Read Kalderash Romani Cornilescu Bible 2020 (Romania) Krisînitorea 18 Bible Online

Krisînitorea 18 - Kalderash Romani Cornilescu Bible 2020 (Romania) bible

Krisînitorea 18

¹Ando čiro kodoa nas thagar ando Israelo; thai e semençia le Danosti rodenas pehkă khă mandimos kaste bešen ande leste, kă ji ando des kodoa či pelosas lengă koa çîrdimos la baxteako či khă mandimos ando maškar le semeçiengo le Israelosti.

²Le šave le Danohkă line anda peste sa, anda lengă familii, panji manuši zurale, kai trade le ande Çorea thai ando Eštaol, te rodenčioreal o čem thai te dikhăn les. On phende lengă: „Jean thai dikhăn o čem.” On arăsline ando baŕbaro le Efraimohko, ando khăr le Mikahko, thai ašile pai reat oče.

³Kana sas paše le khărăstar le Mikaskărăstar, prinjeandine o mui le tărne Levitohko, pašile paša leste thai phende lehkă: „Kon andea tu koče? So kărăs tu ando than kadoa? So sîtu koče?”

⁴O dea le anglal: „O Mika kărăl kutea thai kutea buti anda mande, del ma khă potindimos, thai me sîm lehkă rašai.”

⁵On phendine lehkă: „Pušta le Devlles, kaste jeanas same bax ande amaro phirimos.”

⁶Thai o Rašai dea le anglal: „Jean pe pačea; o phirimos kai kărăn les sî tala o dičimos le Raiehko.”

⁷Kola panji manuši telearde, thai arăsle ando Lais. Dikhline o poporo oçal sar trai koa thanlašo, sar le Sidoniçea, ujardo thai bi grijengo; ando čem nas khonikh kai te kără lengă ăkh mai çîkno nasul stăpînindoi pa lende; sas dur le Sidoniçăndar, thai nas le či khă phanglimos avră manušença.

⁸Amboldile ka pehkă phral ande Çorea thai Eštaol, thai lengă phral phendine lengă: „So ašundimos anen amengă?”

⁹„Aven”, dine anglal on „te ankleas pa lende; kă dikhleam o čem, thai dikta kă sas but lašo. So! Bešen thai či phenen khanči? Na aven khandine thai telearăn te thon o vast po čem kadoa.

¹⁰Kana šona tume ande leste, dena pa khă poporo kai bešel bi darako. O čem sî baro, thai o Dell dea les ande tumară vast; sî khă than kai nai khanči so te na avel pe phuw.”

¹¹Šou šella manuši andai familia le Danosti telearde andai Çorea thai o Eštaol, le armença le mardimahkă.

¹²Uštile, thai aviline ando Chiriat-Iearim, kai bušol ji ando des dă adesara Maxane-Dan (E Tabăra le Danosti).

¹³Nakhle oçal ando baŕobaro le Efraimohko, thai arăsle ji ando khăr le Mikahko.

¹⁴Atunčeara kola le panji jene kai gălesas te dikhăn čioreal o čem o Lais, line o divano thai phendine pehkă phralengă. „Jeanen kă andel khăra kadala sî khă efodo, terafimea, khă tipo čioplime thai khă tipo šordo? Dikhăn akana so sî tume kărimahko.”

¹⁵On linela karing oče, šute pe ando khăr le tărne Levitohko, ando khăr le Mikahko, thai pušle les sastimastar!

¹⁶Kola šou šella manuši andal šeave le Danohkă, phangle le armença le mardimahkă, bešenas anglal o udarle šutimahko.

¹⁷Thai le panji manuši kai gălesas te dikhănčioreal o čem, ankăste thai šute pe ando khăr; line o tipo o čioplime, le terafimea, o efodo thai o tipo o šordo, ando čiro kai o rašai sas kole šove šellença koa udar le štimahko, phangline le armença le mardimahkă.

¹⁸Kana šute pe ando khăr le Mikahko, thai line o tipo o čioplime, le terafimea, o efodo thai o tipo o šordo, o rašai phendea lengă: „So kărăn mangă?”

¹⁹On dine les anglal: „Aši, tho tukă o vast koa mui, thai av amença; te aves amaro dadd thai amaro rašai. Mai mišto te aves rašai ka ăkh khăr khă manušehko, or te aves o rašai kha semençiako thai kha familiako andoa Israelo?”

²⁰O rašai bukurisa'lo ande pehko illo; lea o efodo, le terafimea, thai o tipo o čioplime, thai dea pe la čeatasa le poporohko.

²¹Line la pale po drom thai telearde, thodindoi anglal le šaoŕăn, le juvindimatăn thai le kalabalîkuri.

²²Pala so durile mišto le khărăstar le Mikahkărăstar, le manuši kai bešenas le khărănça paše le Mikastar tide pe thai line pe pala le šeave le Danohkă.

²³Çîpisarde pala le šeave le Danohkă, kai amboldi'le thai phendine le Mikahkă: „So sî tu thai so ameal e gloata kadea le manušendi?”

²⁴O dea le anglal: „Le devla mîŕă kai kărdemas mangă le, lean mangă le thai lean mangă andekhthan i mîŕă rašas thai găleantar: so mai ašel ma? Sar daštin te phenen mangă: „So sî tu?”

²⁵Le šeave le Danohkă phendine lehkă: „Te na ašunas teo mui; kă avervaresar manuši čiorîmahkă šudena pe pa tumende, thai xasardeosa i tu thai i kukola anda teo khăr.”

²⁶Thai le šeave le Danohkă dikhline mai angle pehkă dromestar. O Mika, dikhlindoi kă sî mai zurale sar leste, amboldi'lo thai avilo khără.

²⁷Vazdine so kărdeasas o Mika, thai line le rašas kai sas ande lehko kandimos, thai peline poa Laiso, khă poporo ujeardo thai pe pačea, nakhade les andoa skuçîmos la sabiako, thai dine iag e četatea.

²⁸Khonikh či skăpisardea la, kă sas but dur andoa Sidono, thai le manuši lakă nas le či khă phanglimos avră manušença: oi sas ande xar kai tinzol pe karing Bet-Rexobo. Le šeave le Danohkă vazdine pale e četatea, thai bešline ande late;

²⁹dine la anau Dano, pala o anau le Danohko, lengo dadd, kăi kărdilosas le Israelohkă; ta e četatea mai anglal bušolas Lais.

³⁰Vazdine anda lende o tipo o čioplime; thai o Ionatano, o šeau le Gheršomohko, o šeau le Moisahko, o thai le šave lehkă sas le raša le semençiakă le Daniçăngă, ji ando čiro la robiako le čemehko.

³¹Thodine anda lende o tipo o čioplime kai kărdeasas les o Mika, ande soa čiro sode sas o khăr le Devllehko ando Silo.