mui); o sî i ades ando Lexi.

²⁰O Samsono sas biši bărši krisînitorii ando Israelo, ando čiro le Filisteainengo.