Read Kalderash Romani Cornilescu Bible 2020 (Romania) Krisînitorea 16 Bible Online

Krisînitorea 16 - Kalderash Romani Cornilescu Bible 2020 (Romania) bible

Krisînitorea 16

¹O Samsono teleardea ande Gaza, oče dikhlea khă kurva, thai šutea pe late.

²Phendea pe le manušengă andai Gaza: „O Samsono avilo koče.” Thai dine les okolo, thai arakhline soŕo reat koa udar la četateako. Bešline potolo soŕo reat, thai phendine: Kana luminila pe ando des, mudarasa les.”

³O Samsono ašilo suto ji koa maškar la reateako. Katoa maškar la reateako, ušti'lo, thai astardea le udara la četateakă lido tilença, ankalasdea le andekhthan le drugosa, thodea le pel dume, thai nigărdea le po gor le baŕăbarăhko anglal angloa Xebrono.

⁴Pala kodea, iubisardea khă juwli anda e xar le Sorekosti. Oi bušolas Dalila.

⁵Le raimata le Filisteaiengă ankăste late, thai phendine lakă: „Rudisar les, thai rode te ašunes katar avel lehkă e zor e bari thai sar sahkă daštil pe te izbîndisaras les, kaste phandas les thai te šutearas les, thai dasa tu sakogodi pokh šell siklea rupune.

⁶E Dalila phendea le Samsonohkă: „Phen mangă, rudi tu, katar avel tukă e zor tiri e bari, thai sosa te aves phanglo te na mai avel tu zor.”

⁷O Samsono phendea lakă: „Te avaua phanglo efta šellença neve, kai te na aven înkă šute, sahkă šutiuau thai sahkă avau sar orsao manuši.”

⁸Le raimata le Filistianengă andine la Dalilakă efta šelle neve, bišutine înkă.Thai oi phanglea les le šellença kodolença.

⁹Ta varesar manuši bešenas koa arakhadimos late ande khă odaia. Oi phendea lehkă: „Le Filistenea sî pa tute Samsone!” Thai o šindea le šelle sar šindeol pe khă thaw šukarneako kana astardeol iagatar. Thai kadeadar či jeangline katar avel lalehkă e zor.

¹⁰E Dalila phendea le Samsonohkă: „Dikhăs, asaian tukă mandar, phendean mangă xoxaimata. Akana, rudi tu, sîkau mangă sosa trăbul te aves phanglo.”

¹¹O phendea lakă: „Te avaua phanglo šelença neve, kai nas thodine varekai čiăkdata, sahkă šutiuau thai sahkă avau orsao manuši.”

¹²E Dalila lea varesar šelle neve thai phanglea les. Pala kodea phendea lehkă: „Le Filistenea sî pa tute Samsone!” Ta varesar manuši bešenas koa arakhaimos andekh odaia. Thai o šindea le šelle katal vast sar khă thaw.

¹³E Dalila phendea le Samsonohkă: „Ji akana mardean tukă khălimos mandar, thai phendean mangă xoxaimata. Phen mangă sosa trăbul te aves phanglo.” O phendea lakă: „Nai tu dă sar te akhuves kola efta šuviçe ballengă anda muŕo šero ande urzala le astarimahko.”

¹⁴Thai oi mardea le ande khă karfin kaštehko ande phuw. Pala kodea phendea: „Le Filistenea sî pa tute Samsone!” Thai o ušti'lo andai lindri, thai çîrdea o karfin le kaštehko andai phuw urzalasa ku sea.

¹⁵Oi phendea lehkă: „Sar dašti phenes: „Kamau tu!” kana teo illo nai mança? Dikta kă trivarăs mardean tukă khălimos mandar, thai či phendean mangă katar avel tukă e zor kodea e bari.”

¹⁶Anda kă oi xolearălas les thai kăznilas les ande sako des pehkă rudimatănça, o dii pherdi'lo lehkă anda khă biujimos mullimahko,

¹⁷thai pîtărdea sa pehko illo angla late, thai phendea lakă: „O bričio či nakhlo pa muŕo šero, anda kă sîm dino le Raiehkă înkă anda o păŕ mîŕa dako. Te avaua ŕanglo, e zor mekăla ma, thai šutiuaua, thai avaua sar or sao manuši.”

¹⁸E Delila, dikhlindoi kă pîtărdea sa pehko illo angla late, tradea te akharăn le raimatăn le Filisteainengă, thai thodea te phenen lehkă: „Anklen kă andai data kadea, pîtărdea mangă sa pehko illo.” Thai le raimata le Filisteainengă ankăste late, thai andine lakă o rup andel vast.

¹⁹Oi sovleardea les pe pehkă čeanga. Thai akhardea khă manuši, ŕanglea le efta šuviçe poa šero le Samsonohko, thai lea kadea te šutearăl les. O xasardea pesti zor.

²⁰Atunčiara oi phendea: „Le Filistenea sî pa tute Samsone!” Thai o ušti'lo, thai phendea: „Kăraua i sar mai anglal, thai činoua ma: „Či jeanelas kă o Rai durilosas lestar.

²¹Le Filistenea azbade les, thai ankalade lehkă iakha; ulearde les ande Gaza, thai phangle les le lançurença andai xarkuma. O amboldelas kai rîšniça ando beči.

²²Ta le ball lehkă šerăhkă line te bareon pale, pala so sas ŕanglo.

²³Thai le raimata le Filistianengă, tide pe kaste anen khă bari jertfa lengă devlehkă le Dragonohkă, thai te vesălin pe. On phenenas: „O del amaro dea ande amară vast le Samsonos, amară dušmanos.”

²⁴Thai kana dikhlea les o poporo, lăudisarde pehkă devles, phendindoi: „O del amaro dea ame ande amară vast amară dušmanos, kukoles kai pustisardea amară čemes, thai butearălas amară mullen.”

²⁵Ande bukuria lendi illesti, phendine: „Akharăn le Samsonos kaste distrol ame!” Ankaladine le Samsonos andoa beči, thai o khăldea angla lende. Thodine les maškar le tille.

²⁶Thai o Samson phendea le tărnehkă kai nikrălas les vastesatar: „Mekh ma, kaste dašti azbama le tillendar savendar nikrăl pe o khăr, te nikra ma lendar.”

²⁷O khăr sas pherdo rom thai romnea; sal raimata le Filisteanengă sas oče, thai po akoperiš sas paše trin mii jene, rom thai romnea, kai dikhănas po Samsono sar khălel.

²⁸Atunčiara o Samson çîpisardea karing o Rai, thai phendea: „Raia, Devlla! An Tukă godi mandar, rudi Tu, Devlla, dema zor dăsar andai data kadea, thai kha anda khă korkoŕo malaimos te amboldau ma pel Filistenea anda mîŕă dui iakha!”

²⁹Thai o Samson lea ande angali lidui tille andoa maškar pe save bešelas o khăr, thai nikărdi'lo lendar; iekh sas ande čeači rig lesti, thai o kolaver ande bičeaxči.

³⁰O Samsono phendea: „Te merau andekhthan le Filistenença!” Bandi'lo sa la zorasa, thai o khăr pelo pa le raimata thai pa soa poporo kai sas oče. Kola kai gălinetar koa merimos lehko sas mai but da sar kola mudarde ando čiro lehka čivavako.

³¹Lehkă phral thai soa khăr lehkă daddehko uliste, thai line les. Kana ankăste parpale, praxosarde les maškar e Çorea thai o Eštaol, ando mormânto lehkă daddehko le Manoahkohko. O sas krisînitorii ando Israelo biši bărši.